Hum se Abdullah Bin Yusuf ne bayan kiya, unhon ne kaha hum ko Ibn Wahb ne khabar di Yunus se, unhon ne Ibn Shihab se, wo Anas Bin Malik (Radi Allahu Anhu) se ke jab Muhajireen Makkah se Madinah aaye to un ke sath koi bhi saman na tha. Ansar zameen aur jaidad wale thay. Ansar ne Muhajireen se ye mamla kar liya ke wo apne baghat mein se unhein har saal phal diya karein ge aur is ke badle Muhajireen un ke baghat mein kaam kiya karein ge. Anas (Radi Allahu Anhu) ki walda Umm-ul-Sulaim jo Abdullah Bin Abi Talha (Radi Allahu Anhuma) ki bhi walda theen, unhon ne Rasul Allah (Sallallahu Alaihi Wasallam) ko khajoor ka ek bagh hadiya de diya tha lekin Aap (Sallallahu Alaihi Wasallam) ne wo bagh apni londi Umm-ul-Aiman (Radi Allahu Anha) jo Usama Bin Zaid (Radi Allahu Anhuma) ki walda theen, inayat farma diya. Ibn Shihab ne bayan kiya ke mujhe Anas Bin Malik (Radi Allahu Anhu) ne khabar di ke Nabi Kareem (Sallallahu Alaihi Wasallam) jab Khaibar ke Yahudiyou ki jang se farigh hue aur Madinah tashreef laye to Muhajireen ne Ansar ko un ke tahaif wapas kar diye jo unhon ne phalon ki soorat mein de rakkhe thay. Aap (Sallallahu Alaihi Wasallam) ne Anas (Radi Allahu Anhu) ki walda ka bagh bhi wapas kar diya aur Umm-ul-Aiman (Radi Allahu Anha) ko is ke bajaye apne bagh mein se (kuch darakht) inayat farma diye. Ahmad Bin Shabib ne bayan kiya, unhein un ke walid ne khabar di aur unhein Yunus ne isi tarah albatta apni Riwayat mein bajaye "makanahunna min ha-itihi" ke "makanahunna min khalisihi" makanahunna min khalis-hi bayan kiya
.

Hum se Hakam Bin Nafi ne bayan kiya, kaha ke hum ko Shuayb ne khabar di, un se Abuz Zanad ne bayan kiya, un se Aaraj ne aur un se Abu Hurairah (Radi Allahu Anhu) ne bayan kiya ke Ansar ne Nabi Kareem (Sallallahu Alaihi Wasallam) se kaha ke humare baghat Aap hum mein aur humare (Muhajir) bhaiyon mein taqseem farma dein. Aap (Sallallahu Alaihi Wasallam) ne inkar kiya to Ansar ne (Muhajireen se) kaha ke aap log darakhton mein mehnat karo. Hum tum mewe mein shareek raheinge. Unhon ne kaha accha hum ne suna aur qabool kiya
.

Hum se Abul Yaman ne bayan kiya, kaha hum ko Shuaib ne khabar di. Un se Abul Zinad ne bayan kiya, un se Aaraj ne aur un se Abu Hurairah (Radi Allahu Anhu) ne bayan kiya ke Ansar Rizwanullahi Alaihim ne Nabi Kareem (Sallallahu Alaihi Wasallam) ke samne (moakhat ke baad) ye pesh kash ki ke hamare khajoor ke baghat Aap hum mein aur hamare bhaiyon (Muhajireen) mein taqseem farma dein, lekin Aap (Sallallahu Alaihi Wasallam) ne farmaya ke nahi. Is par Ansar ne Muhajireen se kaha ke aap log hamare baghon ke kaam kar diya karein aur hamare sath phal mein shareek ho jayein, Muhajireen ne kaha ke hum ne sun liya aur hum aisa hi karein ge
.

Hum se Abu Yaman ne bayan kiya, kaha hum ko Shuaib ne khabar di, kaha hum se Abu-uz-Zinad ne bayan kiya, un se Aaraj ne aur un se Abu Hurairah (Radi Allahu Anhu) ne ke Rasul Allah (Sallallahu Alaihi Wasallam) ne farmaya "Jab Kisra mar jaye ga to is ke baad koi Kisra paida na hoga. Aur jab Qaisar mar jaye ga to is ki baad koi Qaisar paida na hoga aur is zaat ki qasam! Jis ke hath mein meri jaan hai, tum log in dono ke khazane Allah ke raste mein kharch karoge."
.

Hum se Abdullah Bin Abi Al-Aswad ne bayan kiya, kaha hum se Mutamir ne bayan kiya, un se un ke baap Sulaiman ne, unhon ne Anas Bin Malik (Radi Allahu Anhu) se suna, unhon ne bayan kiya ke Sahaba (Ansar) kuch khajoor ke darakht Nabi Kareem (Sallallahu Alaihi Wasallam) ki khidmat mein ba-taur tuhfa de diya karte thay lekin jab Allah Ta'ala ne Banu Quraiza aur Banu Nadheer ke qabail par fatah di to Nabi Kareem (Sallallahu Alaihi Wasallam) is ke baad is tarah ke hadaya wapas farma diya karte thay
.

Hum se Abu Hammam Salt Bin Muhammad ne bayan kiya kaha mein ne Mugheerah Bin Abdur Rahman se suna, kaha hum se Abu-az-Zinad ne bayan kiya, un se Aeraj ne aur un se Abu Hurairah Radi Allahu Anhu ne ke Ansar ne kaha: Ya Rasul Allah! Khajoor ke baghat hamare aur Muhajireen ke darmiyan taqseem farma dein, aap Sallallahu Alaihi Wasallam ne farmaya ke mein aisa nahi karoon ga is par Ansar ne (Muhajireen se) kaha phir aap aisa kar lein ke kaam hamari taraf se aap anjam diya karein aur khajooron mein aap hamare sathi ho jayein. Muhajireen ne kaha hum ne aap logon ki ye baat suni aur hum aisa hi karein ge
.

`Mujh se Abdullah bin Muhammad ne bayan kiya, kaha hum se Hisham bin Yusuf ne bayan kiya, kaha hum ko Ma'mar ne khabar di, unhein Zuhri ne, unhein Salim ne, un se Ibn Umar Radi Allahu Anhuma ne bayan kiya ke mein Nabi Kareem صلی اللہ علیہ وسلم ke zamana mein naujawan gair shadi shuda tha to Masjid-e-Nabwi mein sota tha aur jo shakhs bhi khwab dekhta wo Nabi Kareem صلی اللہ علیہ وسلم se is ka tazkira karta. Mein ne socha: Ae Allah! agar Tere nazdeek mujh mein koi khair hai to mujhe bhi koi khwab dikha jis ki Nabi Kareem صلی اللہ علیہ وسلم mujhe ta'beer dein. Phir mein soya aur mein ne do farishte dekhe jo mere paas aaye aur mujhe le chale. Phir in donon se teesra farishta bhi aa mila aur us ne mujh se kaha ke daro nahi tum naik aadmi ho. Phir wo donon farishte mujhe jahannum ki taraf le gaye to wo kunwein ki tarah tah-ba-tah thi aur is mein kuch log thay jin mein se baaz ko mein ne pehchana bhi, phir wo donon farishte mujhe dayein taraf le chale, jab subah hui to mein ne is tazkira apni behn Hafsa Radi Allahu Anha se kiya.