Hum se Muslim bin Ibrahim ne bayan kiya, kaha hum se Salam bin Miskeen Abu al-Rauh Basri ne bayan kiya, kaha ke hum se Sabit ne bayan kiya in se Anas razi Allahu anhu ne ke kuch logon ko beemari thi, unhon ne kaha: ya Rasool Allah! Hamain qiyam ki jagah inayat farma dein aur hamare khane ka intizam kar dein phir jab woh log tandurust ho gaye to unhon ne kaha ke Madinah ki aab o hawa kharab hai chunanche Nabi Karim salla Allahu alaihi wasallam ne Maqam e Harra mein oonton ke saath in ke qiyam ka intizam kar diya aur farmaya ke in ka doodh piyo jab woh tandurust ho gaye to unhon ne Aap salla Allahu alaihi wasallam ke charwahe ko qatl kar diya aur oonton ko haank kar le gaye. Nabi Karim salla Allahu alaihi wasallam ne in ke peeche aadmi doriye aur woh pakre gaye (jaisa ke unhon ne charwahe ke saath kiya tha) Aap salla Allahu alaihi wasallam ne bhi waisa hi kiya in ke hath paon katwa diye aur in ki aankhon mein salayi phirwa di. Main ne in mein se ek shakhs ko dekha ke zaban se zameen chaat-ta tha aur isi halat mein woh mar gaya. Salam ne bayan kiya ke mujhe maloom hua ke Hajjaj ne Anas razi Allahu anhu se kaha tum mujh se woh sab se sakht saza bayan karo jo Rasool Allah salla Allahu alaihi wasallam ne kisi ko di ho to unhon ne yahi waqia bayan kiya jab Imam Hasan Basri tak yeh baat pahunchi to unhon ne kaha kaash woh yeh hadees Hajjaj se na bayan karte.