Hum se Muhammad bin Bashar ne bayan kiya, kaha hum se Ibn Abi Adi ne bayan kiya, in se Hisham bin Hassan ne, in se Ikrimah ne aur in se Ibn Abbas razi Allahu anhuma ne ke Nabi Karim salla Allahu alaihi wasallam ne halat e ihram mein apne sar mein pachhna lagwaya (yeh pachhna Aap ne sar ke) dard ki wajah se lagwaya tha jo Lahyi Jamal naami pani ke ghaat par Aap ko ho gaya tha.

Aur Muhammad bin Sawa ne bayan kiya, kaha hum ko Hisham bin Hassan ne khabar di, unhein Ikrimah ne aur unhein Ibn Abbas razi Allahu anhuma ne ke Rasool Allah salla Allahu alaihi wasallam ne ihram ki halat mein apne sar mein pachhna lagwaya. Aadhe sar ke dard ki wajah se jo Aap ko ho gaya tha.

Hum se Ismail bin Aban ne bayan kiya, unhon ne kaha hum se Abdur Rahman bin Ghaseel ne bayan kiya, unhon ne kaha ke mujh se Aasim bin Umar ne bayan kiya, in se Jabir bin Abdullah razi Allahu anhuma ne bayan kiya ke main ne Nabi Karim salla Allahu alaihi wasallam se suna, Aap salla Allahu alaihi wasallam ne farmaya ke agar tumhari dawaiyon mein koi bhalayi hai to shehad ke sharbat mein hai aur pachhna lagwane mein hai aur aag se daaghne mein hai lekin main aag se daagh kar ilaaj ko pasand nahi karta.