Hum se Ubaidullah Bin Musa ne bayan kiya, un se Israil ne bayan kiya, un se Ibn Ishaq (Amr Bin Ubaidullah Sabi'i) ne aur un se Bara Bin Azib Radi Allahu Anhu ne bayan kiya ke jung-e-Uhud ke mauqe par jab mushrikeen se muqabla ke liye hum pahunche to Nabi Kareem Sallallahu Alaihi Wasallam ne teer andazon ka ek dasta Abdullah Bin Jubair (Radi Allahu Anhuma) ki matahti mein (pahari par) muqarrar farmaya tha aur unhein ye hukm diya tha ke tum apni jagah se na hatna, is waqt bhi jab tum log dekh lo ke hum in par ghalib aa gaye hain phir bhi yahan se na hatna aur is waqt bhi jab dekh lo ke wo hum par ghalib aa gaye, tum log hamari madad ke liye na aana. Phir jab hamari mudbher kuffar se hui to in mein bhagdar mach gayi. Mein ne dekha ke in ki aurten pahariyon par bari tezi ke sath bhagi ja rahi thin, pindliyon se upar kapre uthaye hue, jis se in ke pazib dikhayi de rahe thay. Abdullah Bin Jubair (Radi Allahu Anhuma) ke (teer andaz) saathi kehne lage ke ghanimat ghanimat. Is par Abdullah Radi Allahu Anhu ne un se kaha ke mujhe Nabi Kareem Sallallahu Alaihi Wasallam ne takeed ki thi ke apni jagah se na hatna (is liye tum log maal-e-ghanimat lootne na jao) lekin in ke sathiyon ne in ka hukm manne se inkar kar diya. In ki is hukm udooli ke nateejay mein musalmanon ko haar hui aur sattar musalman shaheed ho gaye. Is ke baad Abu Sufyan ne pahari par se awaz di, kya tumhare sath Muhammad (Sallallahu Alaihi Wasallam) maujood hain? Aap Sallallahu Alaihi Wasallam ne farmaya ke koi jawab na de, phir unhon ne pucha, kya tumhare sath Ibn Abi Quhafah maujood hain? Aap Sallallahu Alaihi Wasallam ne is ke jawab ki bhi mamanat farma di. Unhon ne pucha, kya tumhare sath Ibn Khattab maujood hain? Is ke baad wo kehne lage ke ye sab qatl kar diye gaye. Agar zinda hote to jawab dete. Is par Umar Radi Allahu Anhu be-qabu ho gaye aur farmaya: Allah ke dushman tu jhoota hai. Allah ne abhi unhein tumhein zaleel karne liye baqi rakha hai. Abu Sufyan ne kaha, Hubal (ek but) buland rahe. Nabi Kareem Sallallahu Alaihi Wasallam ne farmaya ke is ka jawab do. Sahaba (Radi Allahu Anhum) ne arz kiya ke hum kya jawab dein? Aap Sallallahu Alaihi Wasallam ne farmaya ke kaho, Allah sab se buland aur buzurg-o-bartar hai. Abu Sufyan ne kaha, hamare pas Uzza (but) hai aur tumhare pas koi Uzza nahi. Aap Sallallahu Alaihi Wasallam ne farmaya ke is ka jawab do. Sahaba (Radi Allahu Anhum) ne arz kiya, kya jawab dein? Aap Sallallahu Alaihi Wasallam ne farmaya ke kaho, Allah hamara hami aur madadgaar hai aur tumhara koi hami nahi. Abu Sufyan ne kaha, aaj ka din Badr ke din ka badla hai aur larayi ki misal doal ki hoti hai. (Kabhi hamare hath mein aur kabhi tumhare hath mein) tum apne maqtooleen mein kuch lashon ka misla kiya hua pao ge, mein ne is ka hukm nahi diya tha lekin mujhe bura nahi maloom hua
.

