Hum se Abu Nuaim ne bayan kiya, kaha hum se Hammam ne bayan kiya, un se Qatada ne ke mein ne Anas (Radi Allahu Anhu) se poocha kya Rasul Allah (Sallallahu Alaihi Wasallam) ne kabhi khizab bhi istemal farmaya tha? Unhon ne kaha ke aap (Sallallahu Alaihi Wasallam) ne kabhi khizab nahi lagaya. Sirf aap (Sallallahu Alaihi Wasallam) ki dono kanpatiyon par (sar mein) chand baal safaid thay
.

Mujh se Yahya Bin Bukair ne bayan kiya, kaha ke mujh se Laith ne bayan kiya, un se Khalid ne, un se Saeed Bin Abi Hilal ne, un se Rabee-ah Bin Abi Abdur Rahman ne bayan kiya ke mein ne Anas Bin Malik (Radi Allahu Anhu) se suna, aap ne Nabi Kareem (Sallallahu Alaihi Wasallam) ke ausaf-e-mubaraka bayan karte hue batlayai ke aap (Sallallahu Alaihi Wasallam) darmiyana qad ke thay. Na bahut lambe aur na choute qad wale. Rang khulta hua tha (surkh-o-safaid) na khali safaid thay aur na bilkul gandam goon. Aap ke baal na bilkul mare hue sakht qism ke thay aur na seedhe latke hue hi thay. Nuzool-e-wahi ke waqt aap ki umr chalis saal thi. Makkah mein aap ne das saal tak qiyam farmaya aur is poore arsa mein aap par wahi nazil hoti rahi aur Madinah mein bhi aap ka qiyam das saal tak raha. Aap ke sar aur darhi mein bees baal bhi safaid nahi hue thay. Rabee-ah (rawi-e-hadees) ne bayan kiya ke phir mein ne Aap (Sallallahu Alaihi Wasallam) ka ek baal dekha to wo laal tha mein ne is ke mutaliq poocha to mujhe bataya gaya ke khushbu lagate lagate laal ho gaya hai
.

Hum se Abdullah Bin Yusuf ne bayan kiya, unhon ne kaha hum ko Malik Bin Anas ne khabar di, unhein Rabee-ah Bin Abi Abdur Rahman ne aur unhon ne Anas Bin Malik (Radi Allahu Anhu) se suna, aap ne kaha ke Rasul Allah (Sallallahu Alaihi Wasallam) na bahut lambe thay aur na choute qad ke, na bilkul safaid thay aur na gandami rang ke. Na aap (Sallallahu Alaihi Wasallam) ke baal bahut zyada ghangriyalay thay aur na bilkul seedhe latke hue, Allah Ta'ala ne aap ko chalis saal ki umr mein nubuwwat di aur aap (Sallallahu Alaihi Wasallam) ne Makkah mein das saal tak qiyam kiya aur Madinah mein das saal tak qiyam kiya. Jab Allah Ta'ala ne aap (Sallallahu Alaihi Wasallam) ko wafat di to aap ke sar aur darhi ke bees baal bhi safaid nahi thay
.

Hum se Abu Abdullah Ahmad Bin Saeed ne bayan kiya, kaha hum se Ishaq Bin Mansoor ne bayan kiya, kaha hum se Ibrahim Bin Yusuf ne bayan kiya, un se un ke walid ne, un se Abu Ishaq ne bayan kiya ke mein ne Bara Bin Azib (Radi Allahu Anhuma) se suna, aap ne bayan kiya ke Rasul Allah (Sallallahu Alaihi Wasallam) husn-o-jamal mein bhi sab se barh kar thay aur jismani sakht mein bhi sab se behtar thay. Aap ka qad na bahut lanba tha aur na chouta (balkay darmiyana qad tha)
.

Hum se Mualla bin Asad ne bayan kiya, kaha hum se Wuhaib ne bayan kiya, in se Ayub Sakhtiyani ne, in se Muhammad bin Sireen ne bayan kiya ke main ne Anas razi Allahu anhu se poochha kya Nabi Karim salla Allahu alaihi wasallam ne khizhab istemal kiya tha? Bole ke Nabi Karim salla Allahu alaihi wasallam ke baal hi bahut kam sufaid huay thay.

Hum se Sulayman bin Harb ne bayan kiya, kaha hum se Hammad bin Zayd ne bayan kiya, in se Sabit ne bayan kiya ke Anas razi Allahu anhu se Nabi Karim salla Allahu alaihi wasallam ke khizhab ke mutalliq sawal kiya gaya to Ahwal ne kaha ke Nabi Karim salla Allahu alaihi wasallam ko khizhab ki naubat hi nahi aayi thi agar main Aap ki darhi ke sufaid baal gin-na chahta to gin sakta tha.

Hum se Ismail bin Abi Oways ne bayan kiya, kaha ke mujh se Imam Malik bin Anas ne bayan kiya, in se Rabia bin Abdur Rahman ne aur in se Anas bin Malik razi Allahu anhu ne, unhon ne in se suna ke woh bayan kar rahe thay ke Rasool Allah salla Allahu alaihi wasallam bahut lambe nahi thay aur na Aap chhote qad ke hi thay (balkay Aap ka beech wala qad tha) na Aap bilkul sufaid bhure thay aur na gandum-goon hi thay, Aap ke baal ghoun-gharyale uljhe huay nahi thay aur na bilkul seedhe latke huay thay. Allah Ta-ala ne Aap ko chalis saal ki umr mein Rasool banaya das saal Aap ne (Nabuwat ke baad) Makkah Mukarramah mein qiyam kiya aur das saal Madinah Munawwarah mein aur taqreeban saath saal ki umr mein Allah Ta-ala ne Aap ko wafat di. Wafat ke waqt Aap ke sar aur darhi mein bees baal bhi sufaid nahi thay.

Hum se Muslim bin Ibrahim ne bayan kiya, kaha hum se Jareer ne bayan kiya, in se Qatadah ne aur in se Anas bin Malik razi Allahu anhu ne bayan kiya ke Nabi Karim salla Allahu alaihi wasallam ke hath bhare huay thay main ne Nabi Karim salla Allahu alaihi wasallam ke baad Aap jaisa (khoobsurat koi aadmi) nahi dekha Aap ke sar ke baal miyana thay na ghoun-gharyale aur na bilkul seedhe latke huay.

Hum se Abu al-Nuayman ne bayan kiya, kaha hum se Jareer bin Hazim ne bayan ki, in se Qatadah ne aur in se Anas razi Allahu anhu ne bayan kiya ke Nabi Karim salla Allahu alaihi wasallam ke hath aur paon bhare huay thay. Chehra haseen o jameel tha, main ne Aap jaisa khoobsurat koi na pehle dekha aur na baad mein, Aap ki hatheliyaan kushada thien.

Aur Abu Hilal ne bayan kiya, in se Qatadah ne bayan kiya aur in se Anas razi Allahu anhu ya Jabir bin Abdullah razi Allahu anhuma ne ke Nabi Karim salla Allahu alaihi wasallam ki hatheliyaan aur qadam bhare huay thay, Aap jaisa phir main ne koi khoobsurat aadmi nahi dekha.