Allah Ta'ala ne Surah Al-Kahf mein farmaya "qaaloo ya za-l-qarnaini inna yajooji wa-majooji mufsidoona fil ardhi" "Wo log kehne lage: Ae Zulqarnain! Yaajooj aur Maajooj log mulk mein bahut fasad macha rahe hain."
.

Allah Ta'ala ka ye farmana "wa-yas'alūnaka an zi-l-qarnaini qul sa-atlu alaikum minhu zikran * inna makkanna lahu fil ardhi wa-aatainahu min kulli shai-in sababan * fa-attaba-a sababan" "Aur Aap se (Ae rasul) Zulqarnain (badshah) ke mutalliq ye log poochte hain. (Aap farma dein ke) un ka qissa mein abhi tumhare samne bayan karta hoon hum ne use zameen ki hukumat di thi aur hum ne is ko har tarah ka saman ata farmaya tha phir wo ek samt chal nikla..." Allah Ta'ala ke irshad "aatūni zubara-l-hadīdi" "Tum log mere paas lohe ki chadrain lao", tak. "Zubarun" ka wahid "zubratun" hai aur "zubratun" tukde ko kehte hain "yahan tak ke jab us ne in dono pahadon ke barabar deewar utha di." "Sadafaini" se pahad murad hain. Ibn Abbas (Radi Allahu Anhuma) se ("baina-s-sadafaini" ki tafseer mein manqool hai) aur "al-saddaini al-sadafaini" ki doosri qirat bhi "al-jabalaini" (do pahad) ke maane mein hai. "Kharjan" ba-maane mahsool-e-ujrat, Zulqarnain ne (amla se) kaha ke ab is deewar ko aag se dhonko yahan tak ke jab ise aag bana diya to kaha ab mere paas pighla hua seesa tanba lao to mein is par daal doon "uf-righ alaihi qitran" ke maane hain ke mein is par pighla hua seesa daal doon ("qitrun" ke maane) baaz ne lohe (pighle hue se) kiye hain aur baaz ne peetal se, Ibn Abbas (Radi Allahu Anhuma) ne is ka maane tanba bataya hai. Phir qaum-e-Yaajooj-o-Maajooj ke log (is sadd ke baad) is par chadh na sake "yaz-haroohu" ba-maane "yaloohu", "ata-atu lahu" se istif-aal ka seegha hai. Isi liye "astā-a" "yastī-u" "yastatī-u" bhi parhte hain aur Yaajooj Maajooj is mein surakh bhi na kar sake. Zulqarnain ne kaha ke ye mere parwardigar ki ek rehmat hai phir jab mere parwardigar ka muqarrara waada aa pahunchega to wo is deewar ko "dakkan" yaani zameen ke sath mila dega, Arab ke log isi se bolte hain "naqatun dakka-u" jis se murad wo ont hai jis ki kohan na ho. Aur "al-dakdak min-al-ardhi" ki misal wo zameen jo hamwar ho kar sakht ho gayi ho, unchi na ho aur mere Rabb ka waada bar-haqq hai aur is roz hum un ko is tarah chhod dein ge ke baaz un ka baaz se gadd-madd ho jaye ga. Yahan tak ke jab Yaajooj Maajooj ko khool diya jaye ga aur wo har bulandi se daud padeinge. Qatada ne kaha ke "hadabun" ke maane teela ke hain. Ek sahabi ne Rasul Allah (Sallallahu Alaihi Wasallam) se arz kiya ke mein ne is deewar ko dhari-dar chadar ki tarah dekha hai jis ki ek dhari surkh hai aur ek kali hai, is par Aap (Sallallahu Alaihi Wasallam) ne farmaya waqayi tum ne is ko dekha hai
.

