Hum se Musaddad bin Musarhad ne byaan kiya , kaha hum se Yahya bin Saeed ne , un se Humayd Taweel ne aur un se Anas bin Malik razi Allahu anhu ne byaan kiya ke Umar razi Allahu anhu farmaya , teen mawaqe par Allah Ta'ala ke nazil hone wale hukm se meri rai ne pehle hi muwafaqat ki ya mere Rabb ne teen mawaqe par meri rai ke muwafiq hukm nazil farmaya . Main ne arz kiya tha ke ya Rasool Allah! Kya achha hota ke Aap Maqam e Ibrahim ko tawaf ke baad namaz parhne ki jagah banate to baad mein yahi aayat nazil hui . Aur main ne arz kiya tha ke ya Rasool Allah! Aap ke ghar mein achhe aur bure har tarah ke log aate hain . Kya achha hota ke Aap Ummahat al-Momineen ko parda ka hukm de dete . Is par Allah Ta'ala ne aayat e hijab (parda ki aayat) nazil farmayi aur unhon ne byaan kiya aur mujhe baaz azwaj e mutahharat se Nabi Karim salla Allahu alaihi wasallam ki khafgi ki khabar mili . Main ne un ke yahan gaya aur un se kaha ke tum baaz aa jao , warna Allah Ta'ala tum se behtar biwiyan Nabi Karim salla Allahu alaihi wasallam ke liye badal de ga . Baad mein azwaj e mutahharat mein se ek ke haan gaya to woh mujh se kehne lagein ke Umar! Rasool Allah salla Allahu alaihi wasallam to apni azwaj ko itni nasihaten nahi karte jitni tum unhein karte rehte ho . Aakhir Allah Ta'ala ne yeh aayat nazil ki «asa rabbuhu in tallaqakunna an yubdilahu azwajan khayran minkunna muslimatin» ”koi tajub na hona chahiye agar is Nabi ka Rabb tumhein talaq dila de aur doosri Musalman biwiyan tum se behtar badal de .“ Aakhir aayat tak . Aur Ibn Abi Maryam ne byaan kiya , unhein Yahya bin Ayub ne khabar di , un se Humayd ne byaan kiya aur unhon ne Anas razi Allahu anhu se suna , unhon ne Umar razi Allahu anhu se naqal kiya .

Hum se Abul Yamaan ne bayan kiya, unhein Sho’aib ne Zohri se khabar di (ek doosri sanad se) Imam Bukhari Rahimahullah kehte hain ke Ibn-e-Wahb ko Younus ne Ibn-e-Shihaab se khabar di, woh Ubaidullah bin Abdullah Ibn-e-Abi Thaur se naql karte hain, woh Abdullah bin Abbas Radhiallahu Anhuma se, woh Umar Radhiallahu Anhu se riwayat karte hain ke main aur mera ek ansaari padosi dono atraaf-e-Madinah ke ek gaaon Bani Umaiyah bin Zaid mein rehte the jo Madinah ke (poorab ki taraf) baland gaaon mein se hai. Hum dono baari baari Nabi Kareem Sallallahu Alaihi Wasallam ki khidmat shareef mein haazir huwa karte the. Ek din woh aata, ek din main aata. Jis din main aata us din ki Wahi ki aur (Rasoolullah Sallallahu Alaihi Wasallam ki farmoodah) deegar baaton ki us ko khabar de deta tha aur jab woh aata tha to woh bhi isi tarah karta. To ek din woh mera ansaari saathi apni baari ke roz haazir-e-khidmat huwa (jab waapas aaya) to us ne mera darwaaza bahut zor se khatkhataaya aur (mere baare mein poocha ke) kya Umar yahan hain? Main ghabra kar us ke paas aaya. Woh kehne laga ke ek bada mu’aamla pesh aa gaya hai. (Yani Rasoolullah Sallallahu Alaihi Wasallam ne apni biwiyon ko talaaq de di hai) phir main (apni beti) Hafsa ke paas gaya, woh ro rahi thi. Main ne poocha, kya tumhein Rasoolullah Sallallahu Alaihi Wasallam ne talaaq de di hai? Woh kehne lagi main nahi jaanti. Phir main Nabi Kareem Sallallahu Alaihi Wasallam ki khidmat mein haazir huwa. Main ne khade khade kaha ke kya Aap (Sallallahu Alaihi Wasallam) ne apni biwiyon ko talaaq de di hai? Aap Sallallahu Alaihi Wasallam ne farmaaya nahi. (Yeh afwaah ghalat hai) tab main ne (ta’jjub se) kaha «Allahu Akbar» Allah bahut bada hai.

