Mujh se Ishaq Bin Nasr ne bayan kiya, kaha hum se Abu Usama ne bayan kiya, un se Aamash ne, un se Abu Salih ne aur un se Abu Said Khudri (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne farmaya ke Allah Ta'ala (qiyamat ke din) farmaye ga, Ae Aadam! Aadam Alaihis Salam arz kareinge mein ita'at ke liye hazir hoon, musta-id hoon, saari bhalaiyaan sirf tere hi hath mein hain. Allah Ta'ala farmaye ga, jahannum mein jane walon ko (logon mein se alag) nikal lo. Aadam Alaihis Salam arz kareinge. Ae Allah! Jahannumiyon ki tadaad kitni hai? Allah Ta'ala farmaye ga ke har ek hazar mein se nau so nannaway. Is waqt (ki houl-naki aur wahshat se) bacche boodhe ho jayeinge aur har hamila aurat apna hamal gira de gi. Is waqt tum (khauf-o-dahshat se) logon ko mad-hoshi ke aalam mein dekhoge, halanke wo behosh na honge. Lekin Allah ka azab bada hi sakht ho ga. Sahaba ne arz kiya: Ya Rasul Allah! Wo ek shakhs hum mein se kaun ho ga? Nabi Kareem (Sallallahu Alaihi Wasallam) ne farmaya ke tumhein bisharat ho, wo ek aadmi tum mein se ho ga aur ek hazar dozakhi Yaajooj Maajooj ki qaum se honge. Phir Nabi Kareem (Sallallahu Alaihi Wasallam) ne farmaya is zaat ki qasam jis ke hath mein meri jaan hai, mujhe umeed hai ke tum (ummat-e-muslima) tamam jannat walon ke ek tihayi hoge. Phir hum ne Allahu Akbar kaha to Aap (Sallallahu Alaihi Wasallam) ne farmaya ke mujhe umeed hai ke tum tamam jannat walon ke aadhe hoge phir hum ne Allahu Akbar kaha, phir Aap (Sallallahu Alaihi Wasallam) ne farmaya ke (mahshar mein) tum log tamam insano ke muqabale mein itne hoge jitne kisi safaid bail ke jism par ek siyah baal, ya jitne kisi siyah bail ke jism par ek safaid baal hota hai
.

Hum se Umar bin Hafs bin Ghiyas ne byaan kiya , kaha hum se hamare walid ne , kaha hum se Aamash ne , un se Abu Salih ne aur un se Abu Saeed Khudri razi Allahu anhu ne byaan kiya ke Rasool Allah salla Allahu alaihi wasallam ne farmaya ke Allah Paak Qayamat ke din Adam alaihissalam se farmaye ga . Ae Adam! Woh arz karein ge , main hazir hoon Ae Rabb! Teri farman-bardari ke liye . Parvardigar aawaz se pukare ga (ya farishta Parvardigar ki taraf se aawaz de ga) Allah hukm deta hai ke apni aulad mein se dozakh ka jattha nikalo . Woh arz karein ge Ae Parvardigar! Dozakh ka jattha kitna nikaloon . Hukm ho ga (rawi ne kaha main samajhta hoon) har hazar aadmiyon mein nau sau ninanway (goya hazar mein ek jannati ho ga) yeh aisa sakht waqt ho ga ke pait wali ka hamal gir jaye ga aur bacha (fikr ke maarey) burha ho jaye ga (yani jo bachpan mein mara ho) aur tu Qayamat ke din logon ko aisa dekhe ga jaise woh nasha mein matwale ho rahe hain haalan ke un ko nasha na ho ga balkay Allah ka azab aisa sakht ho ga (yeh hadees jo sahabah hazir thay un par sakht guzri . Un ke chehre (maarey darr ke) badal gaye . Is waqt Nabi Karim salla Allahu alaihi wasallam ne un ki tasalli ke liye farmaya (tum itna kyun darte ho) agar Yajooj Majooj (jo kafir hain) ki nasl tum se milayi jaye to un mein se nau sau ninanway ke muqabil tum mein se ek aadmi pare ga . Gharz tum log hashr ke din doosre logon ki nisbat (jo dozakhi hon ge) aise ho ge jaise safaid bail ke jism par ek baal kala hota hai ya jaise kale bail ke jism par ek do baal safaid hote hain aur mujh ko umeed hai tum log saare jannatiyon ka chauthayi hissa ho ge (baqi teen hisson mein aur sab ummatein hon gi) . Yeh sun kar hum ne Allahu Akbar kaha . Phir Aap salla Allahu alaihi wasallam ne farmaya nahi balkay tum tihayi ho ge hum ne phir naara e takbeer buland kiya phir farmaya nahi balkay aadha hissa ho ge (aadhe hissa mein aur ummatein hon gi) hum ne phir naara e takbeer buland kiya aur Abu Usamah ne Aamash se yun riwayat kiya «taran-naasa sukaara wa ma hum bi-sukaara» jaise mashhoor qirat hai aur kaha ke har hazar mein se nau sau ninanway nikalo (to un ki riwayat Hafs bin Ghiyas ke muwafiq hai) aur Jareer bin Abdul Hameed aur Esa bin Yunus aur Abu Muawiyah ne yun naqal kiya «sukara wa ma hum bi-sukara» (Hamzah aur Kasai ki bhi yahi qirat hai) .

