Hum se Khallad ne bayan kiya, un se Misar ne bayan kiya, un se Muharib Bin Disar ne bayan kiya, aur un se Jabir Bin Abdullah (Radi Allahu Anhuma) ne bayan kiya ke mein Nabi Kareem (Sallallahu Alaihi Wasallam) ki khidmat mein hazir hua to Aap (Sallallahu Alaihi Wasallam) Masjid-e-Nabwi mein tashreef rakhte thay. Misar ne bayan kiya ke mera khayal hai ke unhon ne chasht ke waqt ka zikar kiya. (Ke is waqt khidmat-e-Nabwi mein hazir hua) phir Aap (Sallallahu Alaihi Wasallam) ne farmaya ke do rakat namaz parh lo. Mera Aap (Sallallahu Alaihi Wasallam) par qarz tha. Aap (Sallallahu Alaihi Wasallam) ne ise ada kiya, balkay ziyada bhi day diya
.

Hum se Khalad bin Yahya ne bayan kiya , kaha hum se Misar ne , kaha hum se Muharib bin Dithar ne Jabir bin Abdullah ke wastay se , woh kehte hain ke mein Nabi Karim salla Allahu alaihi wa sallam ki khidmat mein hazir hua . Aap salla Allahu alaihi wa sallam is waqt masjid mein tashreef farma thay . Misar ne kaha mera khayal hai ke Muharib ne chasht ka waqt bataya tha . Nabi Karim salla Allahu alaihi wa sallam ne farmaya ke pehle do rakat namaz parh aur mera Nabi Karim salla Allahu alaihi wa sallam par kuch qarz tha . Jisay aap salla Allahu alaihi wa sallam ne ada kiya aur zyada hi diya .

Hum se Abdan ne bayan kiya, kaha humein Jareer ne khabar di, unhein Mugheera ne, unhein Aamir Shabi ne aur un se Jabir (Radi Allahu Anhu) ne bayan kiya ke jab Abdullah Bin Amr Bin Haram (Radi Allahu Anhu) (mere baap) shaheed ho gaye to un ke zimme (logon ka) kuch qarz baqi tha. Is liye mein ne Nabi Kareem (Sallallahu Alaihi Wasallam) ke zariya koshish ki ke qarz khwah kuch apne qarzon ko maaf kar dein. Nabi Kareem (Sallallahu Alaihi Wasallam) ne yehi chaha, lekin wo nahi mane. Aap (Sallallahu Alaihi Wasallam) ne mujh se farmaya ke jao apni tamam khajoor ki qismon ko alag alag kar lo. Ajwa (ek khas qism ki khajoor) ko alag rakh aur Azq-e-Zaid (khajoor ki ek qism) ko alag kar. Phir mujhe bula bhej. Mein ne aisa hi kiya aur Nabi Kareem (Sallallahu Alaihi Wasallam) ko kehla bheja. Aap (Sallallahu Alaihi Wasallam) tashreef laye aur khajooron ke dhair par ya beech mein baith gaye aur farmaya ke ab in qarz khwahon ko naap kar do. Mein ne naap-na shuru kiya. Jitna qarz logon ka tha. Mein ne sab ko ada kar diya, phir bhi tamam khajoor jon ki ton thi. Is mein se ek dana barabar ki kami nahi hui thi. Firas ne bayan kiya ke un se Shabi ne, aur un se Jabir (Radi Allahu Anhu) ne Nabi Kareem (Sallallahu Alaihi Wasallam) se ke ”barabar un ke liye tolte rahe, yahan tak ke un ka poora qarz ada ho gaya.“ Aur Hisham ne kaha, un se Wahb ne, aur un se Jabir (Radi Allahu Anhu) ne ke Nabi Kareem (Sallallahu Alaihi Wasallam) ne farmaya, khajoor torr aur apna qarz poora ada kar de
.

Aur ek martaba mein Nabi Kareem (Sallallahu Alaihi Wasallam) ke sath ek Jihad mein ek oont par sawar ho kar gaya. Oont thak gaya. Is liye mein logon se peeche reh gaya. Itne mein Nabi Kareem (Sallallahu Alaihi Wasallam) ne ise peeche se maara aur farmaya ke ye oont mujhe bech do. Madinah tak is par sawari ki tumhe ijazat hai. Phir jab hum Madinah se qareeb hue to mein ne Nabi Kareem (Sallallahu Alaihi Wasallam) se ijazat chahi, arz kiya ke Ya Rasul Allah! mein ne abhi nayi shadi ki hai. Aap (Sallallahu Alaihi Wasallam) ne daryaft farmaya, bakira se ki hai ya bewa se ? Mein ne kaha ke bewa se. Mere walid Abdullah (Radi Allahu Anhu) shaheed hue to apne peeche kai chhoti bachiyan chhor gaye hain. Is liye mein ne bewa se ki taake unhein taleem day aur adab sikhati rahe. Phir Aap (Sallallahu Alaihi Wasallam) ne farmaya, accha ab apne ghar jao. Chunanche mein ghar gaya. Mein ne jab apne mamoon se oont bechne ka zikar kiya to unhon ne mujhe malamat ki. Is liye mein ne un se oont ke thak jane aur Nabi Kareem (Sallallahu Alaihi Wasallam) ke waqia ka bhi zikar kiya. Aur Aap (Sallallahu Alaihi Wasallam) ke oont ko maarne ka bhi. Jab Nabi Kareem (Sallallahu Alaihi Wasallam) Madinah pahunche to mein bhi subah ke waqt oont lay kar Aap (Sallallahu Alaihi Wasallam) ki khidmat mein hazir hua. Aap (Sallallahu Alaihi Wasallam) ne mujhe oont ki qeemat bhi day di, aur wo oont bhi mujhe wapas bakhsh diya aur qaum ke sath mera (maal-e-ghanimat ka) hissa bhi mujh ko bakhsh diya
.

Aur Sabit Bin Muhammad ne bayan kiya ke hum se Mis'ar ne bayan kiya, un se Muharib ne aur un se Jabir (Radi Allahu Anhu) ne ke mein Nabi Kareem (Sallallahu Alaihi Wasallam) ki khidmat mein (safar se laut kar) masjid mein hazir hua to Aap (Sallallahu Alaihi Wasallam) ne (mere ont ki qeemat) ada ki aur kuch zyada bhi diya
.