Hum se Abu-ul-Numan ne bayan kiya, kaha hum se Hammad Bin Zaid ne bayan kiya, un se Ubaidullah Bin Abi Bakr Bin Anas ne aur un se Anas Bin Malik (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne farmaya "Allah Ta'ala ne maan ke reham ke liye ek farishta muqarrar kar diya hai wo farishta arz karta hai, Ae Rabb! Ye 'nutfatun' hai, Ae Rabb ye 'mudhghatun' hai. Ae Rabb! Ye 'alaqatun' hai. Phir jab Allah Ta'ala ise paida karne ka irada karta hai to farishta poochta hai Ae Rabb! Ye mard hai ya Ae Rabb! Ye aurat hai, Ae Rabb! Ye badd hai ya naik? Is ki rozi kya hai? Aur muddat-e-zindagi kitni hai? Chunanche isi ke mutabiq maan ke pait hi mein sab kuch farishta rakh leta hai."
.

hum se Musaddad bin Musarhad ne bayan kiya , kaha hum se Hammad bin Zaid ne Ubaidullah bin Abi Bakr ke waaste se , woh Anas bin Malik Radhiallahu Anhu se , woh Nabi-e-Kareem Sallallahu Alaihi Wasallam se ke aap Sallallahu Alaihi Wasallam ne farmaaya ke rehm-e-maadar mein Allah Ta’ala ne ek farishta muqarrar kiya hai . woh kehta hai ke aye Rabb! ab yeh «‏‏‏‏Nutfah» ‏‏‏‏ hai , aye Rabb! ab yeh «‏‏‏‏Alaqah» ‏‏‏‏ ho gaya hai , aye Rabb! ab yeh «‏‏‏‏Muzghah» ‏‏‏‏ ho gaya hai . phir jab Allah chaahta hai ke us ki khilqat poori kare to kehta hai ke muzakkar ya muannas , badbakht hai ya nek-bakht , rozi kitni muqaddar hai aur Umar kitni . pas maa ke pet hi main yeh tamaam baatein farishta likh deta hai .

Hum se Hadba Bin Khalid ne bayan kiya, kaha hum se Hammam ne bayan kiya, kaha hum se Yazid Bin Zuraie ne bayan kiya, kaha hum se Said Bin Abi Arubah aur Hisham Dastuwai ne bayan kiya, kaha hum se Qatada ne bayan kiya, kaha hum se Anas Bin Malik (Radi Allahu Anhu) ne bayan kiya aur un se Malik Bin Sasah (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne farmaya "Mein ek dafa Bait Allah ke qareeb neend aur bidaari ki darmiyani halat mein tha, phir Aap (Sallallahu Alaihi Wasallam) ne do aadmiyon ke darmiyan laite hue ek teesre aadmi ka zikr farmaya. Is ke baad mere paas sone ka ek tasht laya gaya, jo hikmat aur iman se bharapoor tha. Mere seene ko pait ke aakhri hisse tak chaak kiya gaya. Phir mera pait Zamzam ke pani se dhoya gaya aur ise hikmat aur iman se bhar diya gaya. Is ke baad mere paas ek sawari layi gayi. Safaid, khachar se chhoti aur gadhe se badi yaani Buraq, mein is par sawar ho kar Jibrail Alaihis Salam ke sath chala. Jab hum aasman dunya par pahunche to pucha gaya ke ye kaun sahab hain? Unhon ne kaha ke Jibrail. Pucha gaya ke Aap ke sath aur kaun sahab aaye hain? Unhon ne bataya ke Muhammad (Sallallahu Alaihi Wasallam) pucha gaya ke kya unhein bulane ke liye Aap ko bheja gaya tha? Unhon ne kaha ke haan, is par jawab aaya ke acchi kushada jagah aane wale kya hi mubarak hain, phir mein Adam Alaihis Salam ki khidmat mein hazir hua. Aur unhein salam kiya. Unhon ne farmaya, aao pyare bete aur acche Nabi. Is ke baad hum doosre aasman par pahunche yahan bhi wahi sawal hua. Kaun sahab hain? Kaha Jibrail, sawal hua, Aap ke sath koi aur sahab bhi aaye hain? Kaha ke Muhammad Sallallahu Alaihi Wasallam, sawal hua unhein bulane ke liye Aap ko bheja gaya tha? Kaha