Hum se Hajjaj bin Minhal ne byaan kiya , kaha hum se Hammam bin Yahya ne , un se Qatadah ne , un se Abu Ghalib Yunus bin Jubayr ne ke main ne Ibn Umar razi Allahu anhuma se arz kiya: ek shakhs ne apni biwi ko is waqt talaq di jab woh haiza thi (is ka kya hukum ?) is par unhon ne kaha tum Ibn Umar razi Allahu anhuma ko jaante ho ? Ibn Umar razi Allahu anhuma ne apni biwi ko is waqt talaq di thi jab woh haiza thien . Phir Umar razi Allahu anhu Nabi Karim salla Allahu alaihi wasallam ki khidmat mein hazir huay , is ke mutalliq Aap se poocha . Nabi Karim salla Allahu alaihi wasallam ne unhein hukm diya ke (Ibn Umar is waqt apni biwi se) ruju kar lein , phir jab woh haiz se paak ho jayein to is waqt agar Ibn Umar chahein , unhein talaq dein . Main ne arz kiya: kya isay bhi Nabi Karim salla Allahu alaihi wasallam ne talaq shumar kiya tha ? Ibn Umar razi Allahu anhuma ne kaha agar koi aajiz hai aur hamaqat ka saboot de to is ka ilaaj hai .

Hum se Yahya bin Bukayr ne byaan kiya, kaha hum se Layth bin Saad ne byaan kiya, kaha ke mujh se Aqeel ne byaan kiya, un se Ibn Shihab ne byaan kiya, kaha mujh ko Salim ne khabar di aur unhein Abdullah bin Umar razi Allahu anhuma ne khabar di ke unhon ne apni biwi Aaminah bint Ghaffar ko jabke woh haiza thien talaq de di. Umar razi Allahu anhu ne Rasool Allah salla Allahu alaihi wasallam se is ka zikr kiya. Aap is par bahut ghussa huay aur farmaya ke woh un se (apni biwi se) ruju kar lein aur apne nikah mein rakhein yahan tak ke woh mahwari se paak ho jaye phir mahwari aaye aur phir woh is se paak ho, ab agar woh talaq dena munasib samjhein to is ki paaki (tuhr) ke zamana mein un ke saath hum-bistari se pehle talaq de sakte hain bas yahi woh waqt hai jis mein Allah Ta'ala ne (mardon ko) hukm kiya hai ke is mein yani halat e tuhr mein talaq dein.

Hum se Sulayman bin Harb ne byaan kiya, kaha hum se Shubah ne, in se Anas bin Sireen ne, kaha ke main ne Ibn Umar razi Allahu anhuma se suna, unhon ne kaha ke Ibn Umar razi Allahu anhuma ne apni biwi ko halat e haiz mein talaq de di. Phir Umar razi Allahu anhu ne is ka zikr Nabi Karim salla Allahu alaihi wasallam se kiya, Nabi Karim salla Allahu alaihi wasallam ne is par farmaya ke chahiye ke ruju kar lein. (Anas razi Allahu anhu ne byaan kiya ke) main ne Ibn Umar razi Allahu anhuma se poocha ke kya yeh talaq, talaq samjhi jaye gi? Unhon ne kaha ke chup reh. Phir kiya samjhi jaye gi? Aur Qatadah ne byaan kiya, in se Yunus bin Jubayr ne aur in se Ibn Umar razi Allahu anhuma ne byaan kiya (ke Nabi Karim salla Allahu alaihi wasallam ne Ibn Umar razi Allahu anhuma se) farmaya ke usay hukm do ke ruju kar le (Yunus bin Jubayr ne byaan kiya ke) main ne poocha, kiya yeh talaq talaq samjhi jaye gi? Ibn Umar razi Allahu anhuma ne kaha tu kiya samajhta hai agar koi kisi farz ke ada karne se aajiz ban jaye ya ahmaq ho jaye. To woh farz is ke zimme se saqit ho jaye ga? Hargiz nahi.

