Aur Laith ne bayan kiya ke mujh se Abu Al-Aswad Muhammad ne bayan kiya aur un se Urwah Bin Zubair ne bayan kiya ke Abdullah Bin Zubair (Radi Allahu Anhuma) Bani Zuhrah ke chand logon ke sath Aisha (Radi Allahu Anha) ke pas gaye. Aisha (Radi Allahu Anha) Bani Zuhrah ke sath bahut acchi tarah pesh aati thien kyunke in logon ki Rasul Allah (Sallallahu Alaihi Wasallam) se qarabut thi
.

Hum se Abdullah Bin Yusuf ne bayan kiya, unhon ne kaha hum se Laith ne bayan kiya, un se Aqeel ne bayan kiya, un se Ibn Shihab ne bayan kiya, un se Ibn Musayyab ne bayan kiya aur un se Jubair Bin Mut'im (Radi Allahu Anhu) ne bayan kiya ke mein aur Usman Bin Affan (Radi Allahu Anhu) Rasul Allah (Sallallahu Alaihi Wasallam) ki khidmat mein hazir hue aur arz kiya, Ya Rasul Allah! Aap ne Banu Muttalib ko to inayait farmaya lekin hum ko chhod diya, halanke hum ko Aap se wahi rishta hai jo Banu Muttalib ko Aap se hai. Nabi Kareem (Sallallahu Alaihi Wasallam) ne farmaya ke Banu Muttalib aur Banu Hashim ek hi hai. Laith ne bayan kiya ke mujh se Yunus ne bayan kiya aur (is riwayat mein) ye ziyadati ki ke Jubair (Radi Allahu Anhu) ne kaha Nabi Kareem (Sallallahu Alaihi Wasallam) ne Banu Abd-e-Shams aur Banu Naufal ko nahi diya tha, aur Ibn Ishaq (Sahib-e-Maghazi) ne kaha hai ke Abd-e-Shams, Hashim aur Muttalib ek maan se thay aur un ki maan ka naam Aatika Bin Murra tha aur Naufal baap ki taraf se un ke bhai thay (un ki maan doosri theen)
.

Hum se Abdullah Bin Yusuf ne bayan kiya, kaha hum se Laith Bin Saad ne, kaha ke mujh se Abu Al-Aswad ne, un se Urwah Bin Zubair ne bayan kiya ke Nabi Kareem (Sallallahu Alaihi Wasallam) aur Abu Bakr (Radi Allahu Anhu) ke baad Abdullah Bin Zubair (Radi Allahu Anhuma) se Aisha (Radi Allahu Anha) ko sab se zyada muhabbat thi. Aisha (Radi Allahu Anha) ki aadat thi ke Allah Ta'ala ki taraf se jo rizq bhi un ko milta wo ise sadqa kar diya karti thien. Abdullah Bin Zubair (Radi Allahu Anhuma) ne (kisi se) kaha Umm-ul-Momineen ko is se rokna chahiye (jab Aisha (Radi Allahu Anha) ko un ki baat pahunchi) to unhon ne kaha: Kya ab mere hathon ko roka jaye ga, ab agar mein ne Abdullah se baat ki to mujh par nazar wajib hai. Abdullah Bin Zubair (Radi Allahu Anhuma) ne (Aisha (Radi Allahu Anha) ko raazi karne ke liye) Quraish ke chand logon aur khass taur se Rasul Allah (Sallallahu Alaihi Wasallam) ke nanahali rishtedaron (Banu Zuhrah) ko un ki khidmat mein maafi ki sifarish ke liye bheja lekin Aisha (Radi Allahu Anha) phir bhi na maanein. Is par Banu Zuhrah ne jo Rasul Allah (Sallallahu Alaihi Wasallam) ke mamoon hote thay aur un mein Abdur Rahman Bin Aswad Bin Abdi Yaghous aur Miswar Bin Makhramah (Radi Allahu Anhu) bhi thay, Abdullah Bin Zubair (Radi Allahu Anhuma) se kaha ke jab hum un ki ijazat se wahan ja baithein to tum ek dafa aan kar parda mein ghus jao. Chunancha unhon ne aisa hi kiya (jab Aisha (Radi Allahu Anha) khush ho gayeen to) unhon ne un ki khidmat mein das ghulam (aazad karane ke liye bataur kaffara-e-qasam) bheje aur Umm-ul-Momineen ne unhein aazad kar diya. Phir aap barabar ghulam aazad karti rahein. Yahan tak ke chalis ghulam aazad kar diye phir unhon ne kaha kash mein ne jis waqt qasam khayi thi (mannat mani thi) to mein koi khass cheez bayan kar deti jis ko kar ke mein farigh ho jati
.

