Hum se Ubaid Bin Ismail ne bayan kiya, kaha hum se Abu Usama ne bayan kiya Hisham se, un se un ke baap ne aur un se Asma Bint Abi Bakr (Radi Allahu Anha) ne bayan kiya ke Rasul Allah (Sallallahu Alaihi Wasallam) ke zamane mein meri walda (Qutaila Bint Abdul Uzza) jo mushrika theen, mere yahan aaein. Mein ne Aap (Sallallahu Alaihi Wasallam) se poocha, mein ne ye bhi kaha ke wo (mujh se mulaqat ki) bahut khwahish-mand hain, to kya mein apni walda ke sath sila rehmi kar sakti hoon? Aap (Sallallahu Alaihi Wasallam) ne farmaya ke han apni walda ke sath sila rehmi kar
.

Hum se Qutaiba Bin Said ne bayan kiya, kaha hum se Hatim ne bayan kiya, un se Hisham Bin Urwah ne, un se un ke baap ne aur un se Asma Bint Abi Bakr (Radi Allahu Anhuma) ne bayan kiya ke Quraish se jis zamane mein Rasul Allah (Sallallahu Alaihi Wasallam) ne (Hudaibiya ki) sulah ki thi, isi muddat mein meri walida (Qataila) apne baap (Harith Bin Mudrik) ko sath le kar mere paas aieen, wo Islam mein dakhil nahi hui theen. (Urwah ne bayan kiya ke) Asma (Radi Allahu Anha) ne is bare mein Aap (Sallallahu Alaihi Wasallam) se pucha ke Ya Rasul Allah! Meri walida aayi hui hain aur mujh se raghbat ke sath milna chahti hain, to kya mein un ke sath sila-rehmi karoon? Aap (Sallallahu Alaihi Wasallam) ne farmaya ke haan! Un ke sath sila-rehmi kar
.

Hum se Abdullah bin Zubayr Humaydi ne bayan kiya, kaha hum se Sufyan ne bayan kiya, kaha hum se Hisham bin Urwah ne bayan kiya, kaha mujhko mere walid ne khabar di, unhein Asmaa bint Abi Bakr razi Allahu anhuma ne khabar di ke meri walda Nabi Karim salla Allahu alaihi wasallam ke zamana mein mere paas aayin, woh Islam se munkir thien. Main ne Nabi Karim salla Allahu alaihi wasallam se poochha kya main is ke saath sila-rahmi kar sakti hoon? Nabi Karim salla Allahu alaihi wasallam ne farmaya ke haan. Is ke baad Allah Ta'ala ne yeh aayat nazil ki «laa yan-haakum-ullahu anil-lazheena lam yuqaatilookum fid-deeni» yani ”Allah Paak tum ko in logon ke saath naik sulook karne se mana nahi karta jo tum se hamare deen ke mutalliq koi larayi jhagra nahi karte.“

Aur Layth ne bayan kiya ke mujh se Hisham ne bayan kiya, in se Urwah ne aur in se Asmaa razi Allahu anha ne bayan kiya ke meri walda mushrika thien woh Nabi Karim salla Allahu alaihi wasallam ke Quraish ke saath sulah ke zamana mein apne walid ke saath (Madinah Munawwarah) aayin. Main ne Nabi Karim salla Allahu alaihi wasallam se un ke mutalliq poochha ke meri walda aayi hain aur woh Islam se alag hain (kya main in ke saath sila-rahmi kar sakti hoon?) Nabi Karim salla Allahu alaihi wasallam ne farmaya ke haan apni walda ke saath sila-rahmi karo.