Hum se Musaddad ne bayan kiya, unhon ne kaha hum se Yahya Bin Said ने bayan kiya, un se Sufyan ne bayan kiya, unhon ne kaha ke mujh se Abu Ishaq ne bayan kiya, kaha ke mein ne Bara Bin Azib (Radi Allahu Anhuma) se suna, Aap ne bayan kiya ke Rasul Allah (Sallallahu Alaihi Wasallam) ki khidmat mein resham ka ek kapda pesh kiya gaya is ki khubsoorti aur nazakat ne logon ko hairat mein daal diya. Aap (Sallallahu Alaihi Wasallam) ne farmaya ke Jannat mein Saad Bin Muaz ke rumal is se behtar aur afzal hain
.

Aur Saeed ne bayan kiya Qatada se aur un se Anas (Radi Allahu Anhu) ne ke Doomah (Tabook ke qareeb ek maqam) ke Ukaidar (Nasrani) ne Nabi Kareem (Sallallahu Alaihi Wasallam) ki khidmat mein hadiya bheja tha
.

Hum se Abdullah Bin Muhammad Jafi ne bayan kiya, kaha hum se Yunus Bin Muhammad ne bayan kiya, un se Shaiban ne bayan kiya, un se Qatada ne aur un se Anas Bin Malik (Radi Allahu Anhu) ne bayan kiya, unhon ne kaha ke Nabi Kareem (Sallallahu Alaihi Wasallam) ki khidmat mein sundus (ek khaas qism ka resham) ka ek jubba tuhfa mein pesh kiya gaya. Aap (Sallallahu Alaihi Wasallam) (mardon ke liye) resham ke istemal se pehle hi mana farma chuke thay. Logon ne is jubbe ko bahut hi pasand kiya, to Aap (Sallallahu Alaihi Wasallam) ne farmaya ke Jannat mein Saad Bin Muaz ke rumal is se behtar honge
.

Mujh se Muhammad Bin Bashar ne bayan kiya kaha mujh se Shuba ne bayan kiya, un se Abu Ishaq ne kaha ke mein ne Bara Bin Azib Radi Allahu Anhu se suna, unhon ne bayan kiya ke Nabi Kareem Sallallahu Alaihi Wasallam ke paas hadiya mein ek reshmi hulla aaya to Sahaba ise chone lage aur is ki narmi aur nazakat par taajjub karne lage, aap Sallallahu Alaihi Wasallam ne is par farmaya ke tumhein is ki narmi par taajjub hai, Saad Bin Muaz Radi Allahu Anhu ke rumal (jannat mein) is se kahin behtar hain ya (Aap Sallallahu Alaihi Wasallam ne farmaya ke) is se kahin zyada narm o nazuk hain, is hadees ki riwayat Qatadah aur Zuhri ne bhi ki hai, unhon ne Anas Radi Allahu Anhu se suna, unhon ne Nabi Kareem Sallallahu Alaihi Wasallam se riwayat kiya hai
.

Hum se Ubaidullah bin Musa ne bayan kiya, in se Israeel ne bayan kiya, in se Abu Ishaq ne bayan kiya aur in se Bara razi Allahu anhu ne bayan kiya ke Nabi Karim salla Allahu alaihi wasallam ko resham ka ek kapra hadiya mein pesh hua to hum usay chhoone lage aur is ki (narmi o mulaimat par) hairat-zada ho gaye to Aap salla Allahu alaihi wasallam ne farmaya ke kya tumhein is par hairat hai. Hum ne arz kiya ji haan farmaya, jannat mein Saad bin Maaz ke roomal is se bhi achhe hain.

Hum se Muhammad bin Salam ne bayan kiya, kaha hum se Abu al-Ahwas ne bayan kiya, in se Abu Ishaq ne, in se Bara bin Azib razi Allahu anhu ne bayan kiya ke Nabi Karim salla Allahu alaihi wasallam ki khidmat mein resham ka ek tukra hadiya ke taur par aaya to log usay dast-ba-dast apne hathon mein lene lage aur is ki khoobsurti aur narmi par hairat karne lage. Nabi Karim salla Allahu alaihi wasallam ne is par farmaya ke tumhein is par hairat hai? Sahabah ne arz ki ji haan, ya Rasool Allah! Nabi Karim salla Allahu alaihi wasallam ne farmaya ke is zaat ki qasam jis ke hath mein meri jaan hai, Saad razi Allahu anhu ke rumal jannat mein is se bhi achhe hain. Shubah aur Israeel ne Abu Ishaq se alfaz ”is zaat ki qasam jis ke hath mein meri jaan hai“ ka zikr nahi kiya.