Hum se Umar bin Hafs ne byaan kiya , kaha hum se hamare walid ne byaan kiya , un se Aamash ne byaan kiya , kaha ke mujh se Ibrahim ne byaan kiya , un se Alqamah aur Abdur Rahman bin Yazid ne aur un se Abu Masood Ansari razi Allahu anhu ne byaan kiya ke Nabi Karim salla Allahu alaihi wasallam ne farmaya ke Surah al-Baqarah ke aakhir ki do aayaton ko jo shakhs raat mein parh le ga woh is ke liye kafi hon gi .

Hum se Musa Bin Ismail ne bayan kiya, hum se Abu Awana ne bayan kiya, un se Amash, un se Ibrahim Nakhi, un se Abdur Rahman Bin Yezid Nakhi, un se Alqamah Bin Yas'i aur un se Abu Masood Badri Radi Allahu Anhu ne bayan kiya ke Rasul Allah Sallallahu Alaihi Wasallam ne farmaya ke Surah-al-Baqarah ki do aayatein ( «Aamanar-rasoolu» se aakhir tak) aaisi hain ke jo shakhs raat mein unhein parh le wo is ke liye kafi ho jati hain. Abdur Rahman ne bayan kiya ke phir mein ne khud Abu Masood Radi Allahu Anhu se mulaqat ki, wo is waqt Baitullah ka tawaf kar rahe thay. Mein ne un se is hadees ke mutaliq poocha to unhon ne ye hadees mujh se bayan ki
.

Aur Usman bin Haizam ne kaha ke hum se Auf bin Abi Jameelah ne byaan kiya, un se Muhammad bin Sireen ne aur un se Abu Hurairah razi Allahu anhu ne byaan kiya ke Rasool Allah salla Allahu alaihi wasallam ne mujhe sadqa e fitr ki hifazat par muqarrar farmaya. Phir ek shakhs aaya aur donon hathon se (khajoorein) samaitne laga. Main ne usay pakar liya aur kaha ke main tujhe Rasool Allah salla Allahu alaihi wasallam ki khidmat mein pesh karoon ga. Phir unhon ne yeh poora qissa byaan kiya (mufassal hadees is se pehle Kitab-ul-Wakala mein guzar chuki hai) (jo sadqa e fitr churane aaya tha) us ne kaha ke jab tum raat ko apne bistar par sone ke liye jao to Ayat-ul-Kursi parh liya karo, phir subah tak Allah Ta'ala ki taraf se tumhari hifazat karne wala ek farishta muqarrar ho jaye ga aur Shaytan tumhare paas bhi na aa sake ga. (Abu Hurairah razi Allahu anhu ne yeh baat Aap se byaan ki to) Nabi Karim salla Allahu alaihi wasallam ne farmaya us ne tumhein yeh theek baat batayi hai agarchay woh bara jhoota hai, woh Shaytan thu.