Hum se Ali bin Abdullah bin Madini ne bayan kiya, kaha hum se Ya'qub bin Ibrahim ne bayan kiya, kaha ke mujh se mere walid ne bayan kiya in se Salih ne, in se Ibn Shihab ne, kaha mujh ko Abdul Hameed bin Abdur Rahman ne khabar di, unhein Muhammad bin Sa'd bin Abi Waqqas ne khabar di aur un se in ke walid (Sa'd bin Abi Waqqas Radi Allahu Anhu) ne bayan kiya (doosri sanad) aur mujh se Abdul Aziz bin Abdullah ne bayan kiya, kaha hum se Ibrahim bin Sa'd ne bayan kiya, in se Salih ne, in se Ibn Shihab ne, in se Abdul Hameed bin Abdur Rahman bin Zaid ne, in se Muhammad bin Sa'd bin Abi Waqqas ne aur in se in ke walid ne bayan kiya ke Umar Radi Allahu Anhu ne Rasoolullah Sallallahu Alaihi Wa Sallam se andar aane ki ijazat chahi. Is waqt Aap ke pas Quraish ki chand aurtein (Ummahat al-Momineen mein se) baithi batein kar rahi thin aur Aap ki awaz par apni awaz unchi karte hue Aap se naan-o-nafaqah mein ziyati ka mutaliba kar rahi thin. Joun hi Umar Radi Allahu Anhu ne ijazat chahi to woh tamam khari ho kar parde ke peeche jaldi se bhag khari hui. Aakhir Aap Sallallahu Alaihi Wa Sallam ne ijazat di aur woh dakhil hue to Aap Sallallahu Alaihi Wa Sallam muskura rahe thay. Umar Radi Allahu Anhu ne arz kiya: Ya Rasul Allah! Allah Ta'ala Aap Sallallahu Alaihi Wa Sallam ko hamesha khush rakkhe. Aap Sallallahu Alaihi Wa Sallam ne farmaya: Mujhe in aurton par hansi aa rahi hai jo abhi mere pas baithi hui thin, lekin tumhari awaz sunte hi sab parde ke peeche bhag gayin. Umar Radi Allahu Anhu ne arz kiya: Ya Rasul Allah! Darna to unhein Aap se chahiye tha. Phir unhon ne (aurton se) kaha Ae apni jaanon ki dushmano! Tum mujh se to darti ho aur Nabi Kareem Sallallahu Alaihi Wa Sallam se nahi dartin, aurton ne kaha ke haan, Aap theek kehte hain. Nabi Kareem Sallallahu Alaihi Wa Sallam ke muqable mein Aap kahin zyada sakht hain. Is par Aap Sallallahu Alaihi Wa Sallam ne farmaya: Ae Ibn Khattab! Is zaat ki qasam jis ke hath mein meri jaan hai, agar Shaitan tumhein kisi raste par chalta dekhta hai to ise chhorh kar woh kisi doosre raste par chal parta hai.

Hum se Ali Bin Abdullah ne bayan kiya, kaha hum se Yaqub Bin Ibrahim ne bayan kiya, kaha hum se hamare baap ne bayan kiya, un se Salih ne, un se Ibn Shihab ne bayan kiya, kaha ke mujhe Abdul Hameed Bin Abdur Rahman Bin Zaid ne khabar di, unhein Muhammad Bin Saad Bin Abi Waqqas (Radi Allahu Anhu) ne khabar di aur un se un ke walid Saad Bin Abi Waqqas ne bayan kiya ke ek dafa Umar (Radi Allahu Anhu) ne Rasul Allah (Sallallahu Alaihi Wasallam) ki khidmat mein hazir hone ki ijazat chahi. Is waqt chand quraishi aurtein (khud Aap ki biwiyaan) Aap ke paas baithi Aap se guftagu kar rahi theen aur Aap se (kharch mein) badhane ka sawal kar rahi theen. Khoob awaz buland kar ke. Lekin jonhi Umar (Radi Allahu Anhu) ne ijazat chahi, wo khawateen jaldi se parde ke peechhe chali gayeen. Phir Rasul Allah (Sallallahu Alaihi Wasallam) ne unhein ijazat di, Aap (Sallallahu Alaihi Wasallam) muskura rahe thay. Umar (Radi Allahu Anhu) ne kaha, Allah Ta'ala hamesha Aap ko hansata rakhe. Ya Rasul Allah! Aap ne farmaya ke mujhe in auraton par tajjub hua abhi abhi mere paas theen, lekin jab tumhari awaz suni to parde ke peechhe jaldi se bhag gayeen. Umar (Radi Allahu Anhu) ne arz kiya, lekin Aap Ya Rasul Allah! Zyada is ke mustahaq thay ke Aap se ye dartin, phir unhon ne kaha: Ae apni janon ke dushmano! Mujh se to tum darti ho aur Nabi Kareem (Sallallahu Alaihi Wasallam) se nahi dartin. Azwaj-e-Mutahhirat boleen ke waqiya yahi hai kyunke aap Rasul Allah (Sallallahu Alaihi Wasallam) ke bar-khilaf mizaj mein bahut sakht hain. Rasul Allah (Sallallahu Alaihi Wasallam) ne farmaya "Is zaat ki qasam! Jis ke hath mein meri jaan hai, agar shaitan bhi kahin raste mein tum se mil jaye, to jhat wo rasta chhod kar doosra rasta ikhtiyar kar leta hai."
.

Hum se Ismail ne bayan kiya, kaha hum se Ibrahim ne bayan kiya, in se Salih bin Kaisan ne, in se Ibn Shihab ne, in se Abd-ul-Hameed bin Abd-ur-Rahman bin Zayd bin Khattab ne, in se Muhammad bin Saad ne aur in se in ke walid ne bayan kiya ke Umar bin Khattab razi Allahu anhu ne Nabi Karim salla Allahu alaihi wasallam ki khidmat mein hazir hone ki ijazat chahi. Is waqt Nabi Karim salla Allahu alaihi wasallam ke paas Aap ki kai biwiyaan jo Quraish se talluq rakhti thien Aap se kharch dene ke liye taqaza kar rahi thien aur oonchi aawaz mein baatein kar rahi thien. Jab Umar razi Allahu anhu ne ijazat chahi to woh jaldi se bhaag kar parde ke peeche chali gayiein. Phir Nabi Karim salla Allahu alaihi wasallam ne un ko ijazat di aur woh dakhil huay. Nabi Karim salla Allahu alaihi wasallam is waqt hans rahe thay, Umar razi Allahu anhu ne arz kiya: Allah Aap ko khush rakkhe, ya Rasool Allah! Mere maan baap Aap par qurban hon. Nabi Karim salla Allahu alaihi wasallam ne farmaya ke in par mujhe hairat hui, jo abhi mere paas taqaza kar rahi thien, jab unhon ne tumhari aawaz suni to fauran bhaag kar parde ke peeche chali gayiein. Umar razi Allahu anhu ne is par arz kiya: ya Rasool Allah! Aap is ke zyada mustahiq hain ke Aap se dara jaye, phir auraton ko mukhatab kar ke unhon ne kaha, apni jaanon ki dushman! Mujh se to tum darti ho aur Allah ke Rasool se nahi dartien. Unhon ne arz kiya: Aap Nabi Karim salla Allahu alaihi wasallam se zyada sakht hain. Is par Nabi Karim salla Allahu alaihi wasallam ne farmaya: haan Ae Ibn Khattab! Is zaat ki qasam jis ke hath mein meri jaan hai, agar shaytan bhi tumhein raste par aata hua dekhe ga to tumhara rasta chhorr kar doosre raste par chala jaye ga.