Hum se Muhammad bin Kaseer ne byaan kiya, kaha hum ko Shubah ne khabar di, unhein Sulayman bin Mehran ne, unhein Ibrahim Nakhai ne, unhein Abdur Rahman bin Yazid ne, unhein Abu Masood Ansari razi Allahu anhu ne ke Nabi Karim salla Allahu alaihi wasallam ne farmaya ke (Surah al-Baqarah mein se) jis ne bhi do aakhri aayatein parhien. (doosri sanad agli hadees dekhein).

Aur hum se Abu Naeem ne byaan kiya, kaha hum se Sufyan bin Uyaynah ne byaan kiya, un se Mansoor bin Mutamir ne, un se Ibrahim Nakhai ne, un se Abdur Rahman bin Yazid ne aur un se Abu Masood razi Allahu anhu ne byaan kiya ke Rasool Allah salla Allahu alaihi wasallam ne farmaya ke jis ne Surah al-Baqarah ki do aakhri aayatein raat mein parh lien woh usay har aafat se bachane ke liye kafi ho jayein gi.

Aur Usman bin Haizam ne kaha ke hum se Auf bin Abi Jameelah ne byaan kiya, un se Muhammad bin Sireen ne aur un se Abu Hurairah razi Allahu anhu ne byaan kiya ke Rasool Allah salla Allahu alaihi wasallam ne mujhe sadqa e fitr ki hifazat par muqarrar farmaya. Phir ek shakhs aaya aur donon hathon se (khajoorein) samaitne laga. Main ne usay pakar liya aur kaha ke main tujhe Rasool Allah salla Allahu alaihi wasallam ki khidmat mein pesh karoon ga. Phir unhon ne yeh poora qissa byaan kiya (mufassal hadees is se pehle Kitab-ul-Wakala mein guzar chuki hai) (jo sadqa e fitr churane aaya tha) us ne kaha ke jab tum raat ko apne bistar par sone ke liye jao to Ayat-ul-Kursi parh liya karo, phir subah tak Allah Ta'ala ki taraf se tumhari hifazat karne wala ek farishta muqarrar ho jaye ga aur Shaytan tumhare paas bhi na aa sake ga. (Abu Hurairah razi Allahu anhu ne yeh baat Aap se byaan ki to) Nabi Karim salla Allahu alaihi wasallam ne farmaya us ne tumhein yeh theek baat batayi hai agarchay woh bara jhoota hai, woh Shaytan thu.