Hum se Abu Rabee Sulaiman Bin Dawood ne bayan kiya, kaha hum se Sufyan Bin Uyainah ne bayan kiya, un se Ibn Juraij ne, un se Ata Bin Abi Rabah ne aur un se Jabir Radi Allahu Anhu ne bayan kiya ke jis din Najashi (Habshah ke badshah) ki wafat hui to Nabi Kareem Sallallahu Alaihi Wasallam ne farmaya ”aaj ek mard-e-salih is duniya se chala gaya, utho aur apne bhai Ashamah ki namaz-e-janazah parh lo.“
.

Hum se Abd-ul-Ala Bin Hammad ne bayan kiya, unhon ne kaha hum se Yezid Bin Zurai ne bayan kiya, unhon ne kaha hum se Saeed Bin Abi Aroobah ne bayan kiya, unhon ne kaha hum se Qatadah ne bayan kiya, un se Ata Bin Abi Rabah ne bayan kiya aur un se Jabir Bin Abdullah Ansari Radi Allahu Anhuma ne ke Nabi Kareem Sallallahu Alaihi Wasallam ne Najashi ke janazah ki namaz parhi thi aur hum saff bandh kar aap ke peeche kharay hue. Mein doosri ya teesri saff mein tha
.

Mujh se Abdullah Bin Abi Shaibah ne bayan kiya, kaha hum se Yezid Bin Haroon ne bayan kiya, un se Saleem Bin Hayyan ne, kaha hum se Saeed Bin Mina ne bayan kiya, un se Jabir Bin Abdullah Radi Allahu Anhuma ne ke Nabi Kareem Sallallahu Alaihi Wasallam ne Ashamah Najashi ki namaz-e-janazah parhi aur char martaba Aap Sallallahu Alaihi Wasallam ne namaz mein takbeer kahi. Yezid Bin Haroon ke sath is hadees ko Abdus Samad Bin Abdul Waris ne bhi (Saleem Bin Hayyan) se riwayat kiya hai
.

Hum se Zuhair Bin Harb ne bayan kiya, kaha hum se Yaqub Bin Ibrahim ne bayan kiya, kaha hum se hamare walid (Ibrahim Bin Saad) ne bayan kiya, un se Salih Bin Kaisan ne, un se Ibn Shihab ne bayan kiya, un se Abu Salama Bin Abdur Rahman aur Saeed Bin Musayyib ne bayan kiya aur unhein Abu Hurairah Radi Allahu Anhu ne khabar di ke Rasul Allah Sallallahu Alaihi Wasallam ne Habshah ke badshah Najashi ki maut ki khabar usi din de di thi jis din un ka intiqal hua tha aur aap Sallallahu Alaihi Wasallam ne farmaya tha ke apne bhai ki maghfirat ke liye dua karo
.

Aur Salih se riwayat hai ke Ibn Shihab ne bayan kiya, un se Saeed Bin Musayyib ne bayan kiya aur unhein Abu Hurairah Radi Allahu Anhu ne khabar di ke Nabi Kareem Sallallahu Alaihi Wasallam ne (namaz-e-janazah ke liye) eidgah mein Sahaba Radi Allahu Anhum ko saff basta khara kiya aur is ki namaz-e-janazah parhi Aap Sallallahu Alaihi Wasallam ne char martaba takbeer kahi thi
.