Imam Bukhari rahmahullah ne kaha aur Abu Mamar Abdullah bin Amr Manqari ne kaha (ya hamain se byaan kiya) kaha hum se Abdul Waris bin Saeed ne, kaha hum se Ayub Sakhtiyani ne, unhon ne Saeed bin Jubayr se, unhon ne Ibn Umar razi Allahu anhuma ne, unhon ne kaha yeh talaq jo main ne haiz mein di ku mujh par shumar ki gayi.

Hum se Qutaybah ne byaan kiya , kaha hum se Layth bin Saad ne byaan kiya , in se Nafi ne aur un se Ibn Umar bin Khattab razi Allahu anhuma ne ke unhon ne apni biwi ko ek talaq di to is waqt woh haiza thien . Rasool Allah salla Allahu alaihi wasallam ne un ko hukm diya ke ruju kar lein aur unhein is waqt tak apne saath rakhein jab tak woh is haiz se paak hone ke baad phir dobara haiza na hon . Is waqt bhi in se koi ta-arruz na karein aur jab woh is haiz se bhi paak ho jayein to agar is waqt unhein talaq dene ka irada ho to tuhr mein is se pehle ke in se hum-bistari karein , talaq dein . Pas yahi woh waqt hai jis ke mutalliq Allah Ta'ala ne hukm diya hai ke is mein auraton ko talaq di jaye aur Abdullah bin Umar razi Allahu anhuma se agar is ke (mutallaqa salasa ke) baare mein sawal kiya jata to sawal karne wale se woh kehte ke agar tum ne teen talaqein de di hain to phir tumhari biwi tum par haram hai . Yahan tak ke woh tumhare siwa doosre shohar se nikah kare . «ghayru Qutaybah» (Abu al-Jahm) ke is hadees mein Layth se yeh izafa kiya hai ke (unhon ne byaan kiya ke) mujh se Nafi ne byaan kiya aur in se Ibn Umar razi Allahu anhuma ne kaha ke agar tum ne apni biwi ko ek ya do talaq de di ho . (to tum usay dobara apne nikah mein la sakte ho) kyunke Nabi Karim salla Allahu alaihi wasallam ne mujhko is ka hukm diya tha .

`Hum se Hajjaj ne bayan kiya, kaha hum se Yazid bin Ibrahim ne bayan kiya, kaha hum se Muhammad bin Sireen ne bayan kiya, kaha mujh se Yunus bin Jubair ne bayan kiya ke mein ne Ibn Umar Radi Allahu Anhuma se poocha to unhon ne batlaya ke Ibn Umar Radi Allahu Anhuma ne apni biwi ko talaq de di, is waqt wo haiza theen. Phir Umar Radi Allahu Anhu ne is ke mutalliq Nabi Kareem صلی اللہ علیہ وسلم se poocha to Nabi Kareem صلی اللہ علیہ وسلم ne hukm diya ke Ibn Umar apni biwi se ruju kar lein. Phir jab talaq ka sahih waqt aaye to talaq dein (Yunus bin Jubair ne bayan kiya ke Ibn Umar Radi Allahu Anhuma se) mein ne poocha ke kya is talaq ka bhi shumar hua tha? Unhon ne batlaya ke agar koi talaq dene wala shara ke ahkam baja lane se aajiz ho ya ahmaq be-waqoof ho (to kya talaq nahi pade gi?).

`Hum se Muhammad bin Abi Yaqub al-Kirmani ne bayan kiya, unhon ne kaha hum se Hassan bin Ibrahim ne bayan kiya, unhon ne kaha hum se Yunus ne bayan kiya, Muhammad ne bayan kiya ke mujhe Salim ne khabar di, unhein Abdullah bin Umar Radi Allahu Anhuma ne khabar di ke unhon ne apni biwi ko jab ke wo haalat-e-haiz mein theen (Aamna bint Ghaffar) talaq de di, phir Umar Radi Allahu Anhu ne is ka tazkira Nabi Kareem صلی اللہ علیہ وسلم se kiya to Aap bahut khafa hue phir farmaya ”Unhein chahiye ke wo ruju kar lein aur unhein apne paas rakkhein, yahan tak ke jab wo paak ho jayein phir haiza hon aur phir paak hon tab agar chahe to ise talaq dede.“