Hum se Abdullah bin Muhammad Musandi ne bayan kiya, unhon ne kaha hum ko Hisham bin Yusuf ne khabar di, unhon ne kaha hum ko Mamar ne khabar di, unhein Zuhri ne, unhein Ubaidullah bin Abdullah bin Utbah ne aur in se Abu Hurairah razi Allahu anhu ne bayan kiya ke Nabi Karim salla Allahu alaihi wasallam ne farmaya ”bad-shuguni ki koi asal nahi aur is mein behtar faal naik hai.“ Logon ne poochha ke naik faal kya hai ya Rasool Allah? Farmaya ”kalma e saliha (naik baat) jo tum mein se koi sune.“

Hum se Ali Bin Abdullah Madini ne bayan kiya, kaha ke hum se Sufyan Bin Uyainah ne bayan kiya ke Amr Bin Dinar ne kaha yahan (Makkah mein) ek shakhs Nawas naam ka tha. Is ke paas ek bimar ont tha. Abdullah Bin Umar (Radi Allahu Anhuma) gaye aur is ke shareek se wahi ont khareed laye. Wo shakhs aaya to is ke sajhi ne kaha ke hum ne to wo ont bech diya. Is ne poocha ke kisay becha ? shareek ne kaha ke ek sheikh ke hathon jo is tarah ke thay. Is ne kaha afsos! wo to Abdullah Bin Umar (Radi Allahu Anhuma) thay. Chunanche wo aap ki khidmat mein hazir hua aur arz kiya ke mere sathi ne aap ko mareez ont bech diya hai aur aap se is ne is ke marz ki wazahat bhi nahi ki. Abdullah Bin Umar (Radi Allahu Anhuma) ne farmaya ke phir usay wapas le jao. Bayan kiya ke jab wo us ko le jane laga to Abdullah Bin Umar (Radi Allahu Anhuma) ne farmaya ke accha rehne do hum Rasul Allah (Sallallahu Alaihi Wasallam) ke faisla par raazi hain (aap ne farmaya tha ke) «La 'adwa.» (yaani amraz chhoot wale nahi hote) Ali Bin Abdullah Madini ne kaha ke Sufyan ne is riwayat ko Amr se suna
.

Hum se Abdul Aziz bin Abdullah ne bayan kiya, kaha hum se Ibrahim bin Saad ne bayan kiya, in se Salih ne, in se Ibn Shihab ne bayan kiya, unhein Abu Salamah bin Abdur Rahman waghaira ne khabar di aur in se Abu Hurairah razi Allahu anhu ne bayan kiya ke Rasool Allah salla Allahu alaihi wasallam ne farmaya, amraaz mein chhoot-chhath safar aur ullu ki nahusat ki koi asal nahi is par ek aarabi bola ke ya Rasool Allah! Phir mere oonton ko kya ho gaya ke woh jab tak registaan mein rehte hain to harnon ki tarah (saaf aur khoob chakne) rehte hain phir in mein ek kharish wala oont aa jata hai aur in mein ghus kar unhein bhi kharish laga jata hai to Nabi Karim salla Allahu alaihi wasallam ne is par farmaya lekin yeh batao ke pehle oont ko kis ne kharish lagayi thi? Is ki riwayat Zuhri ne Abu Salamah aur Sinan bin Sinan ke wasta se ki hai.

Mujh se Abdullah bin Muhammad Musandi ne bayan kiya, kaha hum se Usman bin Amr ne, kaha ke hum se Yunus bin Yazid Ayli ne, in se Salim ne bayan kiya aur in se Ibn Umar razi Allahu anhuma ne ke Rasool Allah salla Allahu alaihi wasallam ne farmaya ”amraaz mein chhoot-chhath ki aur bad-shuguni ki koi asal nahi aur agar nahusat hoti to yeh sirf teen cheezon mein hoti aurat mein, ghar mein aur ghore mein.“

