Hum se Abdullah bin Zubayr Humaydi ne byaan kiya, kaha hum se Waleed bin Muslim ne byaan kiya, kaha hum se Imam Awzai ne byaan kiya, kaha ke main ne Zuhri se poocha ke Rasool Allah salla Allahu alaihi wasallam ki kis biwi ne Nabi Karim salla Allahu alaihi wasallam se panah maangi thi? Unhon ne byaan kiya ke mujhe Urwah bin Zubayr ne khabar di aur unhein Aisha razi Allahu anha ne ke Jawn ki beti (Umaymah ya Asmaa) jab Nabi Karim salla Allahu alaihi wasallam ke yahan (nikah ke baad) layi gayin aur Nabi Karim salla Allahu alaihi wasallam in ke paas gaye to us ne yeh keh diya ke main tum se Allah ki panah maangti hoon. Nabi Karim salla Allahu alaihi wasallam ne is par farmaya ke tum ne bahut bari cheez se panah maangi hai, apne maike chali jao. Abu Abdullah Imam Bukhari rahmahullah ne is hadees ko Hajjaj bin Yusuf bin Abi Manee se, us ne bhi apne dada Abu Manee (Ubaidullah bin Abi Ziyad) se, unhon ne Zuhri se, unhon ne Urwah se, unhon ne Aisha razi Allahu anha se riwayat kiya hai.

Hum se Abu Nuaym Fadl bin Dukain ne byaan kiya , unhon ne kaha hum se Abdur Rahman bin Ghaseel ne byaan kiya , un se Hamzah bin Abi Usayd ne aur un se Abu Usayd razi Allahu anhu ne byaan kiya ke Nabi Karim salla Allahu alaihi wasallam ke saath bahar nikle aur ek bagh mein pahunche jis ka naam ”Shawt“ tha . Jab wahan ja kar aur baghon ke darmiyan pahunche to baith gaye . Nabi Karim salla Allahu alaihi wasallam ne farmaya ke tum log yahien baitho , phir bagh mein gaye , Jawnia layi ja chuki thien aur unhein khajoor ke ek ghar mein utara . Is ka naam Umayma bint Numan bin Sharahil tha . Un ke saath ek daya bhi un ki dekh-bhaal ke liye thi . Jab Nabi Karim salla Allahu alaihi wasallam un ke paas gaye to farmaya ke apne aap ko mere hawale kar de . Us ne kaha kya koi shehzadi kisi aam aadmi ke liye apne aap ko hawala kar sakti hai ? Byaan kiya ke is par Nabi Karim salla Allahu alaihi wasallam ne apna shafqat ka hath un ki taraf barha kar is ke sar par rakkha to us ne kaha ke main tum se Allah ki panah maangti hoon . Nabi Karim salla Allahu alaihi wasallam ne farmaya ke tum ne isi se panah maangi jis se panah maangi jati hai . Is ke baad Nabi Karim salla Allahu alaihi wasallam bahar hamare paas tashreef laye aur farmaya ke Abu Usayd! Isay do Razqiya kapre pehna kar isay is ke ghar pahuncha aao .

Aur Husain bin al-Waleed Naisapuri ne byaan kiya ke un se Abdur Rahman ne , un se Abbas bin Sahl ne , un se un ke walid (Sahl bin Saad) aur Abu Usayd razi Allahu anhu ne kaha ke Rasool Allah salla Allahu alaihi wasallam ne Umayma bint Sharahil se nikah kiya tha , phir jab woh Nabi Karim salla Allahu alaihi wasallam ke yahan layi gayin . Nabi Karim salla Allahu alaihi wasallam ne un ki taraf hath barhaya jise us ne napasand kiya . Is liye Nabi Karim salla Allahu alaihi wasallam ne Abu Usayd razi Allahu anhu se farmaya ke un ka saman kar dein aur Razqiya ke do kapre unhein pehnne ke liye de dein .

Aur Husain bin al-Waleed Naisapuri ne byaan kiya ke un se Abdur Rahman ne , un se Abbas bin Sahl ne , un se un ke walid (Sahl bin Saad) aur Abu Usayd razi Allahu anhu ne kaha ke Rasool Allah salla Allahu alaihi wasallam ne Umayma bint Sharahil se nikah kiya tha , phir jab woh Nabi Karim salla Allahu alaihi wasallam ke yahan layi gayin . Nabi Karim salla Allahu alaihi wasallam ne un ki taraf hath barhaya jise us ne napasand kiya . Is liye Nabi Karim salla Allahu alaihi wasallam ne Abu Usayd razi Allahu anhu se farmaya ke un ka saman kar dein aur Razqiya ke do kapre unhein pehnne ke liye de dein .

Hum se Hajjaj bin Minhal ne byaan kiya , kaha hum se Hammam bin Yahya ne , un se Qatadah ne , un se Abu Ghalib Yunus bin Jubayr ne ke main ne Ibn Umar razi Allahu anhuma se arz kiya: ek shakhs ne apni biwi ko is waqt talaq di jab woh haiza thi (is ka kya hukum ?) is par unhon ne kaha tum Ibn Umar razi Allahu anhuma ko jaante ho ? Ibn Umar razi Allahu anhuma ne apni biwi ko is waqt talaq di thi jab woh haiza thien . Phir Umar razi Allahu anhu Nabi Karim salla Allahu alaihi wasallam ki khidmat mein hazir huay , is ke mutalliq Aap se poocha . Nabi Karim salla Allahu alaihi wasallam ne unhein hukm diya ke (Ibn Umar is waqt apni biwi se) ruju kar lein , phir jab woh haiz se paak ho jayein to is waqt agar Ibn Umar chahein , unhein talaq dein . Main ne arz kiya: kya isay bhi Nabi Karim salla Allahu alaihi wasallam ne talaq shumar kiya tha ? Ibn Umar razi Allahu anhuma ne kaha agar koi aajiz hai aur hamaqat ka saboot de to is ka ilaaj hai .