Hum se Abu Al-Yaman ne bayan kiya, kaha hum ko Shuaib ne khabar di, un se Zuhri ne bayan kiya ke Muhammad Bin Jubair Bin Mut-im bayan karte thay ke Muawiyah (Radi Allahu Anhu) tak ye baat pahunchi jab wo Quraish ki ek jamaat mein thay ke Abdullah Bin Amr Bin Al-Aas (Radi Allahu Anhuma) ye hadees bayan karte hain ke an-qareeb (qurb-e-qiyamat mein) Bani Qahtan se ek hukmran uthe ga. Ye sun kar Muawiyah (Radi Allahu Anhu) ghussa ho gaye, phir Aap khutba dene uthe aur Allah Ta'ala ki is ki shan ke mutabiq hamd-o-sana ke baad farmaya: Logo! Mujhe maloom hua hai ke baaz log aisi ahadees bayan karte hain jo na to Quran Majeed mein maujood hain aur na Rasul Allah (Sallallahu Alaihi Wasallam) se manqool hain. Dekho! Tum mein sab se jahil yehi log hain. In se aur un ke khayalat se bachte raho jin khayalat ne un ko gumrah kar diya hai. Mein ne Nabi Kareem (Sallallahu Alaihi Wasallam) se ye suna hai ke ye khilafat Quraish mein rahe gi aur jo bhi un se dushmani kare ga Allah Ta'ala is ko sar-nagoon aur oundha kar de ga jab tak wo (Quraish) deen ko qaim rakkhein ge
.

Hum se Abu Al-Walid ne bayan kiya, kaha hum se Asim Bin Muhammad ne bayan kiya, kaha ke mein ne apne walid se suna aur unhon ne Ibn Umar (Radi Allahu Anhuma) se ke Nabi Kareem (Sallallahu Alaihi Wasallam) ne farmaya "Ye khilafat is waqt tak Quraish ke hathon mein baqi rahe gi jab tak ke un mein do aadmi bhi baqi rahein
."

Hum se Yahya Bin Bukair ne bayan kiya, kaha hum se Laith Bin Saad ne bayan kiya, un se Aqeel ne, un se Ibn Shihab ne, un se Ibn Musayyib ne aur un se Jubair Bin Mut-im ne bayan kiya ke mein aur Usman Bin Affan (Radi Allahu Anhuma) dono mil kar Nabi Kareem (Sallallahu Alaihi Wasallam) ke pas gaye aur hum ne arz kiya: Ya Rasul Allah (Sallallahu Alaihi Wasallam)! Banu Muttalib ko to aap ne ata farmaya aur humein (Bani Umayyah ko) nazar andaz kar diya halanke aap ke liye hum aur wo ek hi darje ke hain. Nabi Kareem (Sallallahu Alaihi Wasallam) ne farmaya " (Ye sahih hai) magar Banu Hashim aur Banu Muttalib ek hi hain
."

Aur Laith ne bayan kiya ke mujh se Abu Al-Aswad Muhammad ne bayan kiya aur un se Urwah Bin Zubair ne bayan kiya ke Abdullah Bin Zubair (Radi Allahu Anhuma) Bani Zuhrah ke chand logon ke sath Aisha (Radi Allahu Anha) ke pas gaye. Aisha (Radi Allahu Anha) Bani Zuhrah ke sath bahut acchi tarah pesh aati thien kyunke in logon ki Rasul Allah (Sallallahu Alaihi Wasallam) se qarabut thi
.

Hum se Abu Nuaim ne bayan kiya, unhon ne kaha hum se Sufyan ne bayan kiya aur un se Saad Bin Ibrahim ne (doosri sanad) Yaqub Bin Ibrahim ne kaha ke hamare walid ne hum se bayan kiya aur un se un ke walid ne, kaha mujh se Abdur Rahman Bin Hurmuz Al-Aaraj ne bayan kiya aur un se Abu Hurairah (Radi Allahu Anhu) ne ke Nabi Kareem (Sallallahu Alaihi Wasallam) ne farmaya "Quraish, Ansar, Juhainah, Muzainah, Aslam, Ashja aur Ghifar in sab qabilon ke log mere khair-khwah hain aur un ka bhi Allah aur is ke Rasul ke siwa koi humayati nahi hai
."

Hum se Abdullah Bin Yusuf ne bayan kiya, kaha hum se Laith Bin Saad ne, kaha ke mujh se Abu Al-Aswad ne, un se Urwah Bin Zubair ne bayan kiya ke Nabi Kareem (Sallallahu Alaihi Wasallam) aur Abu Bakr (Radi Allahu Anhu) ke baad Abdullah Bin Zubair (Radi Allahu Anhuma) se Aisha (Radi Allahu Anha) ko sab se zyada muhabbat thi. Aisha (Radi Allahu Anha) ki aadat thi ke Allah Ta'ala ki taraf se jo rizq bhi un ko milta wo ise sadqa kar diya karti thien. Abdullah Bin Zubair (Radi Allahu Anhuma) ne (kisi se) kaha Umm-ul-Momineen ko is se rokna chahiye (jab Aisha (Radi Allahu Anha) ko un ki baat pahunchi) to unhon ne kaha: Kya ab mere hathon ko roka jaye ga, ab agar mein ne Abdullah se baat ki to mujh par nazar wajib hai. Abdullah Bin Zubair (Radi Allahu Anhuma) ne (Aisha (Radi Allahu Anha) ko raazi karne ke liye) Quraish ke chand logon aur khass taur se Rasul Allah (Sallallahu Alaihi Wasallam) ke nanahali rishtedaron (Banu Zuhrah) ko un ki khidmat mein maafi ki sifarish ke liye bheja lekin Aisha (Radi Allahu Anha) phir bhi na maanein. Is par Banu Zuhrah ne jo Rasul Allah (Sallallahu Alaihi Wasallam) ke mamoon hote thay aur un mein Abdur Rahman Bin Aswad Bin Abdi Yaghous aur Miswar Bin Makhramah (Radi Allahu Anhu) bhi thay, Abdullah Bin Zubair (Radi Allahu Anhuma) se kaha ke jab hum un ki ijazat se wahan ja baithein to tum ek dafa aan kar parda mein ghus jao. Chunancha unhon ne aisa hi kiya (jab Aisha (Radi Allahu Anha) khush ho gayeen to) unhon ne un ki khidmat mein das ghulam (aazad karane ke liye bataur kaffara-e-qasam) bheje aur Umm-ul-Momineen ne unhein aazad kar diya. Phir aap barabar ghulam aazad karti rahein. Yahan tak ke chalis ghulam aazad kar diye phir unhon ne kaha kash mein ne jis waqt qasam khayi thi (mannat mani thi) to mein koi khass cheez bayan kar deti jis ko kar ke mein farigh ho jati
.