Hum se Abu Nuaym ne bayan kiya , unhon ne kaha hum se Muhammad bin Talha ne bayan kiya , in se Zubayd ne bayan kiya , in se Mujahid ne bayan kiya , unhon ne Abdullah bin Umar razi Allahu anhuma se suna ke Nabi Karim salla Allahu alaihi wasallam ne farmaya ke darakhton mein ek darakht misl Musalman ke hai aur woh khajoor ka darakht hai .

Hum se Qutaibah bin Sa’eed ne bayan kiya, kaha hum se Ismail bin Ja’far ne bayan kiya, unhon ne Abdullah bin Dinaar se, unhon ne Abdullah bin Umar Radhiallahu Anhuma se kaha ke Nabi Kareem Sallallahu Alaihi Wasallam ne farmaaya darakhton mein ek darakht aisa hai ke us ke patte nahi jhadte aur musalmaan ki misaal usi darakht ki si hai. Bataao woh kaun sa darakht hai? Yeh sun kar logon ka khayaal jungle ke darakhton ki taraf dauda. Abdullah Radhiallahu Anhu ne kaha mere dil mein aaya ke woh khajoor ka darakht hai. Magar main apni (kamsini ki) sharm se na bola. Aakhir Sahaba ne Nabi Kareem Sallallahu Alaihi Wasallam hi se poocha ke woh kaun sa darakht hai? Aap Sallallahu Alaihi Wasallam ne farmaaya woh khajoor ka darakht hai.

Hum se Khalid bin Makhlad ne bayan kiya, kaha hum se Sulaiman bin Bilal ne bayan kiya, kaha hum se Abdullah bin Dinaar ne bayan kiya, unhon ne Abdullah bin Umar Radhiallahu Anhuma se unhon ne Nabi Kareem Sallallahu Alaihi Wasallam se ke (ek martaba) Aap Sallallahu Alaihi Wasallam ne farmaaya darakhton mein se ek darakht aisa hai ke us ke patte nahi jhadte aur musalmaan ki bhi yahi misaal hai batlaao woh kaun sa darakht hai? Yeh sun kar logon ke khayalaat jungle ke darakhton mein chale gaye. Abdullah ne kaha ke mere dil mein aaya ke batla dun ke woh khajoor ka darakht hai lekin (wahaan bahut se buzurg maujood the is liye) mujh ko sharm aayi. Aakhir Sahaba ne arz kiya ya RasoolAllah! Aap hi bayan farmaa dijiye. Aap Sallallahu Alaihi Wasallam ne batlaaya ke woh khajoor ka darakht hai.

Hum se ’Ali (bin Madeeni) ne bayan kiya, un se Sufyan ne, un se Ibn-e-Abi Najeeh ne Mujahid ke waaste se naql kiya, woh kehte hain ke main Abdullah bin Umar Radhiallahu Anhuma ke saath Madine tak raha, main ne (is) ek Hadees ke siwa un se Rasoolullah Sallallahu Alaihi Wasallam ki koi aur Hadees nahi suni, woh kehte the ke hum Rasoolullah Sallallahu Alaihi Wasallam ki khidmat mein haazir the ke Aap Sallallahu Alaihi Wasallam ke paas khajoor ka ek gaabha laaya gaya. (Use dekh kar) Aap Sallallahu Alaihi Wasallam ne farmaaya ke darakhton mein ek darakht aisa hai us ki misaal musalmaan ki tarah hai. (Ibn-e-Umar Radhiallahu Anhuma kehte hain ke yeh sun kar) main ne iradah kiya ke arz karun ke woh (darakht) khajoor ka hai magar choonke main sab mein chhota tha is liye khamoosh raha. (Phir) Rasoolullah Sallallahu Alaihi Wasallam ne khud hi farmaaya ke woh khajoor hai.

Hum se Ismail ne bayan kiya, un se Malik ne Abdullah bin Dinaar ke waaste se bayan kiya, woh Abdullah bin Umar se riwayat karte hain ke Rasoolullah Sallallahu Alaihi Wasallam ne (ek martaba) farmaaya ke darakhton mein se ek darakht (aisa) hai. Jis ke patte (kabhi) nahi jhadte aur us ki misaal musalmaan jaisi hai. Mujhe batlaao woh kya (darakht) hai? To log jangli darakhton (ki soch) mein pad gaye aur mere dil mein aaya (ke main batla dun) ke woh khajoor (ka ped) hai, Abdullah kehte hain ke phir mujhe sharm aa gayi (aur main chup hi raha) tab logon ne arz kiya ya Rasoolallah! Aap hi (khud) us ke baare mein batlaaiye, Aap Sallallahu Alaihi Wasallam ne farmaaya, woh khajoor hai. Abdullah kehte hain ke mere ji mein jo baat thi woh main ne apne waalid (Umar Radhiallahu Anhu) ko batlaayi, woh kehne lage ke agar tu (us waqt) keh deta to mere liye aise aise qeemti sarmaaya se ziyada mehboob hota.

Hum se Abu-al-Walid Hisham Bin Abdul Malik se bayan kiya, kaha ke hum se Abu Awanah ne bayan kiya, un se Abu Bishr ne, un se Mujahid ne, aur un se Abdullah Bin Umar (Radi Allahu Anhuma) ne ke mein Rasul Allah (Sallallahu Alaihi Wasallam) ki khidmat mein hazir tha. Aap (Sallallahu Alaihi Wasallam) khajoor ka gabha kha rahe thay. Isi waqt Aap (Sallallahu Alaihi Wasallam) ne farmaya ke darakhton mein ek darakht mard-e-momin ki misal hai mere dil mein aaya ke kahoon ke ye khajoor ka darakht hai, lekin hazireen mein, mein hi sab se chhoti umr ka tha (is liye bator-e-adab mein chup raha) phir Aap (Sallallahu Alaihi Wasallam) ne khud hi farmaya ke wo khajoor ka darakht hai
.