ke haan. Ab idhar se jawab aaya, acchi kushada jagah aaye hain, aane wale kya hi mubarak hain. Is ke baad mein Isa aur Yahya Alaihis Salam se mila, in hazrat ne bhi khush-aamadeed, marhaba kaha apne bhai aur Nabi ko. Phir hum teesre aasman par aaye yahan bhi sawal hua kaun sahab hain? Jawab mila Jibrail, sawal hua, Aap ke sath bhi koi hai? Kaha ke Muhammad Sallallahu Alaihi Wasallam, sawal hua, unhein bulane ke liye Aap ko bheja gaya tha? Unhon ne bataya ke haan, ab awaz aayi acchi kushada jagah aaye aane wale kya hi salih hain, yahan Yusuf Alaihis Salam se mein mila aur unhein salam kiya, unhon ne farmaya, acchi kushada jagah aaye ho mere bhai aur Nabi, yahan se hum chauthe aasman par aaye is par bhi yahi sawal hua, kaun sahab, jawab diya ke Jibrail, sawal hua, Aap ke sath aur kaun sahab hain? Kaha ke Muhammad Sallallahu Alaihi Wasallam hain. Poocha kya unhein lane ke liye Aap ko bheja gaya tha, jawab diya ke haan, phir awaz aayi, acchi kushada jagah aaye kya hi acche aane wale hain. Yahan mein Idrees Alaihis Salam se mila aur salam kiya, unhon ne farmaya, marhaba, bhai aur Nabi. Yahan se hum panchwein aasman par aaye. Yahan bhi sawal hua ke kaun sahab? Jawab diya ke Jibrail, poocha gaya aur Aap ke sath aur kaun sahab aaye hain? Jawab diya ke Muhammad Sallallahu Alaihi Wasallam, poocha gaya, unhein bulane ke liye bheja gaya tha? Kaha ke haan, awaz aayi, acchi kushada jagah aaye hain. Aane wale kya hi acche hain. Yahan hum Haroon Alaihis Salam se mile aur mein ne unhein salam kiya. Unhon ne farmaya, mubarak mere bhai aur Nabi, tum acchi kushada jagah aaye, yahan se hum chhete aasman par aaye, yahan bhi sawal hua, kaun sahab? Jawab diya ke Jibrail, poocha gaya, Aap ke sath aur bhi koi hain? Kaha ke haan Muhammad Sallallahu Alaihi Wasallam hain. Poocha gaya, kya unhein bulaya gaya tha kaha haan, kaha acchi kushada jagah aaye hain, acche aane wale hain. Yahan mein Musa Alaihis Salam se mila aur unhein salam kiya. Unhon ne farmaya, mere bhai aur Nabi acchi kushada jagah aaye, jab mein wahan se aage badhne laga to wo rone lage kisi ne pucha buzurgwar aap kyun ro rahe hain? Unhon ne farmaya ke Ae Allah! Ye nau-jawan jise mere baad nubuwwat di gayi, is ki ummat mein se Jannat mein dakhil hone wale, meri ummat ke Jannat mein dakhil hone wale logon se zyada honge. Is ke baad hum saatwein aasman par aaye yahan bhi sawal hua ke kaun sahab hain? Jawab diya ke Jibrail, sawal hua ke koi sahab Aap ke sath bhi hain? Jawab diya ke Muhammad Sallallahu Alaihi Wasallam poocha, unhein bulane ke liye Aap ko bheja gaya tha? Marhaba, acche aane wale. Yahan mein Ibrahim Alaihis Salam se mila aur unhein salam kiya. Unhon ne farmaya mere bete aur Nabi, mubarak, acchi kushada jagah aaye ho, is ke baad mujhe Bait-ul-Mamoor dikhaya gaya. Mein ne Jibrail Alaihis Salam se is ke bare mein pucha, to unhon ne batlaya ke ye Bait-ul-Mamoor hai. Is mein sattar hazar farishte rozana namaz parhte hain. Aur ek martaba parh kar jo is se nikal jata hai to phir kabhi dakhil nahi hota. Aur mujhe Sidrat-ul-Muntaha bhi dikhaya gaya, is ke phal aise thay jaise maqam-e-Hajar ke matke