Hum se Yahya Bin Bukair ne bayan kiya, kaha hum se Laith ne bayan kiya, un se Aqeel ne, un se Ibn Shihab ne, un se Urwah Bin Zubair ne aur un se Zainab Bint Abi Salama (Radi Allahu Anha) ne, un se Umm-e-Habiba Bint Abi Sufyan (Radi Allahu Anha) ne, un se Zainab Bint Jahsh (Radi Allahu Anha) ne ke Nabi Kareem (Sallallahu Alaihi Wasallam) in ke yahan tashreef laye Aap (Sallallahu Alaihi Wasallam) kuch ghabraye hue thay. Phir Aap (Sallallahu Alaihi Wasallam) ne farmaya ke Allah ke siwa aur koi mabood nahi, mulk-e-Arab mein is burayi ki wajah se barbadi aa jaye gi jis ke din qareeb aane ko hain, aaj Yaajooj Maajooj ne deewar mein itna surakh kar diya hai phir Nabi Kareem (Sallallahu Alaihi Wasallam) ne angutthe aur is ke qareeb ki ungli se halqa bana kar batlaya. Umm-ul-Momineen Zainab Bint Jahsh (Radi Allahu Anha) ne bayan kiya ke mein ne sawal kiya: Ya Rasul Allah! Kya hum is ke bawajood halak kar diye jayeinge ke hum mein naik log bhi maujood honge? Aap (Sallallahu Alaihi Wasallam) ne farmaya ke jab fisq-o-fujoor badh jaye ga (to yaqeenan barbadi ho gi)
.

Humey Muslim Bin Ibrahim ne bayan kiya, kaha hum se Wuhaib ne, un se Ibn Taoos ne, un se un ke walid Taoos ne, un se Abu Hurairah (Radi Allahu Anhu) ne bayan kiya ke Rasul Allah (Sallallahu Alaihi Wasallam) ne farmaya "Allah Paak ne Yaajooj Maajooj ki deewar se itna khool diya hai", phir Aap (Sallallahu Alaihi Wasallam) ne apni ungliyon se nawway ka adad bana kar batlaya
.

Mujh se Ishaq Bin Nasr ne bayan kiya, kaha hum se Abu Usama ne bayan kiya, un se Aamash ne, un se Abu Salih ne aur un se Abu Said Khudri (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne farmaya ke Allah Ta'ala (qiyamat ke din) farmaye ga, Ae Aadam! Aadam Alaihis Salam arz kareinge mein ita'at ke liye hazir hoon, musta-id hoon, saari bhalaiyaan sirf tere hi hath mein hain. Allah Ta'ala farmaye ga, jahannum mein jane walon ko (logon mein se alag) nikal lo. Aadam Alaihis Salam arz kareinge. Ae Allah! Jahannumiyon ki tadaad kitni hai? Allah Ta'ala farmaye ga ke har ek hazar mein se nau so nannaway. Is waqt (ki houl-naki aur wahshat se) bacche boodhe ho jayeinge aur har hamila aurat apna hamal gira de gi. Is waqt tum (khauf-o-dahshat se) logon ko mad-hoshi ke aalam mein dekhoge, halanke wo behosh na honge. Lekin Allah ka azab bada hi sakht ho ga. Sahaba ne arz kiya: Ya Rasul Allah! Wo ek shakhs hum mein se kaun ho ga? Nabi Kareem (Sallallahu Alaihi Wasallam) ne farmaya ke tumhein bisharat ho, wo ek aadmi tum mein se ho ga aur ek hazar dozakhi Yaajooj Maajooj ki qaum se honge. Phir Nabi Kareem (Sallallahu Alaihi Wasallam) ne farmaya is zaat ki qasam jis ke hath mein meri jaan hai, mujhe umeed hai ke tum (ummat-e-muslima) tamam jannat walon ke ek tihayi hoge. Phir hum ne Allahu Akbar kaha to Aap (Sallallahu Alaihi Wasallam) ne farmaya ke mujhe umeed hai ke tum tamam jannat walon ke aadhe hoge phir hum ne Allahu Akbar kaha, phir Aap (Sallallahu Alaihi Wasallam) ne farmaya ke (mahshar mein) tum log tamam insano ke muqabale mein itne hoge jitne kisi safaid bail ke jism par ek siyah baal, ya jitne kisi siyah bail ke jism par ek safaid baal hota hai
.