Hum se Abdullah Bin Yusuf ne bayan kiya, unhon ne kaha ke hum ko Imam Malik ne khabar di, unhon ne kaha ke humein Yazid Bin Khusaifah ne, un se Saib Bin Yazid ne bayan kiya ke Sufyan Bin Zuhair ne Azdshanwah qabeele ke ek buzurg se suna jo Nabi Kareem (Sallallahu Alaihi Wasallam) ke Sahabi thay. Unhon ne kaha ke mein ne Nabi Kareem (Sallallahu Alaihi Wasallam) se suna tha ke jis ne kutta pala, jo na kheti ke liye hai aur na maveshi ke liye, to is ki naikiyon se rozana ek qiraat kam ho jata hai. Mein ne poocha ke kya aap ne Rasul Allah (Sallallahu Alaihi Wasallam) se ye suna hai ? Unhon ne kaha han han! is masjid ke Rabb ki qasam! (mein ne zaroor Aap (Sallallahu Alaihi Wasallam) se ye suna hai)
.

Hum se Muaz Bin Fadalah ne bayan kiya, kaha ke hum se Hisham ne bayan kiya, un se Yahya Bin Abi Kaseer ne bayan kiya, un se Abu Salama ne aur un se Abu Hurairah (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne farmaya, jis shakhs ne koi kutta rakkha, us ne rozana apne amal se ek qiraat ki kami kar li. Albatta kheti ya maveshi (ki hifazat ke liye) kutte is se alag hain. Ibn Sirin aur Abu Salih ne Abu Hurairah (Radi Allahu Anhu) ke waste se bayan kiya bahawala Nabi Kareem (Sallallahu Alaihi Wasallam) ke bakri ke rewar, kheti aur shikar ke kutte alag hain. Abu Hazim ne kaha Abu Hurairah (Radi Allahu Anhu) ne Nabi Kareem (Sallallahu Alaihi Wasallam) se ke shikari aur maveshi ke kutte (alag hain)
.

Hum se Musa Bin Ismail ne bayan kiya, kaha hum se Hammam ne bayan kiya, un se Yahya ne bayan kiya, un se Abu Salama ne bayan kiya aur un se Abu Hurairah (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne farmaya "Jo shakhs kutta paale, is ke amal-e-naik mein se rozana ek qiraat (sawab) kam kar diya jata hai, khet ke liye ya maweshi ke liye jo kutte paale jayein wo is se alag hain."
.

Hum se Abdullah Bin Muslima ne bayan kiya, kaha hum se Sulaiman ne bayan kiya, kaha ke mujhe Yazid Bin Khaseefa ne khabar di, kaha ke mujhe Sa'ib Bin Yazid ne khabar di, unhon ne Sufyan Bin Abi Zuhair Shanwi (Radi Allahu Anhu) se suna, unhon ne Rasul Allah (Sallallahu Alaihi Wasallam) se suna, Aap (Sallallahu Alaihi Wasallam) ne farmaya "Jis ne koi kutta paala, na to paalne wale ka maqsad khet ki hifazat hai aur na maweshiyon ki, to rozana is ke naik amal mein se ek qiraat (sawab) ki kami ho jati hai." Sa'ib ne pucha, kya tum ne khud ye hadees Rasul Allah (Sallallahu Alaihi Wasallam) se suni thi? Unhon ne kaha, haan! Is qibla ke Rabb ki qasam (mein ne khud is hadees ko Rasul Allah Sallallahu Alaihi Wasallam se suna hai)
.

Hum se Muslim bin Ismail ne bayan kiya, unhon ne kaha hum se Abdul Aziz bin Muslim ne bayan kiya, in se Abdullah bin Dinar ne bayan kiya, unhon ne kaha ke main ne Ibn Umar razi Allahu anhuma se suna ke Nabi Karim salla Allahu alaihi wasallam ne farmaya ke jis ne aisa kutta pala jo na maveshi ki hifazat ke liye hai aur na shikar karne ke liye to rozana is ki nekiyon mein se do qiraat ki kami ho jati hai.

Hum se Makki bin Ibrahim ne bayan kiya, unhon ne kaha hum ko Hanzalah bin Abi Sufyan ne khabar di, unhon ne kaha ke main ne Salim se suna, unhon ne bayan kiya ke main ne Abdullah bin Umar razi Allahu anhuma se suna, unhon ne bayan kiya ke main ne Nabi Karim salla Allahu alaihi wasallam se suna, Aap salla Allahu alaihi wasallam ne farmaya ke shikariyon aur maveshi ki hifazat ki gharz ke siwa jis ne kutta pala to is ke sawab mein se rozana do qiraat ki kami ho jati hai.

Hum se Abdullah bin Yusuf ne bayan kiya, kaha hum ko Imam Malik ne khabar di, unhein Nafi ne aur in se Abdullah bin Umar razi Allahu anhuma ne bayan kiya ke Rasool Allah salla Allahu alaihi wasallam ne farmaya ke jis ne maveshi ki hifazat ya shikar ki gharz ke siwa kisi aur wajah se kutta pala is ke sawab se rozana do qiraat ki kami ho jati hai.