Mujh se Hamid Bin Umar ne bayan kiya, kaha hum se Bishr Bin Mufazzal ne, un se Humaid Taweel ne bayan kiya aur un se Anas Radi Allahu Anhu ne ke jab Abdullah Bin Salam Radi Allahu Anhu ko Rasul Allah Sallallahu Alaihi Wasallam ke Madinah aane ki khabar hui to wo aap se chand sawal karne ke liye aaye. Unhon ne kaha ke mein aap se teen cheezon ke mutaliq poochoon ga jinhein nabi ke siwa aur koi nahi janta. Qiyamat ki sab se pehli nishani kya ho gi? Ahl-e-jannat ki ziafat sab se pehle kis khane se ki jaye gi? Aur kya baat hai ke baccha kabhi baap par jata hai aur kabhi maan par? Nabi Kareem Sallallahu Alaihi Wasallam ne farmaya ke jawab abhi mujhe Jibrail ne aa kar bataya hai. Abdullah Bin Salam ne kaha ke ye malaika mein Yahudiyon ke dushman hain. Aap Sallallahu Alaihi Wasallam ne farmaya ke Qiyamat ki pehli nishani ek aag hai jo insanon ko mashriq se maghrib ki taraf le jaye gi. Jis khane se sab se pehle ahl-e-jannat ki ziafat ho gi wo machli ki kaleji ka barha hua tukra ho ga (jo nihayat lazeez aur zood hazam hota hai) aur baccha baap ki surat par is waqt jata hai jab aurat ke pani par mard ka pani ghalib aa jaye aur jab mard ke pani par aurat ka pani ghalib aa jaye to baccha maan par jata hai. Abdullah Bin Salam Radi Allahu Anhu ne kaha mein gawahi deta hoon ke Allah ke siwa aur koi mabood nahi aur gawahi deta hoon ke aap Allah ke rasool hain. Phir unhon ne arz kiya: Ya Rasul Allah! Yahudi bare buhtan lagane wale log hain. Is liye aap is se pehle ke mere Islam ke bare mein unhein kuch maloom ho, un se mere mutaliq daryaft farmayein. Chunanche chand Yahudi aaye to aap Sallallahu Alaihi Wasallam ne un se farmaya ke tumhari qaum mein Abdullah Bin Salam kaun hain? Wo kehne lage ke hum mein sab se behtar aur sab se behtar ke bete hain, hum mein sab se afzal aur sab se afzal ke bete hain. Aap Sallallahu Alaihi Wasallam ne farmaya tumhara kya khayal hai agar wo Islam layein? Wo kehne lage is se Allah Ta'ala unhein apni panah mein rakkhe. Aap Sallallahu Alaihi Wasallam ne dobara un se yahi sawal kiya aur unhon ne yahi jawab diya. Is ke baad Abdullah Bin Salam Radi Allahu Anhu bahar aaye aur kaha mein gawahi deta hoon ke Allah siwa koi mabood nahi aur Muhammad (Sallallahu Alaihi Wasallam) Allah ke rasool hain. Ab wo kehne lage ye to hum mein sab se badtar aadmi hain aur sab se badtar baap ke bete hain. Foran hi burayi shuru kar di, Abdullah Bin Salam Radi Allahu Anhu ne arz kiya ya Rasul Allah! Isi ka mujhe darr tha
.

