Hum se Muhammad bin Musanna ne bayan kiya , kaha hum se Yahya bin Saeed Qattan ne Hisham bin Urwah ke wastay se bayan kiya , kaha ke mujhe mere walid ne Aisha raziyallahu anha se yeh khabar pehnchai ke Umm Habiba aur Umm Salama raziyallahu anhuma dono ne ek kalisa ka zikr kiya jisay unhon ne Habsha mein dekha to is mein murtiyan tasweeren thin . Unhon ne is ka tazkira Nabi Karim salla Allahu alaihi wa sallam se bhi kiya . Aap salla Allahu alaihi wa sallam ne farmaya ke un ka yeh qaeda tha ke agar un mein koi naikokar neik shakhs mar jata to woh log us ki qabr par masjid banate aur is mein yahi murtiyan tasweeren bana dete pas yeh log Allah ki dargah mein qiyamat ke din tamam makhlooq mein buray honge .

Hum se Muhammad bin Salam Bekandi ne bayan kiya , unhon ne kaha hum ko Abdah bin Sulaiman ne khabar di , unhon ne Hisham bin Urwah se , unhon ne apne walid Urwah bin Zubair se , unhon ne Aisha raziyallahu anha se ke Umm Salama raziyallahu anha ne Nabi Karim salla Allahu alaihi wa sallam se ek girja ka zikr kiya jis ko unhon ne Habsh ke mulk mein dekha is ka naam Mariya tha . Is mein jo murtiyan dekhi thin woh bayan ki . Is par Rasool Allah salla Allahu alaihi wa sallam ne farmaya ke yeh aise log thay ke agar un mein koi neik banda ya yeh farmaya ke neik aadmi mar jata to us ki qabr par masjid banate aur is mein yeh butt rakhte . Yeh log Allah ke nazdeek sari makhlooqat se badtar hain .

Hum se Ismail bin Abi Uwais ne byaan kiya ‘ kaha mujh se Imam Malik ne byaan kiya ‘ un se Hisham bin Urwah ne ‘ un se un ke baap ne aur un se Aisha razi Allahu anha ne ke jab Nabi Karim salla Allahu alaihi wasallam bimar pare to Aap salla Allahu alaihi wasallam ki baaz biwiyon (Umm Salamah razi Allahu anha aur Umm Habiba razi Allahu anha) ne ek girjay ka zikr kiya jise unhon ne Habsha mein dekha tha jis ka naam Mariyah tha . Umm Salamah aur Umm Habiba razi Allahu anha donon Habsh ke mulk mein gayi thin . Unhon ne is ki khubsurti aur is mein rakkhi hui tasaveer ka bhi zikr kiya . Is par Nabi Karim salla Allahu alaihi wasallam ne sar mubarak utha kar farmaya ke yeh woh log hain ke jab un mein koi salih shakhs mar jata to is ki qabr par masjid tameer kar dete . Phir is ki moorat is mein rakhte . Allah ke nazdeek yeh log saari makhlooq mein bure hain .

Mujh se Muhammad Bin Musanna ne bayan kiya, unhon ne kaha hum se Yahya Bin Saeed Qattan ne bayan kiya, in se Hisham Bin Urwah ne bayan kiya, kaha hum se hamare walid (Urwah Bin Zubair) ne bayan kiya aur in se Aisha Radi Allahu Anha ne bayan kiya ke Umm Habibah Radi Allahu Anha aur Umm Salama Radi Allahu Anha ne ek girjay ka zikr kiya jise unhon ne Habshah mein dekha tha is ke andar tasweerein theen. Unhon ne is ka zikr Nabi Kareem Sallallahu Alaihi Wasallam ke samne kiya to Aap Sallallahu Alaihi Wasallam ne farmaya ”jab un mein koi naik mard hota aur is ki wafat ho jati to is ki qabr ko wo log masjid banate aur phir is mein is ki tasweerein rakhte. Ye log Qiyamat ke din Allah Ta'ala ki bargah mein badtareen makhlooq hon ge.“
.

Hum se Abd-ul-Ala Bin Hammad ne bayan kiya, unhon ne kaha hum se Yezid Bin Zurai ne bayan kiya, unhon ne kaha hum se Saeed Bin Abi Aroobah ne bayan kiya, unhon ne kaha hum se Qatadah ne bayan kiya, un se Ata Bin Abi Rabah ne bayan kiya aur un se Jabir Bin Abdullah Ansari Radi Allahu Anhuma ne ke Nabi Kareem Sallallahu Alaihi Wasallam ne Najashi ke janazah ki namaz parhi thi aur hum saff bandh kar aap ke peeche kharay hue. Mein doosri ya teesri saff mein tha
.