Hum se Abu al-Yaman ne bayan kiya, kaha hum ko Shuayb ne khabar di, in se Zuhri ne bayan kiya, kaha hum ko Ubaidullah bin Abdullah bin Utbah ne khabar di aur in se Abu Hurairah razi Allahu anhu ne bayan kiya ke main ne Rasool Allah salla Allahu alaihi wasallam se suna, Nabi Karim salla Allahu alaihi wasallam ne farmaya ”bad-shuguni ki koi asal nahi albatta naik faal lena kuch bura nahi hai.“ Sahabah ikraam razi Allahu anhum ne arz kiya: naik faal kya cheez hai? Farmaya ”koi aaisi baat sunna.“

Hum se Muslim bin Ibrahim ne bayan kiya, kaha hum se Hisham Dastawai ne bayan kiya, in se Qatadah ne aur in se Anas razi Allahu anhu ne ke Nabi Karim salla Allahu alaihi wasallam ne farmaya ”chhoot lag jaane ki koi asal nahi aur na bad-shuguni ki koi asal hai aur mujhe achhi faal pasand hai.“ Yani koi kalma e khair aur naik baat jo kisi ke munh se suni jaye (jaisa ke oopar bayan hua).

Hum se Muhammad bin Hakam ne bayan kiya, unhon ne kaha hum se Nadr bin Shumayl ne bayan kiya, unhon ne kaha hum ko Israeel ne khabar di, unhon ne kaha hum ko Abu Haseen (Usman bin Aasim Asadi) ne khabar di, unhein Abu Salih Zakwan ne aur unhein Abu Hurairah razi Allahu anhu ne ke Nabi Karim salla Allahu alaihi wasallam ne farmaya ”chhoot lag jaana bad-shuguni ya ullu ya Safar ki nahusat yeh koi cheez nahi hai.“

Aur Abu Salamah se riwayat hai unhon ne Abu Hurairah razi Allahu anhu se suna ke unhon ne bayan kiya ke Rasool Allah salla Allahu alaihi wasallam ne farmaya ke koi shakhs apne beemar oonton ko kisi ke sehat-mand oonton mein na le jaye. Abu Hurairah razi Allahu anhu ne pehli hadees ka inkar kiya. Hum ne (Abu Hurairah razi Allahu anhu se) arz kiya ke Aap hi ne hamase yeh hadees nahi bayan ki hai ke chhoot yeh nahi hota phir woh (ghussa mein) Habshi zaban bolne lage. Abu Salamah bin Abdur Rahman ne bayan kiya ke is hadees ke siwa main ne Abu Hurairah razi Allahu anhu ko aur koi hadees bhoolte nahi dekha.

Hum se Saeed bin Afir ne bayan kiya, unhon ne kaha ke mujh se Abdullah bin Wahb ne bayan kiya, in se Yunus bin Yazid ne, in se Ibn Shihab ne kaha ke mujhe Salim bin Abdullah aur Hamza ne khabar di aur in se Abdullah bin Umar razi Allahu anhuma ne bayan kiya ke Rasool Allah salla Allahu alaihi wasallam ne farmaya ke chhoot lag jaane ki koi haqiqat nahi hai, bad-shuguni ki koi asal nahi. (Agar mumkin hoti to) nahusat teen cheezon mein hoti, ghore mein, aurat mein aur ghar mein.

Mujh se Muhammad bin Bashar ne bayan kiya, kaha hum se Ibn Jafar ne bayan kiya, in se Shubah ne bayan kiya, kaha ke main ne Qatadah se suna aur unhon ne Anas bin Malik razi Allahu anhu se ke Nabi Karim salla Allahu alaihi wasallam ne farmaya ke chhoot lagna koi cheez nahi hai aur bad-shuguni nahi hai albatta naik faal mujhe pasand hai. Sahabi ne arz kiya naik faal kya hai? Nabi Karim salla Allahu alaihi wasallam ne farmaya ke achhi baat munh se nikalna ya kisi se sun lena.