Hum se Abdullah bin Maslama ne bayan kiya , unhon ne Malik ke wastay se , unhon ne Ibn Shihab se , unhon ne Saeed bin Musayyab se , unhon ne Abu Hurairah raziyallahu anhu se ke Rasool Allah salla Allahu alaihi wa sallam ne farmaya , yahoodiyon par Allah ki lanat ho unhon ne apne anbiya ki qabron ko masajid bana liya .

Hum se Abul Yaman ne bayan kiya , unhon ne kaha hum ko Shoaib ne khabar di Zuhri se , unhon ne kaha ke mujhe Ubaidullah bin Abdullah bin Utba ne khabar di ke Aisha aur Abdullah bin Abbas raziyallahu anhum ne bayan kiya ke jab Nabi Karim salla Allahu alaihi wa sallam marz al-wafat mein mubtala hue to aap salla Allahu alaihi wa sallam apni chadar ko bar bar chehray par daalte . Jab kuch afaqa hota to apne mubarak chehray se chadar hata dete . Aap salla Allahu alaihi wa sallam ne isi iztirab wa pareshani ki halat mein farmaya , yahood wa nasara par Allah ki phitkar ho ke unhon ne apne anbiya ki qabron ko masjid bana liya . Aap salla Allahu alaihi wa sallam yeh farma kar ummat ko aise kamon se darate thay .

Hum se Ubaydullah bin Musa ne byaan kiya ‘ un se Shayban ne ‘ un se Hilal Wazan ne ‘ un se Urwah ne aur un se Aisha razi Allahu anha ne ke Nabi Karim salla Allahu alaihi wasallam ne apne marz-e-wafat mein farmaya ke Yahud aur Nasara par Allah ki laanat ho ke unhon ne apne anbiya ki qabron ko masajid bana liya . Aisha razi Allahu anha ne kaha ke agar aisa dar na hota to Aap salla Allahu alaihi wasallam ki qabr khuli rehti (aur hujre mein na hoti) kyonke mujhe dar is ka hai ke kahin Aap salla Allahu alaihi wasallam ki qabr bhi masjid na bana li jaye .

Hum se Musa bin Ismail ne byaan kiya ‘ unhon ne kaha ke hum se Abu Awanah ne byaan kiya ‘ un se Hilal bin Humaid ne ‘ un se Urwah ne aur un se Umm-ul-Moomineen Aisha razi Allahu anha ne ke Nabi Karim salla Allahu alaihi wasallam ne apne is marad ke mauqe par farmaya tha jis se Aap salla Allahu alaihi wasallam jaanbar na ho sake thay ke Allah Ta'ala ki Yahud o Nasara par lanat ho . Unhon ne apne Anbiya ki qabron ko masajid bana liya . Agar yeh darr na hota to Aap salla Allahu alaihi wasallam ki qabr bhi khuli rehne di jati . Lekin darr is ka hai ke kahin isay bhi log sajda gah na bana lein . Aur Hilal se riwayat hai ke Urwah bin Zubayr ne meri kuniyat (Abu Awanah yani Awanah ke walid) rakh di thi warna mere koi aulaad na thi .

Mujh se Bishr Bin Muhammad ne bayan kiya unhon ne kaha hum ko Abdullah ne khabar di unhon ne kaha mujh ko Maamar aur Yunus ne khabar di un se Zuhri ne bayan kiya unhein Ubaidullah Bin Abdullah ne khabar di ke Aisha (Radi Allahu Anha) aur Ibn Abbas (Radi Allahu Anhuma) ne bayan kiya jab Rasul Allah (Sallallahu Alaihi Wasallam) par naza ki halat tari hui to Aap (Sallallahu Alaihi Wasallam) apni chadar chehra mubarak par baar baar daal lete phir jab shiddat barhti to ise hata dete thay. Aap (Sallallahu Alaihi Wasallam) ne isi halat mein farmaya tha Allah ki laanat ho Yahood-o-Nasara par ke unhon ne apne anbiya ki qabron ko sajda gah bana liya. Aap (Sallallahu Alaihi Wasallam) is ummat ko un ke kiye se darana chahte thay

Hum se Salt bin Muhammad ne byaan kiya , kaha hum se Abu Awanah Waddah Yashkuri ne byaan kiya , un se Hilal bin Abi Humayd Wazzan ne , un se Urwah bin Zubayr ne aur un se Aisha razi Allahu anha ne byaan kiya ke Nabi Karim salla Allahu alaihi wasallam ne apne marz al-maut mein farmaya ke Allah Ta'ala ne Yahudiyon ko apni rahmat se door kar diya ke unhon ne apne anbiya ki qabron ko sajda-gah bana liya tha . Aisha razi Allahu anha ne kaha ke agar yeh baat na hoti to Aap salla Allahu alaihi wasallam ki qabr bhi khuli rakkhi jati lekin Aap ko yeh khatra tha ke kahin Aap ki qabr ko bhi sajda na kiya jaane lage .

Aur mujhe Ubaydullah bin Abdullah bin Utbah ne khabar di aur un se Aisha razi Allahu anha aur Abdullah bin Abbas razi Allahu anhuma ne byaan kiya ke shiddat e marz ke dinon mein Nabi Karim salla Allahu alaihi wasallam apni chadar khainch kar baar baar apne chehre par daalte thay , phir jab dam ghutne lagta to chehre se hata dete . Aap salla Allahu alaihi wasallam isi shiddat ke aalam mein farmate thay , Yahud o Nasara Allah ki rahmat se door huay kyunke unhon ne apne anbiya ki qabron ko sajda-gah bana liya tha . Is tarah Aap salla Allahu alaihi wasallam (apni ummat ko) un ka amal ikhtiyar karne se bachte rehne ki takeed farma rahe thay .

Mujh se Yahya bin Bukayr ne bayan kiya, unhon ne kaha hum se Layth bin Saad ne bayan kiya, in se Aqeel ne, in se Ibn Shihab ne bayan kiya ke mujhe Ubaidullah bin Abdullah bin Utbah ne khabar di, in se Aisha aur Abdullah bin Abbas razi Allahu anhum ne bayan kiya ke Rasool Allah salla Allahu alaihi wasallam par jab aakhri marz tari hua to Aap apni kamli chehra mubarak par daalte thay aur jab saans ghutne lagta to chehra khol lete aur isi halat mein farmate ”Yahood o Nasara Allah Ta'ala ki rahmat se door ho gaye ke unhon ne apne ambiya ki qabron ko sajda-gah bana liya.“ Nabi Karim salla Allahu alaihi wasallam in ke amal e bad se (Musalmanon ko) dara rahe thay.