Hum se Amr bin Aun ne bayan kiya, kaha hum se Hushaim ne Humaid ke wasita se, unhon ne Anas bin Malik Razi Allah Anhu ke wasita se ke Umar Razi Allah Anhu ne farmaya ke meri teen baaton mein jo mere munh se nikla mere Rabb ne waisa hi hukm farmaya. Main ne kaha tha ke Ya Rasool Allah! Agar hum Maqam-e-Ibrahim ko namaz padhne ki jagah bana sakte to accha hota. Is par yeh ayat nazil hui. ” Aur tum Maqam-e-Ibrahim ko namaz padhne ki jagah bana lo “ doosri ayat parda ke baare mein hai. Main ne kaha tha ke Ya Rasool Allah kaash! Aap apni auraton ko parda ka hukm dete, kyunke un se acche aur bure har tarah ke log baat karte hain. Is par parda ki ayat nazil hui aur ek martaba Nabi Kareem Sallallahu Alaihi Wasallam ki biwiyan josh o kharoash mein Aap ki khidmat mein ittifaq kar ke kuch mutalbat le kar hazir huein. Main ne un se kaha ke ho sakta hai ke Allah Paak tumhe talaq dila dein aur tumhare badle tum se behtar muslima biwiyan apne Rasool Sallallahu Alaihi Wasallam ko inayat karein, to yeh ayat nazil hui «asa Rabbuhu in tallaqakunna an yubdilahu azwajan khayran minkunna» aur Saeed Ibn Abi Maryam ne kaha ke mujhe Yahya bin Ayyub ne khabar di, kaha ke hum se Humaid ne bayan kiya, kaha main ne Anas Razi Allah Anhu se yeh hadees suni.

Hum se Muhammad Bin Salam Bikandi ne bayan kiya, kaha hum se Marwan Bin Muawiyah Fazari ne bayan kiya, un se Humaid Taweel ne aur un se Anas (Radi Allahu Anhu) ne bayan kiya ke Rasul Allah (Sallallahu Alaihi Wasallam) ne apni azwaj ke paas ek mahina tak na jane ki qasam khayi thi, aur (Eila ke waqia se pehle 5 Hijri mein) Aap (Sallallahu Alaihi Wasallam) ke qadam mubarak mein moch aa gayi thi. Aur Aap (Sallallahu Alaihi Wasallam) apne bala khana mein qayam pazeer hue thay. (Eila ke mauqe par) Umar (Radi Allahu Anhu) aaye aur arz kiya, Ya Rasul Allah! kya aap ne apni biwiyon ko talaq day di hai ? Aap (Sallallahu Alaihi Wasallam) ne farmaya ke nahi. Albatta ek mahine ke liye in ke paas na jane ki qasam kha li hai. Chunanche Aap (Sallallahu Alaihi Wasallam) unatees din tak biwiyon ke paas nahi gaye (aur unatees tareekh ko hi chand ho gaya tha) is liye Aap (Sallallahu Alaihi Wasallam) bala-khane se utre aur biwiyon ke paas gaye
.

Hum se Amr bin Aun ne byaan kiya, kaha hum se Hushaym ne byaan kiya, un se Humayd ne aur un se Anas razi Allahu anhu ne byaan kiya ke Umar razi Allahu anhu ne kaha Nabi Karim salla Allahu alaihi wasallam ki azwaj Nabi Karim salla Allahu alaihi wasallam ko ghairat dilane ke liye jama ho gayin to main ne un se kaha agar Nabi salla Allahu alaihi wasallam talaq de dein to un ka Parvardigar tumhare badle mein unhein tum se behtar biwiyan de-de ga. Chunanche yeh aayat nazil hui «asa rabbuhu in tallaqakunna» aakhir tak.

Hum se Ali bin Abdullah ne byaan kiya , kaha hum se Marwan bin Muawiyah ne , kaha hum se Abu Yafoor ne byaan kiya , kaha ke hum se Abu al-Duha ki majlis mein (mahine par) bahas ki to unhon ne byaan kiya ke hum se Ibn Abbas razi Allahu anhuma ne byaan kiya , unhon ne kaha ke ek din subah hui to Nabi Karim salla Allahu alaihi wasallam ki azwaj ro rahi thien , har zauja mutahhara ke paas un ke ghar wale maujood thay . Masjid ki taraf gaya to woh bhi logon se bhari hui ku . Phir Umar bin Khattab razi Allahu anhu aaye aur Nabi Karim salla Allahu alaihi wasallam ki khidmat mein oopar gaye to Nabi Karim salla Allahu alaihi wasallam is waqt ek kamrah mein tashreef rakhte thay . Unhon ne salam kiya lekin kisi ne jawab nahi diya . Unhon ne phir salam kiya lekin kisi ne jawab nahi diya . Phir salam kiya aur is martaba bhi kisi ne jawab nahi diya . To aawaz di (baad mein ijazat milne par) Nabi Karim salla Allahu alaihi wasallam ki khidmat mein gaye aur arz kiya: kiya Aap ne apni azwaj ko talaq de di hai ? Nabi Karim salla Allahu alaihi wasallam ne farmaya ke nahi balkay ek mahina tak in se alag rehne ki qasam khayi hai . Chunanche Nabi Karim salla Allahu alaihi wasallam untees din tak alag rahe aur phir apne biwiyon ke paas gaye .

`Hum se Abdul Aziz bin Abdullah ne bayan kiya, kaha hum se Sulaiman bin Bilal ne bayan kiya, un se Yahya ne, un se Ubaid bin Hunain ne, unhon ne Ibn Abbas Radi Allahu Anhuma se suna aur un se Umar Radi Allahu Anhu ne bayan kiya ke mein hazir hua to Rasul Allah صلی اللہ علیہ وسلم apne bala-khana mein tashreef rakhte thay aur Aap ka ek kala gulam seedhi ke oopar (nigrani kar raha) tha mein ne us se kaha ke kaho ke Umar bin Khattab khada hai aur ijazat chahta hai.