Mujh se Ubayd bin Ismail ne byaan kiya , kaha hum se Abu Usamah ne , un se Ubaydullah ne , un se Nafi ne aur un se un ke walid (Abdullah bin Umar razi Allahu anhuma) ne byaan kiya ke hum Rasool Allah salla Allahu alaihi wasallam ki khidmat mein hazir thay , Aap salla Allahu alaihi wasallam ne daryaft farmaya: achha mujh ko batlao to woh kaun sa darakht hai jo Musalman ki manind hai jis ke patte nahi girte , har waqt mewa de jata hai ? Ibn Umar razi Allahu anhuma kehte hain mere dil mein aaya woh khajoor ka darakht hai magar main ne dekha ke Abu Bakr aur Umar razi Allahu anhuma baithe huay hain unhon ne jawab nahi diya to mujh ko in buzurgon ke samne kalam karna achha maloom nahi hua . Jab in logon ne kuch jawab nahi diya to Nabi Karim salla Allahu alaihi wasallam ne khud hi farmaya woh khajoor ka darakht hai . Jab hum is majlis se kharay huay to main ne apne walid Umar razi Allahu anhu se arz kiya: Baba jaan! Allah ki qasam! Mere dil mein aaya tha ke main keh doon woh khajoor ka darakht hai . Unhon ne kaha phir tu ne keh kyun na diya . Main ne kaha Aap logon ne koi baat nahi ki main ne aage barh kar baat karna munasib na jaana . Unhon ne kaha wah agar tu is waqt keh deta to mujh ko itne itne (laal laal oont ka) maal milne se bhi zyada khushi hoti .

Hum se Umar bin Hafs bin Ghiyas ne bayan kiya , kaha hum se hamare walid ne bayan kiya , in se Aamash ne bayan kiya , kaha ke mujh se Mujahid ne bayan kiya aur in se Abdullah bin Umar razi Allahu anhuma ne bayan kiya ke hum Nabi Karim salla Allahu alaihi wasallam ki khidmat mein baithe huay thay ke khajoor ke darakht ka gaabh laya gaya . Nabi Karim salla Allahu alaihi wasallam ne farmaya ke baaz darakht aise hote hain jin ki barkat Musalman ki barkat ki tarah hoti hai . Main ne khayal kiya ke Aap ka isharah khajoor ke darakht ki taraf hai . Main ne soocha ke keh doon ke woh darakht khajoor ka hota hai , ya Rasool Allah! Lekin phir jo main ne murr kar dekha to majlis mein mere alawa nau aadmi aur thay aur main in mein sab se chhota tha . Is liye main khamosh raha phir Aap salla Allahu alaihi wasallam ne farmaya ke woh darakht khajoor ka hai .

Hum se Adam bin Abi Iyas ne bayan kiya, kaha hum se Shubah ne bayan kiya, kaha hum se Muharib bin Disar ne, kaha ke main ne Ibn Umar razi Allahu anha se suna, unhon ne bayan kiya ke Nabi Karim salla Allahu alaihi wasallam ne farmaya ”momin ki misal is sarsabz darakht ki hai, jis ke patte nahi jhartay. Sahabah ne kaha ke yeh falan darakht hai, yeh falan darakht hai. Mere dil mein aaya ke kahoon ke yeh khajoor ka darakht hai lekin kyunke main nau-jawan tha, is liye mujhko bolte huay haya aayi. Phir Nabi Karim salla Allahu alaihi wasallam ne farmaya ke woh khajoor ka darakht hai.“ Aur isi sanad se Shubah se riwayat hai ke kaha hamase Khubaib bin Abd-ur-Rahman ne, in se Hafs bin Aasim ne aur in se Ibn Umar razi Allahu anhuma ne isi tarah bayan kiya aur yeh izafa kiya ke phir main ne is ka zikr Umar razi Allahu anhu se kiya to unhon ne kaha agar tum ne keh diya hota to mujhe itna itna maal milne se bhi zyada khushi haasil hoti.

Hum se Musaddad ne bayan kiya , kaha hum se Yahya bin Kaseer ne bayan kiya , in se Ubaidullah ne kaha ke mujh se Nafi ne bayan kiya aur in se Abdullah bin Umar razi Allahu anhuma ne bayan kiya ke Rasool Allah salla Allahu alaihi wasallam ne farmaya ke mujhe is darakht ka naam batao , jis ki misal Musalman ki si hai . Woh hamesha apne Rabb ke hukm se phal deta hai aur is ke patte nahi jhara karte . Mere dil mein aaya ke keh doon ke woh khajoor ka darakht hai lekin main ne kehna pasand nahi kiya . Kyunke majlis mein hazrat Abu Bakr aur Umar razi Allahu anhuma jaise akabir bhi maujood thay . Phir jab in donon buzurgon ne kuch nahi kaha to Nabi Karim salla Allahu alaihi wasallam ne farmaya ke yeh khajoor ka darakht hai . Jab main apne walid ke saath nikla to main ne arz kiya ke mere dil mein aaya ke keh doon yeh khajoor ka darakht hai , unhon ne kaha phir tum ne kaha kyun nahi ? Agar tum ne keh diya hota meere liye itna maal aur asbab milne se bhi zyada khushi hoti . Ibn Umar razi Allahu anhuma ne bayan kiya ke (main ne arz kiya) sirf is wajah se main ne nahi kaha ke jab main ne Aap ko aur Abu Bakr razi Allahu anhu jaise buzurg ko khamosh dekha to main ne Aap buzurgon ke samne baat karna bura jaana .