Hum se Amr Bin Khalid ne bayan kiya ‘ kaha hum se Zuhair ne bayan kiya ‘ kaha hum se Abu Ishaq ne bayan kiya ‘ kaha ke mein ne Bara Bin Azib (Radi Allahu Anhu) se suna ‘ aap bayan karte thay ke Rasul Allah (Sallallahu Alaihi Wasallam) ne jung-e-Uhud ke mauqe par (teer andazoon ke) pachaas aadmiyon ka afsar Abdullah Bin Jubair (Radi Allahu Anhu) ko banaya tha. Aap (Sallallahu Alaihi Wasallam) ne unhein takeed kar di thi ke agar tum ye bhi dekh lo ke parinde hum par toot pare hain. Phir bhi apni jagah se mat hatna ‘ jab tak mein tum logon ko kehla na bhejoon. Isi tarah agar tum ye dekh ho ke kuffar ko hum ne shikast de di hai aur unhein pamal kar diya hai phir bhi yahan se na talna ‘ jab mein tumhein khud bula na bhejoon. Phir Islami lashkar ne kuffar ko shikast de di. Bara Bin Azib (Radi Allahu Anhu) ne bayan kiya ‘ ke Allah ki qasam! Mein ne mushrik auraton ko dekha ke tezi ke sath bhag rahi thiin. Un ke pazeeb aur pindliyan dikhayi de rahi thiin. Aur wo apne kapron ko uthaye hue thiin. Abdullah Bin Jubair (Radi Allahu Anhu) ke sathiyon ne kaha ‘ ke ghanimat looto ‘ ae qaum! Ghanimat tumhare samne hai. Tumhare sathi ghalib aa gaye hain. Ab darr kis baat ka hai. Is par Abdullah Bin Jubair (Radi Allahu Anhu) ne un se kaha ke kya jo hidayat Rasul Allah (Sallallahu Alaihi Wasallam) ne ki thi ‘ tum ise bhool gaye? Lekin wo log isi par arre rahe ke doosre ashab ke sath ghanimat jama karne mein shareek rahein ge. Jab ye log (aksariyat) apni jagah chor kar chale aaye to un ke munh kafiron ne pher diye ‘ aur (musalmanon ko) shikast-zada pa kar bhagte hue aaye ‘ yahi wo ghari thi (jis ka zikr Surah Aal-e-Imran mein hai ke) ”jab Rasul Allah (Sallallahu Alaihi Wasallam) tum ko peeche khare hue bula rahe thay“ . Is se yahi murad hai. Is waqt Rasul Allah (Sallallahu Alaihi Wasallam) ke sath barah sahaba ke siwa aur koi bhi baqi na reh gaya tha. Aakhir hamare sattar aadmi shaheed ho gaye. Badr ki larayi mein Aap (Sallallahu Alaihi Wasallam) ne apne sahaba ke sath mushrikeen ke ek sau chalis aadmiyon ka nuqsan kiya tha ‘ sattar un mein se qaidi thay aur sattar maqtool ‘ (jab jung khatam ho gayi to ek pahar par khare ho kar) Abu Sufyan ne kaha kya Muhammad (Sallallahu Alaihi Wasallam) apni qaum ke sath maujood hain? Teen martaba unhon ne yahi poocha. Lekin Nabi Kareem (Sallallahu Alaihi Wasallam) ne jawab dene se mana farma diya tha. Phir unhon ne poocha ‘ kya Ibn Abi Quhafa (Abu Bakr Radi Allahu Anhu) apni qaum mein maujood hain? Ye sawal bhi teen martaba kiya ‘ phir poocha Ibn Khattab (Umar Radi Allahu Anhu) apni qaum mein maujood hain? Ye bhi teen martaba poocha ‘ phir apne sathiyon ki taraf murr kar kehne lage ke ye teeno qatl ho chuke hain is par Umar (Radi Allahu Anhu) se na raha gaya aur Aap bol pare ke ae Allah ke dushman! Allah gawah hai ke tu jhoot bol raha hai jin ke tu ne abhi naam liye thay wo sab zinda hain aur abhi tera bura