Hum se Ismail bin Abi Oways ne bayan kiya, kaha ke mujh se Imam Malik bin Anas ne bayan kiya, in se Rabia bin Abdur Rahman ne aur in se Anas bin Malik razi Allahu anhu ne, unhon ne in se suna ke woh bayan kar rahe thay ke Rasool Allah salla Allahu alaihi wasallam bahut lambe nahi thay aur na Aap chhote qad ke hi thay (balkay Aap ka beech wala qad tha) na Aap bilkul sufaid bhure thay aur na gandum-goon hi thay, Aap ke baal ghoun-gharyale uljhe huay nahi thay aur na bilkul seedhe latke huay thay. Allah Ta-ala ne Aap ko chalis saal ki umr mein Rasool banaya das saal Aap ne (Nabuwat ke baad) Makkah Mukarramah mein qiyam kiya aur das saal Madinah Munawwarah mein aur taqreeban saath saal ki umr mein Allah Ta-ala ne Aap ko wafat di. Wafat ke waqt Aap ke sar aur darhi mein bees baal bhi sufaid nahi thay.

Hum se Malik bin Ismail ne bayan kiya, kaha hum se Israeel ne, in se Abu Ishaq ne, kaha main ne Bara razi Allahu anhu se suna, unhon ne bayan kiya ke main ne surkh hulla mein Nabi Karim salla Allahu alaihi wasallam se zyada kisi ko khoobsurat nahi dekha (Imam Bukhari rahmahullah ne kaha ke) mujh se mere baaz as-hab ne Imam Malik rahmahullah se bayan kiya ke Nabi Karim salla Allahu alaihi wasallam ke sar ke baal shana e mubarak ke qareeb tak thay. Abu Ishaq ne bayan kiya ke main ne Bara razi Allahu anhu ko ek martaba se zyada yeh hadees bayan karte suna jab bhi woh yeh hadees bayan karte to muskurate. Is riwayat ki mutabia-t Shubah ne ki ke Nabi Karim salla Allahu alaihi wasallam ke baal Aap ke kaanon ki lau tak thay.

Hum se Abdullah bin Yusuf Taneesi ne bayan kiya, kaha hum ko Imam Malik ne khabar di, unhein Nafi ne aur unhein Abdullah bin Umar razi Allahu anhuma ne ke Rasool Allah salla Allahu alaihi wasallam ne farmaya raat Kaba ke paas mujhe dikhaya gaya, main ne dekha ke ek sahab hain gandumi rang, gandumi rang ke logon mein sab se zyada khoobsurat, in ke shanon tak lambe lambe baal hain aise baal wale logon mein sab se zyada khoobsurat, unhon ne baalon mein kangha kar rakkha hai aur is ki wajah se sar se pani tapak raha hai. Do aadmiyon ka sahara liye huay hain ya do aadmiyon ke shanon ka sahara liye huay hain aur Khana Kaba ka tawaf kar rahe hain, main ne poochha ke yeh kaun buzurg hain to mujhe bataya gaya ke yeh Esa ibn Maryam alaihissalam hain phir achanaak main ne ek uljhe huay ghoun-gharyale baal wale shakhs ko dekha, dayein aankh se kaana tha goya angoor hai jo ubhra hua hai. Main ne poochha yeh kaana kaun hai? Mujhe bataya gaya ke yeh Maseeh Dajjal hai.

Hum se Ishaq bin Mansoor ne bayan kiya, kaha hum ko Habban ne khabar di, kaha hum se Humam bin Yahya ne bayan kiya, kaha hum se Qatadah ne aur in se Anas bin Malik razi Allahu anhu ne bayan kiya ke Nabi Karim ke baal moondhon tak pahunchte thay.

Hum se Musa bin Ismail ne bayan kiya, kaha hum se Humam ne bayan kiya, in se Qatadah ne aur in se Anas razi Allahu anhu ne ke Nabi Karim salla Allahu alaihi wasallam ke (sar ke) baal moondhon tak pahunchte thay.

Mujh se Amr bin Ali ne bayan kiya, kaha hum se Wahb bin Jareer ne, kaha ke mujh se mere walid ne bayan kiya, in se Qatadah ne bayan kiya ke main ne Anas bin Malik razi Allahu anhu se Rasool Allah salla Allahu alaihi wasallam ke baalon ke mutalliq poochha to unhon ne kaha ke Aap ke baal darmiyana thay, na bilkul seedhe latke huay aur na ghoun-gharyale aur woh kaanon aur moondhon ke beech tak thay.

Hum se Muslim bin Ibrahim ne bayan kiya, kaha hum se Jareer ne bayan kiya, in se Qatadah ne aur in se Anas bin Malik razi Allahu anhu ne bayan kiya ke Nabi Karim salla Allahu alaihi wasallam ke hath bhare huay thay main ne Nabi Karim salla Allahu alaihi wasallam ke baad Aap jaisa (khoobsurat koi aadmi) nahi dekha Aap ke sar ke baal miyana thay na ghoun-gharyale aur na bilkul seedhe latke huay.

Hum se Abu al-Nuayman ne bayan kiya, kaha hum se Jareer bin Hazim ne bayan ki, in se Qatadah ne aur in se Anas razi Allahu anhu ne bayan kiya ke Nabi Karim salla Allahu alaihi wasallam ke hath aur paon bhare huay thay. Chehra haseen o jameel tha, main ne Aap jaisa khoobsurat koi na pehle dekha aur na baad mein, Aap ki hatheliyaan kushada thien.

Hum se Amr bin Ali ne bayan kiya, kaha hum se Muaz bin Hani ne bayan kiya, kaha hum se Humam bin Yahya ne bayan kiya, kaha hum se Qatadah ne bayan kiya aur in se Anas bin Malik razi Allahu anhu ne ya ek aadmi ne Abu Hurairah razi Allahu anhu se ke unhon ne bayan kiya ke Nabi Karim salla Allahu alaihi wasallam bhare huay qadmon wale thay, nihayat hi haseen o jameel, Aap jaisa khoobsurat main ne Aap ke baad kisi ko nahi dekha.

Hum se Amr bin Ali ne bayan kiya, kaha hum se Muaz bin Hani ne bayan kiya, kaha hum se Humam bin Yahya ne bayan kiya, kaha hum se Qatadah ne bayan kiya aur in se Anas bin Malik razi Allahu anhu ne ya ek aadmi ne Abu Hurairah razi Allahu anhu se ke unhon ne bayan kiya ke Nabi Karim salla Allahu alaihi wasallam bhare huay qadmon wale thay, nihayat hi haseen o jameel, Aap jaisa khoobsurat main ne Aap ke baad kisi ko nahi dekha.