Hum se Abu Aasim ne byaan kiya , in se Ibn Jurayj ne (doosri sanad) Imam Bukhari rahmahullah ne kaha aur mujh se Muhammad bin Muqatil ne byaan kiya , kaha hum ko Abdullah bin Mubarak ne khabar di , unhein Ibn Jurayj ne khabar di , kaha ke mujhe Yahya bin Abdullah bin Sayfi ne khabar di , unhein Ikrimah bin Abdur Rahman bin Haris ne khabar di aur unhein Umm Salamah razi Allahu anha ne khabar di ke Nabi Karim salla Allahu alaihi wasallam ne (ek waqia ki wajah se) qasam khayi ke apni baaz azwaj ke yahan ek mahina tak nahi jayein ge . Phir jab untees din guzar gaye to Nabi Karim salla Allahu alaihi wasallam in ke paas subah ke waqt gaye ya shaam ke waqt Nabi Karim salla Allahu alaihi wasallam se arz kiya gaya ke Aap ne to qasam khayi ku ke ek mahina tak nahi aayein ge ? Aap ne farmaya ke mahina untees din ka bhi hota hai .

Hum se Maaz bin Fadhalah ne byaan kiya ‘ unhon ne kaha ke hum se Abu Amru Hafs bin Maisarah ne byaan kiya ‘ un se Zaid bin Aslam ne byaan kiya ‘ un se Iyadh bin Abdullah bin Saad ne ‘ un se Abu Saeed Khudri razi Allahu anhu ne byaan kiya ke hum Nabi Karim salla Allahu alaihi wasallam ke zamana mein Eid-ul-Fitr ke din (khane ke ghalla se) ek saa' nikalte thay . Abu Saeed razi Allahu anhu ne byaan kiya ke hamara khana (in dino) jau , zabeeib , paneer aur khajoor tha .

Hum se Abu-al-Walid ne bayan kiya, kaha hum se Shuba ne bayan kiya, un se Jabala Bin Suhaim ne bayan kiya, ke mein ne Ibn Umar (Radi Allahu Anhuma) se suna, unhon ne bayan kiya ke Rasul Allah (Sallallahu Alaihi Wasallam) ne farmaya mahina itne dinon aur itne dinon ka hota hai. Teesri martaba kehte hue Aap (Sallallahu Alaihi Wasallam) ne anghoothe ko daba liya
.

Hum se Abu Asim ne bayan kiya, un se Ibn Juraij ne bayan kiya, un se Yahya Bin Abdullah Bin Saifi ne, un se Ikrima Bin Abdur Rahman ne aur un se Umm-e-Salma (Radi Allahu Anha) ne ke Nabi Kareem (Sallallahu Alaihi Wasallam) apni azwaj se ek mahine tak juda rahe phir untees din poore ho gaye to subah ke waqt ya sham ke waqt Aap (Sallallahu Alaihi Wasallam) un ke paas tashreef le gaye is par kisi ne kaha aap ne to ahd kiya tha ke aap (Sallallahu Alaihi Wasallam) ek mahine tak un ke yahan tashreef nahi le jayein ge to Nabi Kareem (Sallallahu Alaihi Wasallam) ne farmaya ke mahina untees din ka bhi hota hai
.

Hum se Abdul Aziz Bin Abdullah ne bayan kiya, kaha hum se Suleiman Bin Bilal ne, un se Humaid ne aur un se Anas (Radi Allahu Anhu) ne bayan kiya ke Rasul Allah (Sallallahu Alaihi Wasallam) apni biwiyon se juda rahe thay, Aap (Sallallahu Alaihi Wasallam) ke paon mein moch aa gayi thi to Aap (Sallallahu Alaihi Wasallam) ne balakhana mein untees din qayam kiya tha, phir wahan se utre. Logon ne arz kiya ya Rasul Allah! Aap (Sallallahu Alaihi Wasallam) ne ek mahine ka eela kiya tha. Jawab mein aap ne farmaya ke mahina untees din ka bhi hota hai
.

Hum se Khalid bin Makhlad ne byaan kiya , unhon ne kaha hum se Sulayman ne byaan kiya , unhon ne kaha ke mujh se Humayd ne byaan kiya aur in se Anas razi Allahu anhu ne byaan kiya ke Rasool Allah salla Allahu alaihi wasallam apni azwaj e mutahharat se ek mahina tak alag rahe aur apne ek balakhana mein qiyam kiya . Phir Aap untees din ke baad ghar mein tashreef laye to kaha gaya ke ya Rasool Allah! Aap ne to ek mahina ke liye ahad kiya tha Nabi Karim salla Allahu alaihi wasallam ne farmaya ke yeh mahina untees (29) ka hai .

Hum se Ismail bin Abi Oways ne byaan kiya , in se un ke bhai Abdul Hameed ne , in se sulyaman bin Bilal ne , in se Humayd Taweel ne ke unhon ne Anas bin Malik razi Allahu anhu se suna , unhon ne byaan kiya ke Rasool Allah salla Allahu alaihi wasallam ne apni azwaj e mutahharat se eila kiya tha . Nabi Karim salla Allahu alaihi wasallam ke paon mein moch aa gayi thi . Is liye Aap salla Allahu alaihi wasallam ne apne bala-khana mein untees din tak qiyam farmaya , phir Aap wahan se utre . Logon ne kaha ke ya Rasool Allah! Aap ne ek mahina ka eila kiya tha . Nabi Karim salla Allahu alaihi wasallam ne farmaya ke mahina untees din ka bhi hota hai .

Hum se Adam ne byaan kiya , kaha hum se Shubah ne byaan kiya , kaha hum se Jabalah bin Suhaim ne byaan kiya , unhon ne Ibn Umar razi Allahu anhuma se suna , unhon ne byaan kiya ke Nabi Karim salla Allahu alaihi wasallam ne farmaya ke mahina itne , itne aur itne dinon ka hota hai . Aap ki murad tees din se thi . Phir farmaya aur itne , itne aur itne dinon ka bhi hota hai . Aap ka isharah untees dinon ki taraf tha . Ek martaba Aap salla Allahu alaihi wasallam ne tees ki taraf isharah kiya aur doosri martaba untees ki taraf .

Hum se Abd-ul-Aziz bin Abdullah ne bayan kiya, kaha hum se Sulayman bin Bilal ne bayan kiya, in se Humayd ne aur in se Anas razi Allahu anhu ne bayan kiya ke Rasool Allah salla Allahu alaihi wasallam ne apni biwiyon ke saath Eela kiya (yani qasam khayi ke Aap in ke yahan ek mahina tak nahi jayein ge) aur Nabi Karim salla Allahu alaihi wasallam ke paon mein moach aa gayi thi. Chunanche Nabi Karim salla Allahu alaihi wasallam apne baala-khana mein unatees din tak qiyam-pazir rahe phir wahan se utre, logon ne kaha ya Rasool Allah! Aap ne Eela ek mahine ke liye kiya tha? Nabi Karim salla Allahu alaihi wasallam ne farmaya ke yeh mahina unatees din ka hai.