hote hain aur patte aise thay jaise hathi ke kaan, is ki jarr se char nahrain nikalti theen, do nahrain to batini theen aur do zahiri, mein ne Jibrail Alaihis Salam se pucha to unhon ne bataya ke jo do batini nahrain hain wo to Jannat mein hain aur do zahiri nahrain dunya mein Neel aur Furat hain, is ke baad mujh par pachas waqt ki namazain farz ki gayeen. Mein jab wapas hua aur Musa Alaihis Salam se mila to unhon ne pucha ke kya kar ke aaye ho? Mein ne arz kiya ke pachas namazain mujh par farz ki gayi hain. Unhon ne farmaya ke insanon ko mein tum se zyada janta hoon, Bani Israil ka mujhe bura tajruba ho chuka hai. Tumhari ummat bhi itni namazon ki taqat nahi rakhti, is liye apne Rabb ki bargah mein dobara haziri do, aur kuch takhfeef ki darkhwast karo, mein wapas hua to Allah Ta'ala ne namazain chalis waqt ki kar deen. Phir bhi Musa Alaihis Salam apni baat (yaani takhfeef karane) par misar rahe. Is martaba tees waqt ki reh gayeen. Phir unhon ne wahi farmaya aur is martaba bargah-e-Rabb-ul-Izzat mein meri darkhwast ki peshi par Allah Ta'ala ne unhein das kar diya. Mein jab Musa Alaihis Salam ke paas aaya to ab bhi unhon ne kam karane ke liye apna israr jari rakha. Aur is martaba Allah Ta'ala ne paanch waqt ki kar deen. Ab Musa Alaihis Salam se mila, to unhon ne phir daryaft farmaya ke kya hua? Mein ne kaha ke Allah Ta'ala ne paanch kar di hain. Is martaba bhi unhon ne kam karane ka israr kiya. Mein ne kaha ke ab to mein Allah ke supard kar chuka. Phir awaz aayi. Mein ne apna fareeza (paanch namazon ka) jari kar diya. Apne bandon par takhfeef kar chuka aur mein ek naiki ka badla das guna deta hoon. Aur Hammam ne kaha, un se Qatada ne kaha, un se Hasan ne, un se Abu Hurairah (Radi Allahu Anhu) ne Nabi Kareem (Sallallahu Alaihi Wasallam) se Bait-ul-Mamoor ke bare mein alag riwayat ki hai
.

Hum se Umar Bin Hafs ne bayan kiya, kaha hum se mere walid ne bayan kiya, kaha hum se Aamash ne bayan kiya, kaha hum se Zaid Bin Wahb ne bayan kiya, kaha hum se Abdullah Bin Masood (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne bayan farmaya aur Aap sacchon ke sacche thay ke insan ki paidayish is ki maan ke pait mein pehle chalis din tak poori ki jati hai. Phir wo itne hi dinon tak "alaqatun" yaani ghaleez aur jamid khoon ki surat mein rehta hai. Phir itne hi dinon ke liye "mudhghatun" (gosht ka lothda) ki shakal ikhtiyar kar leta hai. Phir (chauthe chilla mein) Allah Ta'ala ek farishta ko char baaton ka hukm de kar bhejta hai. Pas wo farishta is ke amal, is ki muddat-e-zindagi, rozi aur ye ke wo naik hai ya badd, ko likh leta hai. Is ke baad is mein rooh phoonki jati hai. Pas insan (zindagi bhar) dozakhiyon ke kaam karta rehta hai. Aur jab is ke aur dozakh ke darmiyan sirf ek hath ka fasla reh jata hai to is ki taqdeer samne aati hai aur wo jannatiyon ke kaam karne lagta hai aur jannat mein chala jata hai. Isi tarah ek shakhs jannatiyon ke kaam karta rehta hai aur jab is ke aur jannat ke darmiyan sirf ek hath ka fasla reh jata hai to is ki taqdeer samne aati hai aur wo dozakhiyon ke kaam shuru kar deta hai aur wo dozakh mein chala jata hai
.

