Hum se Qutaiba ne bayan kiya kaha ke hum se Abdul Aziz ne bayan kiya, un se Abu Hazim ne aur un se Sahl Bin Saad (Radi Allahu Anhu) ne ke Rasul Allah (Sallallahu Alaihi Wasallam) ki khidmat mein ek piyala pesh kiya gaya aur Aap (Sallallahu Alaihi Wasallam) ne ise nosh farmaya. Aap ki dayin taraf ek larka tha jo hazirin mein sab se kam umar tha. Badi umar wale Sahaba Aap ki bayin taraf thay. Nabi Kareem (Sallallahu Alaihi Wasallam) ne farmaya, ay larke! kya tumhari ijazat hai ke mein is piyale ka bacha hua pani boorhon ko doon ? Us ne jawab diya, Ya Rasul Allah! mein to Aap ka jhoota apne hisse ka kisi ko dene wala nahi hoon. Aakhir Aap ne wo piyala isi ko day diya
.

Hum se Muhammad Bin Bashar ne bayan kiya, kaha ke hum se Ghundar ne bayan kiya, kaha ke hum se Shuba ne bayan kiya, un se Muhammad Bin Ziyad ne, unhon ne Abu Hurairah (Radi Allahu Anhu) se suna ke Rasul Allah (Sallallahu Alaihi Wasallam) ne farmaya, is zaat ki qasam! jis ke hath mein meri jaan hai. Mein (Qiyamat ke din) apne houz se kuch logon ko is tarah haank donga jaise ajnabi oont houz se haank diye jate hain
.

Hum se Abdullah Bin Muhammad ne bayan kiya, kaha ke hum ko Abdur Razzaq ne khabar di kaha ke hum ko Maamar ne khabar di, unhein Ayyub aur Kaseer Bin Kaseer ne, donon ki riwayaton mein ek doosre ki ba-nisbat kami aur ziyadati hai, aur un se Saeed Bin Jubair ne ke Ibn Abbas (Radi Allahu Anhuma) ne bayan kiya ke Nabi Kareem (Sallallahu Alaihi Wasallam) ne farmaya, Ismail (Alaihis Salam) ki walidah (Hajira Alaihas Salam) par Allah reham farmaye ke agar unhon ne Zamzam ko chhor diya hota, ya yun farmaya ke agar wo Zamzam se chuloo bhar bhar kar na letin to wo ek behta chashma hota. Phir jab qabeela-e-Jurhum ke log aaye aur (Hajira Alaihas Salam se) kaha ke aap humein apne paros mein qayam ki ijazat dein to unhon ne ise qabool kar liya is shart par ke pani par un ka koi haq na hoga. Qabeela walon ne ye shart maan li thi
.

Hum se Abdullah Bin Muhammad Musnadi ne bayan kiya, kaha ke hum se Sufyan Sawri ne bayan kiya, un se Amr Bin Dinar ne, un se Abu Salih Samman ne, aur un se Abu Hurairah (Radi Allahu Anhu) ne ke Rasul Allah (Sallallahu Alaihi Wasallam) ne farmaya teen tarah ke aadmi aise hain jin se Qiyamat ke din Allah Ta'ala baat bhi na karega aur na in ki taraf nazar utha ke dekhega. Wo shakhs jo kisi saman ke mutalliq qasam khaye ke ise is ki qeemat is se ziyada di ja rahi thi jitni ab di ja rahi hai halankay wo jhoota hai. Wo shakhs jis ne jhooti qasam asar ke baad is liye khayi ke is ke zariya ek Musalman ke maal ko hazm kar jaye. Wo shakhs jo apni zaroorat se bacche pani se kisi ko roke. Allah Ta'ala farmaye ga ke aaj mein apna fazl isi tarah tumhe nahi donga jis tarah tum ne ek aisi cheez ke faltu hisse ko nahi diya tha jise khud tumhare hathon ne banaya bhi na tha. Ali ne kaha ke hum se Sufyan ne Amr se kai martaba bayan kiya ke unhon ne Abu Salih se suna aur Nabi Kareem (Sallallahu Alaihi Wasallam) tak is hadees ki sanad pahunchate thay
.