Hum se Yahya Bin Bukair ne bayan kiya ‘ unhon ne kaha hum se Laith Bin Saad ne bayan kiya ‘ in se Yunus ne ‘ in se Ibn Shihab ne ‘ in se Saeed Bin Musayyab ne aur unhein Jubair Bin Mut'im Radi Allahu Anhu ne khabar di ke mein aur Usman Bin Affan Radi Allahu Anhu Nabi Kareem Sallallahu Alaihi Wasallam ki khidmat mein hazir hue. Hum ne arz kiya ke Aap ne Banu Muttalib ko to Khaibar ke khums mein se inayait farmaya hai aur humein nazar andaz kar diya hai halanke Aap se qarabat mein hum aur wo baraber thay. Aap Sallallahu Alaihi Wasallam ne farmaya yaqeenan Banu Hashim aur Banu Muttalib ek hain. Jubair Bin Mut'im Radi Allahu ne bayan kiya ke Aap Sallallahu Alaihi Wasallam ne Banu Abd Shams aur Banu Naufal ko (khums mein se) kuch nahi diya tha
.

Hum se Abu al-Yaman ne bayan kiya, kaha hum ko Shuayb ne khabar di, in se Zuhri ne, kaha mujh se Auf bin Malik bin Tufail ne bayan kiya woh Rasool Allah salla Allahu alaihi wasallam ki zauja mutahhara Aisha razi Allahu anha ke madari bhatije thay, unhon ne kaha ke Aisha razi Allahu anha ne koi cheez bheji ya khairat ki to Abdullah bin Zubayr jo in ke bhanje thay kehne lage ke Aisha razi Allahu anha ko aise muamlon se baaz rehna chahiye nahi to Allah ki qasam main in ke liye hajr ka hukm jaari kar doon ga. Umm al-Momineen ne kaha kya us ne yeh alfaz kahe hain? Logon ne bataya ke ji haan. Farmaya phir main Allah se nazr karti hoon ke Ibn Zubayr razi Allahu anhuma se ab kabhi nahi boloon gi. Is ke baad jab in ke qata-talluqi par arsa guzar gaya. To Abdullah bin Zubayr razi Allahu anhuma ke liye in se sifarish ki gayi (ke unhein maaf farma dein) Umm al-Momineen ne kaha hargiz nahi, Allah ki qasam! Is ke baare mein koi sifarish nahi manoon gi aur apni nazr nahi toroon gi. Jab yeh qati talluq Abdullah bin Zubayr razi Allahu anhuma ke liye bahut takleef-deh ho gayi to unhon ne Miswar bin Makhrama aur Abd-ur-Rahman bin Aswad bin Abd Yaghoos razi Allahu anhum se is silsile mein baat ki woh donon Bani Zuhra se talluq rakhte thay. Unhon ne in se kaha ke main tumhein Allah ka wasta deta hoon kisi tarah tum log mujhe Aisha razi Allahu anha ke hujra mein dakhil kara do kyunke in ke liye yeh jaiz nahi ke mere saath sila-rahmi ko torne ki qasam khayein chunanche Miswar aur Abd-ur-Rahman donon apni chadron mein lipte huay Abdullah bin Zubayr razi Allahu anhuma ko is mein saath le kar aaye aur Aisha razi Allahu anha se andar aane ki ijazat chahi aur arz ki as-salaamu alaykum wa rahmatullaahi wa barakaatuhu, kya hum andar aa sakte hain? Aisha razi Allahu anha ne kaha aa jao. Unhon ne arz kiya hum sab? Kaha haan, sab aa jao. Umm al-Momineen ko is ka ilm nahi tha ke Abdullah bin Zubayr razi Allahu anhuma bhi in ke saath hain. Jab yeh andar gaye to Abdullah bin Zubayr razi Allahu anhuma parda hata kar andar chale gaye aur Umm al-Momineen razi Allahu anha se lipat kar Allah ka wasta dene lage aur rone lage (ke maaf kar dein, yeh Umm al-Momineen ke bhanje thay) Miswar aur Abd-ur-Rahman bhi Umm al-Momineen ko Allah ka wasta dene lage ke Abdullah bin Zubayr razi Allahu anhuma se bolein aur unhein maaf kar dein in hazrat ne yeh bhi arz kiya ke jaisa ke tum ko maloom hai Nabi Karim salla Allahu alaihi wasallam ne talluq torne se mana kiya hai ke kisi Musalman ke liye jaiz nahi ke kisi apne bhai se teen din se zyada wali hadees yaad dilane lage aur yeh ke is mein nuqsan hai to Umm al-Momineen bhi unhein yaad dilane lagein aur rone lagein aur farmane lagein ke main ne to qasam kha li hai? Aur qasam ka muamla sakht hai lekin yeh buzurg log barabar koshish karte rahe, yahan tak ke Umm al-Momineen ne Abdullah bin Zubayr razi Allahu anhuma se baat kar li aur apni qasam (torne) ki wajah se chalis ghulam aazad kiye. Is ke baad jab bhi Aap yeh qasam yaad kartien to rone lagtien aur Aap ka dupatta aansuon se tar ho jata.