Hum se Abu al-Waleed Hisham bin Abd-ul-Malik ne bayan kiya, unhon ne kaha hum se Abdur Rahman bin Sulayman bin Ghaseel ne bayan kiya, unhon ne hamain se Aasim bin Umar bin Qatadah ne bayan kiya, unhon ne kaha ke main ne Jabir bin Abdullah razi Allahu anhuma se suna, in se Nabi Karim salla Allahu alaihi wasallam ne farmaya ke agar tumhari dawaon mein shifa hai to pachhna lagwane aur aag se daaghne mein hai lekin aag se daagh kar ilaaj ko main pasand nahi karta.

Hum se Husain ne bayan kiya, kaha hum se Ahmad bin Manee ne bayan kiya, kaha hum se Marwan bin Shuja ne bayan kiya, in se Salim Aftas ne bayan kiya, in se Saeed bin Jubayr ne aur in se Ibn Abbas razi Allahu anhuma ne bayan kiya ke shifa teen cheezon mein hai. Shehad ke sharbat mein, pachhna lagwane mein aur aag se daaghne mein lekin main ummat ko aag se daagh kar ilaaj karne se mana karta hoon. Ibn Abbas razi Allahu anhuma ne is hadees ko marfoo-an naqal kiya hai aur al-Qummi ne riwayat kiya, in se Layth ne, in se Mujahid ne, in se Ibn Abbas razi Allahu anhuma ne aur in se Nabi Karim salla Allahu alaihi wasallam ne shehad aur pachhna lagwane ke baare mein bayan kiya.

Hum se Muhammad bin Abd-ur-Rahman ne bayan kiya, unhon ne kaha hum ko Surayj bin Yunus Abu al-Haris ne khabar di, unhon ne kaha hum se Marwan bin Shuja ne bayan kiya, in se Salim Aftas ne bayan kiya, in se Saeed bin Jubayr ne bayan kiya aur in se Abdullah bin Abbas razi Allahu anhuma ne bayan kiya ke Nabi Karim salla Allahu alaihi wasallam ne farmaya ke shifa teen cheezon mein hai pachhna lagwane mein, shehad peene mein aur aag se daaghne mein magar main apni ummat ko aag se daaghne se mana karta hoon.

Hum se Abu Nuaym ne bayan kiya, unhon ne kaha hum se Abdur Rahman bin Ghaseel ne bayan kiya, in se Aasim bin Umayr bin Qatadah ne bayan kiya, unhon ne kaha ke main ne Jabir bin Abdullah razi Allahu anhuma se suna, unhon ne bayan kiya ke main ne Nabi Karim salla Allahu alaihi wasallam se suna, Aap salla Allahu alaihi wasallam ne farmaya ke agar tumhari dawaon mein kisi mein bhalayi hai ya yeh kaha ke tumhari (in) dawaon mein bhalayi hai. To pachhna lagwane ya shehad peene aur aag se daaghne mein hai agar woh marz ke mutabiq ho aur main aag se daaghne ko pasand nahi karta hoon.

Hum se Ismail bin Aban ne bayan kiya, unhon ne kaha hum se Abdur Rahman bin Ghaseel ne bayan kiya, unhon ne kaha ke mujh se Aasim bin Umar ne bayan kiya, in se Jabir bin Abdullah razi Allahu anhuma ne bayan kiya ke main ne Nabi Karim salla Allahu alaihi wasallam se suna, Aap salla Allahu alaihi wasallam ne farmaya ke agar tumhari dawaiyon mein koi bhalayi hai to shehad ke sharbat mein hai aur pachhna lagwane mein hai aur aag se daaghne mein hai lekin main aag se daagh kar ilaaj ko pasand nahi karta.