Mujh se Ishaq Bin Ibrahim ne bayan kiya ‘ kaha hum ne Hafs Bin Ghiyath se suna ‘ in se Buraid Bin Abdullah ne bayan kiya ‘ in se Abu Burda ne aur in se Abu Musa Ash'ari Radi Allahu Anhu ne bayan kiya ke Khaibar ki fatah ke baad hum Nabi Kareem Sallallahu Alaihi Wasallam ki khidmat mein pahunche lekin Nabi Kareem Sallallahu Alaihi Wasallam ne (maal-e-ghanimat mein) hamara bhi hissa lagaya. Aap ne hamare siwa kisi bhi aise shakhs ka hissa maal-e-ghanimat mein nahi lagaya jo fatah ke waqt (Islami lashkar ke sath) maujood na raha ho
.

Hum se Muhammad Bin Ala ne bayan kiya, kaha hum se Abu Usama ne bayan kiya, un se Buraid Bin Abdullah ne bayan kiya, un se Abu Burdah ne aur un se Abu Musa Ashari (Radi Allahu Anhu) ne ke Nabi Kareem (Sallallahu Alaihi Wasallam) ki hijrat ki khabar humein mili, to hum Yemen mein thay. Is liye hum bhi Aap ki khidmat mein muhajir ki haisiyat se hazir hone ke liye rawana hue. Mein tha, mere bhai thay. (Meri umar un dono se kam thi, dono bhaiyon mein) ek Abu Burdah (Radi Allahu Anhu) thay aur doosre Abu Ruhm. Ya unhon ne ye kaha ke apni qaum ke chand afrad ke sath ya ye kaha tirpan ya bawan aadmiyon ke sath (ye log rawana hue thay) hum kashti mein sawar hue to hamari kashti Najashi ke mulk Habsha pahunch gayi aur wahan humein Jafar Bin Abi Talib (Radi Allahu Anhu) apne doosre sathiyon ke sath mile. Jafar (Radi Allahu Anhu) ne kaha ke Rasul Allah (Sallallahu Alaihi Wasallam) ne humein yahan bheja tha aur hukm diya tha ke hum yahin rahein. Chunanche hum bhi wahin thehar gaye. Aur phir sab ek sath (Madinah) hazir hue, jab hum khidmat-e-Nabwi mein pahunche, to Aap (Sallallahu Alaihi Wasallam) Khaibar fatah kar chuke thay. Lekin Aap (Sallallahu Alaihi Wasallam) ne (doosre mujahidon ke sath) hamara bhi hissa mal-e-ghaneemat mein lagaya. Ya unhon ne ye kaha ke Aap ne ghaneemat mein se humein bhi ata farmaya, halanke Aap (Sallallahu Alaihi Wasallam) ne kisi aise shakhs ka ghaneemat mein hissa nahi lagaya jo ladai mein shareek na raha ho. Sirf unhi logon ko hissa mila tha, jo ladai mein shareek thay. Albatta hamari kashti ke sathiyon aur Jafar aur un ke sathiyon ko bhi Aap ne ghaneemat mein shareek kiya tha (halanke hum log ladai mein shareek nahi hue thay)
.

Hum se Muhammad Bin Ala ne bayan kiya, hum se Abu Usama ne bayan kiya, kaha hum se Buraid Bin Abdullah ne bayan kiya, un se Abu Burdah ne aur un se Abu Musa Radi Allahu Anhu ne bayan kiya ke jab humein Rasul Allah Sallallahu Alaihi Wasallam ki hijrat-e-Madinah ki ittila mili to hum Yemen mein thay. Phir hum kashti par sawar hue lekin ittifaq se hawa ne hamari kashti ka rukh Najashi ke mulk Habshah ki taraf kar diya. Hamari mulaqat wahan Jafar Bin Abi Talib Radi Allahu Anhu se hui (jo hijrat kar ke wahan mojood thay) hum inhein ke sath wahan thehre rahe, phir Madinah ka rukh kiya aur Nabi Kareem Sallallahu Alaihi Wasallam se is waqt mulaqat hui jab aap Khaibar fatah kar chuke thay. Nabi Kareem Sallallahu Alaihi Wasallam ne farmaya ke tum ne ay kashti walo! Do hijratein ki hain
.

Chunancha jab Nabi Kareem Sallallahu Alaihi Wasallam tashreef laye to unhon ne arz kiya: Ya Nabi Allah! Umar Radi Allahu Anhu is tarah ki baatein karte hain. Nabi Kareem Sallallahu Alaihi Wasallam ne daryaft farmaya ke phir tum ne unhein kya jawab diya? Unhon ne arz kiya ke mein ne unhein ye ye jawab diya tha. Nabi Kareem Sallallahu Alaihi Wasallam ne is par farmaya ke wo tum se zyada mujh se qareeb nahi hain. Unhein aur in ke sathiyon ko sirf ek hijrat hasil hui aur tum kashti walon ne do hijraton ka sharaf hasil kiya. Unhon ne bayan kiya ke is waqia ke baad Abu Musa Radi Allahu Anhu aur tamam kashti wale mere pas giroh dar giroh aane lage aur mujh se is hadees ke mutaliq poochne lage. Un ke liye duniya mein Nabi Kareem Sallallahu Alaihi Wasallam ke un ke mutaliq is irshad se zyada khush kun aur bais-e-fakhr aur koi cheez nahi thi
.

Aur Zubaidi se riwayat hai ke in se Zuhri ne bayan kiya ‘ unhein Anbasa Bin Saeed ne khabar di ‘ unhon ne Abu Huraira Radi Allahu Anhu se suna ‘ wo Saeed Bin Aas Radi Allahu Anhu ko khabar de rahe thay ke Aban Radi Allahu Anhu ko Nabi Kareem Sallallahu Alaihi Wasallam ne kisi sariya par Madina se Najd ki taraf bheja tha. Abu Huraira Radi Allahu Anhu ne bayan kiya ke phir Aban Radi Allahu Anhu aur in ke saathi Aap Sallallahu Alaihi Wasallam ki khidmat mein hazir hue ‘ Khaibar fatah ho chuka tha. In logon ke ghore tang chaal hi ke thay ‘ (yani unhon ne muhim mein koi kamyabi hasil nahi ki thi). Abu Huraira Radi Allahu Anhu ne bayan kiya ke mein ne arz kiya: Ya Rasul Allah! Ghanimat mein in ka hissa na lagaiye. Is par Aban Radi Allahu Anhu bole Ai wabr! Teri haisiyait to sirf ye ke Qadum-ul-Zan ki chhoti se utar aaya hai. Nabi Kareem Sallallahu Alaihi Wasallam ne farmaya ke Aban! Baith ja! Nabi Kareem Sallallahu Alaihi Wasallam ne in logon ka hissa nahi lagaya
.