Hum se Qutaiba ne bayan kiya kaha ke hum se Abdul Aziz ne bayan kiya, un se Abu Hazim ne aur un se Sahl Bin Saad (Radi Allahu Anhu) ne ke Rasul Allah (Sallallahu Alaihi Wasallam) ki khidmat mein ek piyala pesh kiya gaya aur Aap (Sallallahu Alaihi Wasallam) ne ise nosh farmaya. Aap ki dayin taraf ek larka tha jo hazirin mein sab se kam umar tha. Badi umar wale Sahaba Aap ki bayin taraf thay. Nabi Kareem (Sallallahu Alaihi Wasallam) ne farmaya, ay larke! kya tumhari ijazat hai ke mein is piyale ka bacha hua pani boorhon ko doon ? Us ne jawab diya, Ya Rasul Allah! mein to Aap ka jhoota apne hisse ka kisi ko dene wala nahi hoon. Aakhir Aap ne wo piyala isi ko day diya
.

Hum se Saeed Bin Abi Maryam ne bayan kiya, kaha ke hum se Abu Ghassan ne bayan kiya, kaha ke mujh se Abu Hazim ne bayan kiya aur un se Sahl Bin Saad (Radi Allahu Anhu) ne ke Nabi Kareem (Sallallahu Alaihi Wasallam) ki khidmat mein doodh aur pani ka ek piyala pesh kiya gaya. Aap (Sallallahu Alaihi Wasallam) ne is ko piya. Aap (Sallallahu Alaihi Wasallam) ki dayin taraf ek nau-umar larka baitha hua tha. Aur kuch bade boorhe log bayin taraf baithe hue thay. Aap (Sallallahu Alaihi Wasallam) ne farmaya larke! kya tu ijazat day ga ke mein pehle ye piyala badon ko day doon. Is par us ne kaha, Ya Rasul Allah! mein to Aap ke jhoote mein se apne hisse ko apne siwa kisi ko nahi day sakta. Chunanche Aap (Sallallahu Alaihi Wasallam) ne wo piyala pehle isi ko day diya
.

Hum se Abdullah Bin Yusuf ne bayan kiya, kaha hum ko Imam Malik ne khabar di, unhein Abu Hazim Bin Dinar ne aur unhein Sahl Bin Saad Saidi (Radi Allahu Anhu) ne ke Rasul Allah (Sallallahu Alaihi Wasallam) ki khidmat mein doodh ya pani peene ko pesh kiya gaya. Aap (Sallallahu Alaihi Wasallam) ne ise piya. Aap (Sallallahu Alaihi Wasallam) ke dayin taraf ek larka tha aur bayin taraf badi umar wale thay. Larke se Aap (Sallallahu Alaihi Wasallam) ne farmaya kya tum mujhe is ki ijazat doge ke in logon ko ye (piyala) day doon ? Larke ne kaha, nahi Allah ki qasam! Ya Rasul Allah! Aap ki taraf se milne wale hisse ka isaar mein kisi par nahi kar sakta. Rawi ne bayan kiya ke aakhir Rasul Allah (Sallallahu Alaihi Wasallam) ne wo piyala isi larke ko day diya
.

Hum se Yahya Bin Qaza ne bayan kiya, kaha hum se Imam Malik ne, wo Abu Hazim se, wo Sahl Bin Saad (Radi Allahu Anhu) se ke Nabi Kareem (Sallallahu Alaihi Wasallam) ki khidmat mein peene ko kuch laya, (doodh ya pani) Aap (Sallallahu Alaihi Wasallam) ne ise nosh farmaya, Aap (Sallallahu Alaihi Wasallam) ke dayein taraf ek baccha baitha tha aur bare boodhe log bayein taraf baithe hue thay, Aap (Sallallahu Alaihi Wasallam) ne is bacche se farmaya ke agar tu ijazat de (to bacha hua pani) mein in bare logon ko de doon? Lekin us ne kaha. Ya Rasul Allah! Aap ke joothe mein se milne wale kisi hissa ka mein isar nahi kar sakta. Aap (Sallallahu Alaihi Wasallam) ne piyala jhatke ke sath usi ki taraf barha diya
.

Hum se Qutaiba ne bayan kiya, kaha hum se Imam Malik ne Abu Hazim se, wo Sahl Bin Saad (Radi Allahu Anhu) se ke Rasul Allah (Sallallahu Alaihi Wasallam) ki khidmat mein kuch peene ko laya gaya. Aap (Sallallahu Alaihi Wasallam) ki dayein taraf ek baccha tha aur qoum ke bare log bayein taraf thay. Aap (Sallallahu Alaihi Wasallam) ne bacche se farmaya ke kya tumhari taraf se is ki ijazat hai ke mein bacha hua pani in buzurgon ko de doon? To is bacche ne kaha ke nahi qasam Allah ki! mein Aap se milne wale apne hissa ka hargiz isar nahi kar sakta. Phir Aap (Sallallahu Alaihi Wasallam) ne mashroob in ki taraf jhatke ke sath barha diya
.

Hum se Habban bin Musa ne byaan kiya , kaha hum ko Abdullah ne khabar di , kaha hum ko Aasim Ahwal ne khabar di , unhein Muazha ne aur unhein Aisha razi Allahu anha ne ke Rasool Allah salla Allahu alaihi wasallam is aayat ke nazil hone ke baad bhi «turji-u man tashaa-u minhunna wa tu'wee ilayka man tashaa-u wa man-ibtaghayta mimman azalta fala junaha alayka» ke ”in mein se Aap jis ko chahein apne se door rakhein aur jin ko Aap ne alag kar rakkha tha is mein se kisi ko talab kar lein jab bhi Aap par koi gunah nahi .“ Agar (azwaj e mutahharat) mein se kisi ki baari mein kisi doosri biwi ke paas jaana chahte to jin ki baari hoti un se ijazat lete thay (Muazha ne byaan kiya ke) main ne is par Aisha razi Allahu anha se poocha ke aaisi surat mein Aap Nabi Karim salla Allahu alaihi wasallam se kya kehti thien ? Unhon ne farmaya ke main to yeh arz kar deti thi ke ya Rasool Allah! Agar yeh ijazat Aap mujh se le rahe hain to main to apni baari ka kisi doosre par eesaar nahi kar sakti . Is riwayat ki mutabia't Abbad bin Abbad ne ki , unhon ne Aasim se suna .

Hum se Ismail bin Abi Oways ne bayan kiya, kaha ke mujh se Imam Malik ne bayan kiya, in se Abu Hazim bin Dinar ne aur in se Sahl bin Saad razi Allahu anhu ne ke Rasool Allah salla Allahu alaihi wasallam ki khidmat mein ek sharbat laya gaya Nabi Karim salla Allahu alaihi wasallam ne is mein se piya, Aap ke dayein taraf ek larka baitha hua tha aur bayein taraf burhe log (Khalid bin Waleed razi Allahu anhu jaise baithe huay) thay. Nabi Karim salla Allahu alaihi wasallam ne bache se kaha kya tum mujhe ijazat do ge ke main in (shuyookh) ko (pehle) de doon. Larke ne kaha: Allah ki qasam, ya Rasool Allah! Aap ke jhoote mein se milne wale apne hisse ke muamla mein, main kisi par eesaar nahi karoon ga. Rawi ne bayan kiya ke is par Nabi Karim salla Allahu alaihi wasallam ne larke ke hath mein piyala de diya.