Aur Allah Ta'ala ka farman «feehi shifa-ul-lin-naasi» ke ”is mein (har marz se) logon ke liye shifa hai.“

Hum se Ali bin Abdullah ne bayan kiya, kaha hum se Abu Usamah ne bayan kiya, kaha ke mujhe Hisham ne khabar di, unhein un ke walid ne aur in se Aisha razi Allahu anha ne bayan kiya ke Nabi Karim salla Allahu alaihi wasallam ko sheerini aur shehad pasand tha.

Hum se Abu Nuaym ne bayan kiya, unhon ne kaha hum se Abdur Rahman bin Ghaseel ne bayan kiya, in se Aasim bin Umayr bin Qatadah ne bayan kiya, unhon ne kaha ke main ne Jabir bin Abdullah razi Allahu anhuma se suna, unhon ne bayan kiya ke main ne Nabi Karim salla Allahu alaihi wasallam se suna, Aap salla Allahu alaihi wasallam ne farmaya ke agar tumhari dawaon mein kisi mein bhalayi hai ya yeh kaha ke tumhari (in) dawaon mein bhalayi hai. To pachhna lagwane ya shehad peene aur aag se daaghne mein hai agar woh marz ke mutabiq ho aur main aag se daaghne ko pasand nahi karta hoon.

Hum se Ay-yash bin al-Waleed ne bayan kiya, kaha hum se Abd-ul-A'la ne, kaha hum se Saeed ne, in se Qatadah ne, in se Abu al-Mutawakkil ne aur in se Abu Saeed Khudri razi Allahu anhu ne ke ek sahab Nabi Karim salla Allahu alaihi wasallam ki khidmat mein hazir huay aur arz kiya ke mera bhai pait ki takleef mein mubtala hai. Nabi Karim salla Allahu alaihi wasallam ne farmaya ke unhein shehad pila phir doosri martaba wahi sahabi hazir huay. Aap salla Allahu alaihi wasallam ne usay is martaba bhi shehad pilane ke liye kaha woh phir teesri martaba aaya aur arz kiya ke (hukm ke mutabiq) main ne amal kiya (lekin shifa nahi hui). Nabi Karim salla Allahu alaihi wasallam ne farmaya ke Allah Ta'ala sacha hai aur tumhare bhai ka pait jhoota hai, unhein phir shehad pila. Chunanche unhon ne shehad phir pilaya aur isi se woh tandurust ho gaya.