din aane wala hai. Abu Sufyan ne kaha accha! Aaj ka din Badr ka badla hai. Aur larayi bhi ek dol ki tarah hai (kabhi idhar kabhi udhar) tum logon ko apni qaum ke baaz log musla kiye hue milein ge. Mein ne is tarah ka koi hukm (apne aadmiyon ko) nahi diya tha ‘ lekin mujhe un ka ye amal bura bhi nahi maloom hua. Is ke baad wo fakhr-e-rajaz parhne laga ‘ Hubal (but ka naam) buland rahe. Aap (Sallallahu Alaihi Wasallam) ne farmaya tum log is ka jawab kyun nahi dete. Sahaba (Radi Allahu Anhum) ne poocha hum is ke jawab mein kya kahein ya Rasul Allah? Aap (Sallallahu Alaihi Wasallam) ne farmaya kaho ke Allah sab se buland aur sab se bada buzurg hai. Abu Sufyan ne kaha hamara madadgar Uzza (but) hai aur tumhara koi bhi nahi, Aap (Sallallahu Alaihi Wasallam) ne farmaya, jawab kyun nahi dete, sahaba ne arz kiya, ya Rasul Allah! Is ka jawab kya diya jaye? Aap (Sallallahu Alaihi Wasallam) ne farmaya, kaho ke Allah hamara hami hai aur tumhara hami koi nahi
.

Mujh se Amr Bin Khalid ne bayan kiya ‘ hum se Zuhair ne bayan kiya ‘ hum se Abu Ishaq ne bayan kiya ke mein ne Bara Bin Azib Radi Allahu Anhu se suna ‘ wo bayan kar rahe thay ke Nabi Kareem Sallallahu Alaihi Wasallam ne Uhud ki larai mein teer andazon par Abdullah Bin Jubair Radi Allahu Anhu ko sardar muqarrar kiya tha is larai mein hamare satrah aadmi shaheed hue thay. Nabi Kareem Sallallahu Alaihi Wasallam aur aap ke sahabiyon se Badr ki larai mein ek sau chalees mushrikeen ko nuqsan pahuncha tha. Satrah in mein se qatl kar diye gaye thay aur satrah qaidi bana kar laye gaye thay is par Abu Sufyan ne kaha ke aaj ka din Badr ke din ka badla hai aur larai ki misal dowl ki si hai
.

Mujh se Amr Bin Khalid ne bayan kiya, kaha hum se Zuhair ne bayan kiya, kaha hum se Abu Ishaq ne bayan kiya, kaha ke mein ne Bara Bin Azib Radi Allahu Anhu se suna, unhon ne bayan kiya ke Ghazwa Uhud ke mauqe par Rasul Allah Sallallahu Alaihi Wasallam ne (teer andazon ke) paidal dasta ka ameer Abdullah Bin Jubair (Radi Allahu Anhuma) ko banaya tha lekin wo log shikast khurda ho kar aaye. (Ayat «yad'uhumur rasulu fi ukhrahum» in hi ke bare mein nazil hui thi) aur ye hazeemat is waqt pesh aayi jabke Rasul Allah Sallallahu Alaihi Wasallam in ko peeche se pukar rahe thay
.

Hum se Amr bin Khalid ne byaan kiya , kaha hum se Zuhayr ne byaan kiya . Un se Abu Ishaq ne byaan kiya , kaha ke main ne Bara bin Azib razi Allahu anhu se suna , unhon ne byaan kiya ke Uhud ki larai mein Rasool Allah salla Allahu alaihi wasallam ne (teer-andazon ke) paidal daste par Abdullah bin Jubayr razi Allahu anhu ko afsar muqarrar kiya tha , phir bahut se Musalmanon ne peeth pher li , aayat «fazhaaka izh yad'oohumur rasoolu fee ukhrakum» ”aur Rasool tum ko pukar rahe thay tumhare peeche se .“ Mein isi ki taraf isharah hai , is waqt Rasool Allah salla Allahu alaihi wasallam ke saath barah sahabiyon ke siwa aur koi maujood na tha .