Hum se Abu al-Waleed Hisham bin Abd-ul-Malik ne bayan kiya , kaha hum se Shubah ne bayan kiya , kaha mujhko Sulayman Aamash ne khabar di , kaha ke main ne Zayd bin Wahb ne suna , in se Abdullah bin Masood razi Allahu anhu ne bayan kiya ke hamako Rasool Allah salla Allahu alaihi wasallam ne bayan sunaya aur Aap sachon ke sache thay aur Aap ki sachayi ki zabardast gawahi di gayi . Farmaya ke tum mein se har shakhs pehle apni maan ke pait mein chalis din tak nutfa hi rakkha jata hai . Phir itni hi muddat mein «alaqah» yani khoon ki phutki (basta e khoon) banta hai phir itne hi arsa mein «muzh-ghah» (yani gosht ka lothra) phir char mah baad Allah Ta'ala ek farishta bheijta hai aur is ke baare mein (maan ke pait hi mein) char baaton ke likhne ka hukm diya jata hai . Is ki rozi ka , is ki maut ka , is ka ke woh bad-bakht hai ya naik-bakht . Pas wallah , tum mein se ek shakhs dozakh walon ke se kaam karta rehta hai aur jab is ke اور dozakh ke darmiyan sirf ek balisht ka fasila ya ek hath ka fasila baqi reh jata hai to is ki taqdeer is par ghalib aati hai aur woh jannat walon ke se kaam karne lagta hai aur jannat mein jata hai . Isi tarah ek shakhs jannat walon ke se kaam karta rehta hai aur jab is ke aur jannat ke darmiyan ek hath ka fasila baqi reh jata hai to is ki taqdeer is par ghalib aati hai aur woh dozakh walon ke kaam karne lagta hai aur dozakh mein jata hai . Imam Bukhari rahmahullah kehte hain ke Adam bin Abi Iyas ne apni riwayat mein yun kaha ke jab ek hath ka fasila reh jata hai .

Hum se Sulayman bin Harb ne bayan kiya , kaha hum se Hammad ne bayan kiya , in se Ubaidullah bin Abi Bakr bin Anas ne aur in se Anas bin Malik razi Allahu anhu ne ke Nabi Karim salla Allahu alaihi wasallam ne farmaya ”Allah Ta'ala ne raham e maadar par ek farishta muqarrar kar diya hai aur woh kehta rehta hai ke Ae Rabb! Yeh «nutfah» qarar paya hai . Ae Rabb! Ab «alaqah» yani jama hua khoon ban gaya hai . Ae Rabb! Ab «muzh-ghah» (gosht ka lothra) ban gaya hai . Phir jab Allah Ta'ala chahta hai ke is ki paidaish poori kare to woh poochhta hai Ae Rabb larka hai ya larki ? Naik hai ya bura ? Is ki rozi kya ho gi ? Is ki maut kab ho gi ? Isi tarah yeh sab baatein maan ke pait hi mein likh di jaati hain , duniya mein isi ke mutabiq zhahir hota hai .

Hum se Adam bin Abi Iyas ne bayan kiya, unhon ne kaha hum se Shubah ne bayan kiya, unhon ne kaha hum se Aamash ne bayan kiya, unhon ne kaha Zayd bin Wahb se suna aur unhon ne Abdullah bin Masood razi Allahu anhuse suna ke hamase Rasool Allah salla Allahu alaihi wasallam ne bayan farmaya jo sadiq wa musad-diq hain ke insan ka nutfa maan ke pait mein chalis din aur raaton tak jama rehta hai phir woh khoon ki phatki ban jata hai, phir woh gosht ka lothra ho jata hai phir is ke baad farishta bheija jata hai aur usay char cheezon ka hukm hota hai. Chunanche woh is ki rozi, is ki maut, is ka amal aur yeh ke woh bad-bakht hai ya naik-bakht likh laita hai. Phir is mein rooh phoonkta hai aur tum mein se ek shakhs jannat walon ke se amal karta hai aur jab is ke aur jannat ke darmiyan sirf ek hath ka farq reh jata hai to is ki taqdeer ghalib aati hai aur woh dozakh walon ke amal karne lagta hai aur dozakh mein dakhil hota hai. Isi tarah ek shakhs dozakh walon ke amal karta hai aur jab is ke aur dozakh ke darmiyan sirf ek balisht ka fasila reh jata hai to taqdeer ghalib aati hai aur jannat walon ke kaam karne lagta hai, phir jannat mein dakhil hota hai.