Hum se Abu-ul-Yaman ne bayan kiya, kaha hum ko Shuaib ne khabar di, un se Zuhri ne bayan kiya, unhein Salim Bin Abdullah ne khabar di, unhon ne Abdullah Bin Umar Radi Allahu Anhuma se suna aur unhon ne Umar Bin Khattab Radi Allahu Anhu se bayan kiya ke jab Hafsa Bint Umar Radi Allahu Anhuma ke shohar Khunais Bin Huzafa Sahmi Radi Allahu Anhu ki wafat ho gayi, wo Rasul Allah Sallallahu Alaihi Wasallam ke ashab mein thay aur Badr ki larai mein unhon ne shirkat ki thi aur Madinah mein in ki wafat ho gayi thi. Umar Radi Allahu Anhu ne bayan kiya ke meri mulaqat Usman Bin Affan Radi Allahu Anhu se hui to mein ne un se Hafsa ka zikr kiya aur kaha ke agar aap chahein to is ka nikah mein aap se kar doon. Unhon ne kaha ke mein soochoon ga. Is liye mein chand dinon ke liye thehar gaya, phir unhon ne kaha ke meri raye ye hui hai ke abhi mein nikah na karoon. Umar Radi Allahu Anhu ne kaha ke phir meri mulaqat Abu Bakr Radi Allahu Anhu se hui aur in se bhi mein ne yahi kaha ke agar aap chahein to mein aap ka nikah Hafsa Bint Umar se kar doon. Abu Bakr Radi Allahu Anhu khamosh ho gaye aur koi jawab nahi diya. In ka ye tariqa-e-amal Usman Radi Allahu Anhu se bhi zyada mere liye bais-e-takleef hua. Kuch dinon mein ne aur tawaqquf kiya to Nabi Kareem Sallallahu Alaihi Wasallam ne khud Hafsa Radi Allahu Anha ka paigham bheja aur mein ne in ka nikah Aap Sallallahu Alaihi Wasallam se kar diya. Is ke baad Abu Bakr Radi Allahu Anhu ki mulaqat mujh se hui to unhon ne kaha, shayad aap ko mere is tarz-e-amal se takleef hui ho gi ke jab aap ki mujh se mulaqat hui aur aap ne Hafsa Radi Allahu Anha ke mutaliq mujh se baat ki to mein ne koi jawab nahi diya. Mein ne kaha ke haan takleef hui thi. Unhon ne bataya ke aap ki baat ka mein ne sirf is liye koi jawab nahi diya tha ke Nabi Kareem Sallallahu Alaihi Wasallam ne (mujh se) Hafsa Radi Allahu Anha ka zikr kiya tha (mujh se mashwara liya tha ke mein is se nikah kar loon) aur mein Nabi Kareem Sallallahu Alaihi Wasallam ka raaz fash nahi kar sakta tha. Agar aap Hafsa Radi Allahu Anha se nikah ka irada chor dete to beshak mein in se nikah kar leta
.

