Hum se Qutaibah Bin Saeed ne bayan kiya unhon ne kaha hum se Laith ne unhon ne kaha ke hum se Nafay ne bayan kiya aur un se Abdullah Bin Umar (Radi Allahu Anhuma) ne ke Rasul Allah (Sallallahu Alaihi Wasallam) ne farmaya "Tumhara zamana pichli ummaton ke muqable mein aisa hai jaise asar se maghrib tak ka waqt hai tumhari misal Yahood-o-Nasara ke sath aisi hai jaise kisi shakhs ne kuch mazdoor liye aur kaha ke mera kaam aadhe din tak kaun ek ek qiraat ki ujrat par kare ga? Yahood ne aadhe din tak ek ek qiraat ki mazdoori par kaam karna tay kar liya. Phir is shakhs ne kaha ke aadhe din se asar ki namaz tak mera kaam kaun shakhs ek ek qiraat ki mazdoori par kare ga. Ab Nasara ek ek qiraat ki mazdoori par aadhe din se asar ke waqt tak mazdoori karne par tayyar ho gaye. Phir is shakhs ne kaha ke asar ki namaz se sooraj doobne tak do do qiraat par kaun shakhs mera kaam kare ga? Tumhein maloom hona chahiye ke wo tumhein ho jo do do qiraat ki mazdoori par asar se sooraj doobne tak kaam karo ge. Tum aagah raho ke tumhari mazdoori dugni hai. Yahood-o-Nasara is faisla par ghussa ho gaye aur kehne lage ke kaam to hum zyada karein aur mazdoori humein ko kam mile. Allah Ta'ala ne un se farmaya kya mein ne tumhein tumhara haq dene mein koi kami ki hai? Unhon ne kaha ke nahi. Allah Ta'ala ne farmaya ke phir ye mera fazal hai mein jise chahoon zyada doon."

Hum se Abdul Aziz bin Abdullah Uwaisi ne bayan kiya , kaha mujh se Ibrahim bin Saad ne Ibn Shihab se , unhon ne Salim bin Abdullah bin Umar raziyallahu anhuma se , unhon ne apne walid Abdullah bin Umar raziyallahu anhuma se ke unhon ne Rasool Allah salla Allahu alaihi wa sallam se suna aap salla Allahu alaihi wa sallam farma rahe thay ke tum se pehle ki ummaton ke muqable mein tumhari zindagi sirf itni hai jitna asr se sooraj doobne tak ka waqt hota hai . Torah walon ko Torah di gayi . To unhon ne is par subah se amal kiya . Aadhe din tak phir woh aajiz aa gaye , kaam poora na kar sake , un logon ko un ke amal ka badla ek ek qeerat diya gaya . Phir Injeel walon ko Injeel di gayi , unhon ne aadhe din se asr tak is par amal kiya , aur woh bhi aajiz aa gaye . Un ko bhi ek ek qeerat un ke amal ka badla diya gaya . Phir asr ke waqt hum ko Quran mila . Hum ne is par sooraj ke ghuroob hone tak amal kiya aur kaam poora kar diya humein do do qeerat sawab mila . Is par un dono kitab walon ne kaha . Aye hamare Parwardigar! inhein to aap ne do do qeerat diye aur humein sirf ek ek qeerat . Halanke amal hum ne in se zyada kiya . Allah azzawajal ne farmaya , to kya mein ne ajr dene mein tum par kuch zulm kiya . Unhon ne arz ki ke nahi . Allah Taala ne farmaya ke phir yeh zyada ajr dena mera fazl hai jisay mein chahun de sakta hun .

