Hum se Musaddad ne bayan kiya, kaha hum se Yahya Qattan ne bayan kiya, un se Hisham Bin Urwah ne, un se un ke baap ne, un se Zainab Bint Abi Salama ne, un se (Umm-ul-Momineen) Umm-e-Salama (Radi Allahu Anhuma) ne ke Umm-e-Sulaim (Radi Allahu Anha) ne arz kiya, Ya Rasul Allah! Allah Ta'ala haq baat se nahi sharmata, to kya agar aurat ko ehtilam ho to is par bhi ghusl ho ga? Aap (Sallallahu Alaihi Wasallam) ne farmaya "Haan bashart-e-ke wo tari dekh le." Umm-ul-Momineen Umm-e-Salama (Radi Allahu Anha) ko is baat par hansi aa gayi aur farmane lageein, kya aurat ko bhi ehtilam hota hai? Aap (Sallallahu Alaihi Wasallam) ne farmaya "(Agar aisa nahi hai) to phir bacche mein (maan ki) mushabihat kahan se aati hai."
.

Hum se Muhammed bin Salaam ne bayan kiya, kaha hum se Abu Mu’aawiyah ne khabar di, un se Hishaam ne apne baap ke waaste se bayan kiya, unhon ne Zainab bint-e-Umm-e-Salamah ke waaste se naql kiya, woh (apni waalidah) Umm-ul-Mo’mineen Umm-e-Salamah Radhiallahu Anha se riwayat karti hain ke Umm-e-Sulaim (naami ek aurat) Rasoolullah Sallallahu Alaihi Wasallam ki khidmat-e-aqdas mein haazir huen aur arz kiya ke ya Rasoolallah! Allah Ta’ala haq baat bayan karne se nahi sharmaata (is liye main poochti hun ke) kya ehtelaam se aurat par bhi ghusl zaroori hai? Aap Sallallahu Alaihi Wasallam ne farmaaya ke (haan) jab aurat paani dekh le. (Yani kapde waghera par mani ka asar ma’loom ho) to (yeh sun kar) Umm-e-Salamah Radhiallahu Anha ne (sharm ki wajah se) apna chehra chupa liya aur kaha, ya Rasoolallah! Kya aurat ko bhi ehtelaam hota hai? Aap Sallallahu Alaihi Wasallam ne farmaaya, Haan! Tere haath khaak aalood hun, phir kiun us ka bachcha us ki soorat ke mushabeh hota hai (yani yahi us ke ehtelaam ka suboot hai).

Hum se Abdullah bin Yousuf ne bayan kiya, unhon ne kaha ke hum se Imam Malik ne bayan kiya, unhon ne Hishaam bin ’Urwah ke waaste se, unhon ne apne waalid ’Urwah bin Zubair se, woh Zainab bint-e-Abi Salamah se, unhon ne Umm-ul-Mo’mineen Umm-e-Salamah Radhiallahu Anha se, aap ne farmaaya ke Umm-e-Sulaim Abu Talha Radhiallahu Anhu ki aurat Rasoolullah Sallallahu Alaihi Wasallam ki khidmat mein haazir huen aur kaha ke Allah Ta’ala haq se haya nahi karta. Kya aurat par bhi jab ke use ehtelaam ho ghusl waajib ho jaata hai. To Rasoolullah Sallallahu Alaihi Wasallam ne farmaaya, haan agar (apni mani ka) paani dekhe (to use bhi ghusl karna hoga).

Hum se Ismail bin Abi Oways ne bayan kiya, kaha mujh se Imam Malik ne bayan kiya, in se Hisham bin Urwah ne, in se un ke walid ne, in se Zaynub bint Abi Salamah razi Allahu anha ne aur in se Umm Salamah razi Allahu anha ne bayan kiya ke Umm Sulaym razi Allahu anha Rasool Allah salla Allahu alaihi wasallam ki khidmat mein hazir huien aur arz kiya: ya Rasool Allah! Allah haq baat se haya nahi karta kya aurat ko jab ihtilam ho to is par ghusl wajib hai? Nabi Karim salla Allahu alaihi wasallam ne farmaya ke haan agar aurat mani ki tari dekhe to is par bhi ghusl wajib hai.