Hum se Abdul Aziz bin Abdullah ne byaan kiya , kaha hum se Ibrahim bin Saad ne byaan kiya , un se Salih bin Kaysan ne , un se Ibn Shihab ne byaan kiya ke mujhe Salim bin Abdullah ne khabar di , unhon ne Abdullah bin Umar se Umar bin Khattab razi Allahu anhum ke mutalliq suna ke jab (in ki sahibzadi) Hafsa bint Umar razi Allahu anha (apne shohar) Khunais bin Huzaifa Sahmi ki wafat ki wajah se bewa ho gayin aur Khunais Rasool Allah salla Allahu alaihi wasallam ke sahabi thay aur in ki wafat Madinah Munawwarah mein hui thi . Umar bin Khattab razi Allahu anhu ne byaan kiya ke main Usman bin Affan razi Allahu anhu ke paas aaya aur un ke liye Hafsa razi Allahu anha ko pesh kiya . Unhon ne kaha ke main is muamla mein ghaur karoon ga . Main ne kuch dinon tak intizar kiya . Phir mujh se Abu Bakr razi Allahu anhu ne mulaqat ki aur main ne kaha ke agar Aap pasand karein to main Aap ki shadi Hafsa razi Allahu anha se kar doon . Abu Bakr razi Allahu anhu khamosh rahe aur mujhe koi jawab nahi diya . In ki is be-rukhi se mujhe Usman razi Allahu anhu ke muamle se bhi zyada ranj hua . Kuch dinon tak main khamosh raha . Phir Nabi Karim salla Allahu alaihi wasallam ne khud Hafsa razi Allahu anha se nikah ka paigham bheja aur main ne Nabi Karim salla Allahu alaihi wasallam se is ki shadi kar di . Is ke baad Abu Bakr razi Allahu anhu mujh se milay aur kaha ke jab tum ne Hafsa razi Allahu anha ka muamla mere samne pesh kiya tha to mere is par mere khamosh rehne se tumhein takleef hui ho gi ke main ne tumhein is ka koi jawab nahi diya tha . Umar razi Allahu anhu ne byaan kiya ke main ne kaha ke waqayi hui ku . Abu Bakr razi Allahu anhu ne kaha ke tum ne jo kuch mere samne rakkha tha , is ka jawab main ne sirf is wajah se nahi diya thu ke mere ilm mein thu ke Rasool Allah salla Allahu alaihi wasallam ne khud Hafsa razi Allahu anha ka zikr kiya hai aur main Nabi Karim salla Allahu alaihi wasallam ke raaz ko zahir karna nahi chahta thu agar Nabi Karim salla Allahu alaihi wasallam chhor dete to main Hafsa ko apne nikah mein le aata .

Hum se Abdullah bin Muhammad ne byaan kiya , kaha hum se Hisham ne byaan kiya , kaha hum ko Mamar ne khabar di , kaha hum se Zuhri ne byaan kiya , kaha ke mujhe Salim ne khabar di , unhein Abdullah bin Umar razi Allahu anhuma ne khabar di ke jab Hafsa bint Umar razi Allahu anhuma Ibn Huzaifa Sahmi se bewa huien . Ibn Huzaifa razi Allahu anhuma Nabi Karim salla Allahu alaihi wasallam ke as-haab mein se thay aur Badr ki jang mein shareek thay in ki wafat Madinah Munawwarah mein hui thi to Umar razi Allahu anhu ne byaan kiya ke main Usman bin Affan razi Allahu anhu se mila aur unhein pesh-kash ki aur kaha ke agar Aap chahein to main Hafsa ka nikah Aap se karoon . Unhon ne jawab diya ke main is muamla mein ghaur karoon ga chand din main ne intizar kiya is ke baad woh mujh se milay aur kaha ke main is nateeja par pahuncha hoon ke abhi nikah na karoon . Umar razi Allahu anhu ne byaan kiya ke phir main Abu Bakr razi Allahu anhu se mila aur in se kaha ke agar Aap chahein to main Hafsa ka nikah Aap se karoon .

Hum se Abu al-Yaman ne byaan kiya , kaha hum ko Shuayb ne khabar di , unhein Zuhri ne , kaha ke mujhe Salim bin Abdullah ne khabar di , unhon ne Abdullah bin Umar razi Allahu anhuma se suna , woh byaan karte thay ke Umar razi Allahu anhu ne byaan kiya ke meri beti Hafsa razi Allahu anha bewa huien to main Abu Bakr Siddique razi Allahu anhu se mila aur in se kaha ke agar Aap chahein to main Aap ka nikah azeeza Hafsa bint Umar razi Allahu anhuma se kar doon . Phir kuch dinon ke baad Rasool Allah salla Allahu alaihi wasallam ne in ke nikah ka paigham bheja is ke baad Abu Bakr razi Allahu anhu mujh se milay aur kaha Aap ne jo surat mere samne rakkhi thi is ka jawab main ne sirf is wajah se nahi diya tha ke mujhe maloom tha Rasool Allah salla Allahu alaihi wasallam ne in ka zikr kiya hai . Main nahi chahta ke Aap ka raaz kholoon haan Nabi Karim salla Allahu alaihi wasallam unhein chhor dete to main un ko qabool kar leta . Shuayb ke saath is hadees ko Yunus bin Yazid aur Musa bin Uqbah aur Muhammad bin Abi Ateeq ne bhi Zuhri se riwayat kiya hai .