Hum se Musaddad bin Musarhad ne byaan kiya, un se Yahya bin Saeed Ansari ne byaan kiya, un se Sufyan Sawri ne kaha ke mujh se Abdullah bin Dinar ne byaan kiya, kaha ke main ne Abdullah bin Umar razi Allahu anhuma se suna, Nabi Karim salla Allahu alaihi wasallam ne farmaya ke Musalmano! Guzri ummaton ki umron ke muqabla mein tumhari umr aaisi hai jaise Asr se sooraj doobne tak ka waqt hota hai aur tumhari aur Yahud o Nasara ki misal aaisi hai ke kisi shakhs ne kuch mazdoor kaam par lagaye aur in se kaha ke ek qiraat mazdoori par mera kaam subah se dopahar tak kaun kare ga? Yeh kaam Yahudiyon ne kiya. Phir us ne kaha ke ab mera kaam aadhe din se Asr tak (ek hi qiraat mazdoori par) kaun kare ga? Yeh kaam Nasara ne kiya. Phir tum ne Asr se Maghrib tak do do qiraat mazdoori par kaam kiya. Yahud o Nasara Qayamat ke din kahein ge hum ne kaam zyada kiya lekin mazdoori kam paayi? Allah Ta'ala farmaye ga kiya tumhara kuch haq maara gaya? Woh kahein ge ke nahi. Phir Allah Ta'ala farmaye ga ke phir yeh mera fazl hai, main jise chahoon aur jitna chahoon ata karoon.

Hum se Hakam bin Nafi ne bayan kiya , unhon ne kaha hum ko Shuayb ne khabar di , unhein Zuhri ne , kaha mujhko Salim bin Abdullah ne khabar di aur in se Abdullah bin Umar razi Allahu anhuma ne bayan kiya ke main ne Rasool Allah salla Allahu alaihi wasallam se suna , Aap mimbar par khare farma rahe thay ke tumhara zamana guzashta ummaton ke muqabla mein aisa hai jaise Asr se sooraj doobne tak ka waqt hota hai . Tauraat walon ko Tauraat di gayi aur unhon ne is par amal kiya , yahan tak ke din aadha ho gaya . Phir woh aajizh ho gaye to unhein is ke badle mein ek qiraat diya gaya . Phir Ahl e Injeel ko Injeel di gayi to unhon ne is par Asr ki namaz ke waqt tak amal kiya aur phir woh amal se aajizh aa gaye to unhein bhi ek ek qiraat diya gaya . Phir tumhein Quran diya gaya aurtum ne is par sooraj doobne tak amal kiya aur tumhein is ke badle mein do do qiraat diye gaye . Ahl e Tauraat ne is par kaha ke Ae hamare Rabb! yeh log Musalman sab se kam kaam karne wale aur sab se zyada ajar paane wale hain . Allah Ta'ala ne is par farmaya ke kiya main ne tumhein ajar dene mein koi na-insafi ki hai ? Woh bole ke nahi! to Allah Ta'ala farmaya ke yeh to mera fazhl hai , main jis par chahta hoon karta hoon .

Hum se Abdan ne bayan kiya , unhon ne kaha hum ko Abdullah bin Mubarak ne khabar di , unhein Yunus ne khabar di , unhein Zuhri ne , unhein Salim ne khabar di aur unhein Abdullah bin Umar raziAllahu anhuma ne ke Rasool Allah salla Allahu alaihi wasallam ne farmaya ”guzashta ummaton ke muqabla mein tumhara wujood aisa hai jaise Asr aur Maghrib ke darmiyan ka waqt , Ahl e Tauraat ko Tauraat di gayi to unhon ne is par amal kiya yahan tak ke din aadha ho gaya aur woh aajizh ho gaye . Phir unhein ek ek qiraat diya gaya . Phir Ahl e Injeel ko Injeel di gayi aur unhon ne is par amal kiya yahan tak ke Asr ki namaz ka waqt ho gaya , unhein bhi ek ek qiraat diya gaya . Phir tumhein Quran diya gaya aurtum ne is par amal kiya yahan tak ke Maghrib ka waqt ho gaya , tumhein do do qiraat diye gaye , is par Ahl e Kitab ne kaha ke yeh hamase amal mein kam hain aur ajar mein zyada . Allah Ta'ala ne farmaya kiya main ne tumhara haq dene mein koi zhulm kiya hai ? Unhon ne jawab diya ke nahi . Allah Ta'ala ne farmaya ke phir yeh mera fazhl hai main jise chahoon doon .