Hum se Muhammad Bin Salam ne bayan kiya, kaha hum ko Marwan Fazari ne khabar di. Unhein Humaid ne aur un se Anas (Radi Allahu Anhu) ne bayan kiya ke Abdullah Bin Salam (Radi Allahu Anhu) ko jab Rasul Allah (Sallallahu Alaihi Wasallam) ke Madinah tashreef lane ki khabar mili to wo Aap ki khidmat mein aaye aur kaha ke mein Aap se teen cheezon ke bare mein poochon ga. Jinhein nabi ke siwa aur koi nahi janta. Qiyamat ki sab se pehli alamat kya hai? Wo kaun sa khana hai jo sab se pehle jannatiyon ko khane ke liye diya jaye ga? Aur kis cheez ki wajah se bacha apne baap ke mushabih hota hai? Aap (Sallallahu Alaihi Wasallam) ne farmaya ke Jibrail Alaihis Salam ne abhi abhi mujhe aa kar is ki khabar di hai. Is par Abdullah ne kaha ke malaika mein to yahi to yahudiyon ke dushman hain. Aap (Sallallahu Alaihi Wasallam) ne farmaya "Qiyamat ki sab se pehli alamat ek aag ki surat mein zahir ho gi jo logon ko mashriq se maghrib ki taraf haank le jaye gi, sab se pehla khana jo ahl-e-jannat ki dawat ke liye pesh kiya jaye ga, wo machhli ki kaleji par jo tukda tika rehta hai wo ho ga aur bacche ki mushabihat ka jahan tak talluq hai to jab mard aurat ke qareeb jata hai is waqt agar mard ki mani pehl kar jati hai to bacha usi ki shakal-o-surat par hota hai. Agar aurat ki mani pehl kar jati hai to phir bacha aurat ki shakal-o-surat par hota hai." (Ye sun kar) Abdullah Bin Salam (Radi Allahu Anhu) bol utthe "Mein gawahi deta hoon ke Aap Allah ke rasul hain." Phir arz kiya, Ya Rasul Allah! Yahud inteha ki jhooti qaum hai. Agar Aap ke daryaft karne se pehle mere Islam qabool karne ke bare mein unhein ilm ho gaya to Aap (Sallallahu Alaihi Wasallam) ke samne mujh par har tarah ki tohmatain dharni shuru kar dein ge. Chunanche kuch yahudi aaye aur Abdullah (Radi Allahu Anhu) ghar ke andar chhup kar baith gaye. Nabi Kareem (Sallallahu Alaihi Wasallam) ne un se pucha tum logon mein Abdullah Bin Salam kaun sahab hain? Saare yahudi kehne lage wo hum mein sab se bade aalim aur sab se bade aalim ke sahab-zade hain. Hum mein sab se zyada behtar aur hum mein sab se behtar ke sahab-zade hain. Aap (Sallallahu Alaihi Wasallam) ne un se farmaya, agar Abdullah musalman ho jayein to phir tumhara kya khayal ho ga? Unhon ne kaha, Allah Ta'ala unhein is se mahfooz rakhe. Itne mein Abdullah (Radi Allahu Anhu) bahar tashreef laye aur kaha, mein gawahi deta hoon ke Allah ke siwa aur koi mabood nahi aur mein gawahi deta hoon ke Muhammad Allah ke sacche rasul hain. Ab wo sab un ke mutalliq kehne lage ke hum mein sab se bad-tareen aur sab se bad-tareen ka beta hai, wahin wo un ki burayi karne lage
.

Hum se Muhammad bin Musanna ne bayan kiya, kaha hum se Yahya Qattan ne bayan kiya, in se Hisham bin Urwah ne bayan kiya, unhein in ke walid ne khabar di, unhein Zaynub bint Umm Salamah razi Allahu anhuma ne, unhein Umm Salamah razi Allahu anha ne ke Umm Sulaym razi Allahu anha ne arz kiya: ya Rasool Allah! Allah haq se nahi sharmata, kya aurat ko jab ihtilam ho to is par ghusl wajib hai? Nabi Karim salla Allahu alaihi wasallam ne farmaya ke haan jab aurat pani dekhe (to is par ghusl wajib hai) is par Umm Salamah razi Allahu anha hansien aur arz kiya, kya aurat ko bhi ihtilam hota hai? Nabi Karim salla Allahu alaihi wasallam ne farmaya ke phir bacha ki surat maan se kyun milti hai.