Hum se Ismail bin Oways ne bayan kiya , kaha mujh se mere bhai ne bayan kiya , in se Sulayman ne , in se Sawr ne , in se Abu al-Ghais ne , in se Abu Hurairah razi Allahu anhu ne aur in se Nabi Karim salla Allahu alaihi wasallam ne farmaya ke Qayamat ke din sab se pehle Adam alaihissalam ko pukara jaye ga . Phir in ki nasl unhein dekhe gi to kaha jaye ga ke yeh tumhare buzurg dada Adam hain . (pukaarne par) woh kahein ge ke labbaik wa sadaik . Allah Ta'ala farmaye ga ke apni nasl mein se dozakh ka hissa nikaal lo . Adam alaihissalam arz karein ge Ae Parvardigar! Kitnon ko nikaaloon ? Allah Ta'ala farmaye ga feesad (ninaanway feesad dozakhi ek jannati) . Sahabah rizwan-ullaahi alaihim ne arz kiya: ya Rasool Allah! Jab hum mein sau mein ninaanway nikaal diye jayein to phir baaqi kya reh jayein ge ? Nabi Karim salla Allahu alaihi wasallam ne farmaya ke tamam ummaton mein meri ummat itni hi tadaad mein ho gi jaise siyah bail ke jism par sufaid baal hote hain .

Mujh se Yusuf bin Musa Qattan ne bayan kiya , kaha hum se Jareer bin Abd-ul-Hameed ne bayan kiya , in se Aamash ne , in se Abu Salih ne aur in se Abu Saeed Khudri razi Allahu anhu ne bayan kiya ke Nabi Karim salla Allahu alaihi wasallam ne farmaya ke Allah Ta'ala farmaye ga , Ae Adam! Adam alaihissalam kahein ge hazir hoon farman-bardar hoon aur har bhalayi tere hath mein hai . Allah Ta'ala farmaye ga jo log jahannum mein daale jayein ge unhein nikaal lo . Adam alaihissalam poochhein ge jahannum mein daale jaane wale log kitne hain ? Allah Ta'ala farmaye ga ke har ek hazar mein se nau sau ninaanway . Yahi woh waqt ho ga jab bache gham se burhay ho jayein ge aur haamila auratein apna hamal gira dein gi aur tum logon ko nasha ki halat mein dekho ge , haalan-ke woh waqeyi nasha ki halat mein na hon ge balkay Allah ka azab sakht ho ga . Sahabah ko yeh baat bahut sakht maloom hui to unhon ne arz kiya: ya Rasool Allah! Phir hum mein se woh (khush-naseeb) shakhs kaun ho ga ? Nabi Karim salla Allahu alaihi wasallam ne farmaya ke tumhein khush-khabri ho , ek hazar Ya-jooj Ma-jooj ki qaum se hon ge . Aur tum mein se woh ek jannati ho ga phir Aap salla Allahu alaihi wasallam ne farmaya is zaat ki qasam jis ke hath mein meri jaan hai , mujhe umeed hai ke tum log ahal e jannat ka ek tihayi hissa ho ge . Rawi ne bayan kiya ke hum ne is par Allah ki hamd bayan ki aur is ki takbeer kahi . Phir Nabi Karim salla Allahu alaihi wasallam ne farmaya is zaat ki qasam jis ke hath mein meri jaan hai mujhe umeed hai ke aadha hissa ahal e jannat ka tum log ho ge . Tumhari misal doosri ummaton ke muqabla mein aaisi hai jaise kisi siyah bail ke jism par sufaid baalon ki (mamooli tadaad) hoti hai ya woh sufaid daagh jo gadhe ke aage ke paon par hota hai .

Hum se Umar bin Hafs bin Ghiyas ne bayan kiya , unhon ne kaha hum se hamare walid ne bayan kiya , unhon ne kaha hum se Aamash ne bayan kiya , in se Abu Salih ne bayan kiya aur in se Abu Saeed Khudri razi Allahu anhune bayan kiya ke Nabi Karim salla Allahu alaihi wasallam ne farmaya ”Allah Ta'ala farmaye ga , Ae Adam! woh kahein ge «lab-baika wa sa-daika» phir buland aawaz se nida de ga ke Allahtumhein hukm deta hai ke apni nasl mein se dozakh ka lashkar nikaal .“