Mujh se Ishaq Bin Mansoor ne bayan kiya, kaha ke hum se Habban ne bayan kiya, ke hum se Hammam ne bayan kiya, un se Qatada ne, un se Abu Khaleel ne, un se Abdullah Bin Harith ne aur un se Hakim Bin Hizam (Radi Allahu Anhu) ne ke Nabi Kareem (Sallallahu Alaihi Wasallam) ne farmaya, bechne aur khareedne wale ko jab tak wo juda na hon (bai torr dene ka) ikhtiyar hai. Hammam rawi ne kaha ke mein ne apni kitab mein lafz «yakhtar» teen martaba likha hua paya. Pas agar donon ne sachayi ikhtiyar ki aur baat saaf saaf wazay kar di to unhein un ki bai mein barkat milti hai aur agar unhon ne jhooti baatein banayiein aur (kisi aib ko) chupaya to thora sa nafa shayad wo kama lein, lekin un ki bai mein barkat nahi ho gi. (Habban ne) kaha ke hum se Hammam ne bayan kiya, un se Abu-al-Tayyah ne bayan kiya, unhon ne Abdullah Bin Harith se suna ke yehi hadees wo Hakim Bin Hizam (Radi Allahu Anhu) se ba-hawala Nabi Kareem (Sallallahu Alaihi Wasallam) riwayat karte thay
.

Hum se Suleiman Bin Harb ne bayan kiya, kaha ke hum se Shuba ne bayan kiya, un se Qatada ne un se Salih Abu Khaleel ne, un se Ubaidullah Bin Harith ne, unhon ne Hakim Bin Hizam (Radi Allahu Anhu) se ke Rasul Allah (Sallallahu Alaihi Wasallam) ne farmaya, khareedne aur bechne walon ko is waqt tak ikhtiyar (bai khatam kar dene ka) hai jab tak donon juda na hon ya Aap (Sallallahu Alaihi Wasallam) ne ( «ma lam yatafarraqa» ke bajaye) «hatta yatafarraqa» farmaya. (Nabi Kareem Sallallahu Alaihi Wasallam ne mazeed irshad farmaya) pas agar donon ne sachayi se kaam liya aur har baat saaf saaf khol di to un ki khareed-o-farokht mein barkat hoti hai lekin agar koi baat chupa rakkhi ya jhoot kahi to un ki barkat khatam kar di jati hai
.

Hum se Badal Bin Muhabbir ne bayan kiya, kaha ke hum se Shuba ne bayan kiya, kaha ke hum se Qatada ne, kaha ke mein ne Abu Khaleel se suna, wo Abdullah Bin Harith se naqal karte thay aur wo Hakim Bin Hizam (Radi Allahu Anhu) se ke Nabi Kareem (Sallallahu Alaihi Wasallam) ne farmaya, khareed-o-farokht karne walon ko ikhtiyar hai jab tak wo ek doosre se juda na hon (ke bai faskh kar dein ya rakhein) ya aap ne ( «ma lam yatafarraqa» ke bajaye) «hatta yatafarraqa» farmaya. Pas agar donon ne sachayi ikhtiyar ki aur har baat khol khol kar bayan ki to un ki khareed-o-farokht mein barkat ho gi aur agar unhon ne kuch chupaye rakkha ya jhoot bola to un ke khareed-o-farokht ki barkat khatam kar di jaye gi
.

Hum se Sadaqa Bin Fazal ne bayan kiya, kaha ke hum ko Abdul Wahhab ne khabar di, kaha ke mein ne Yahya Bin Saeed se suna, kaha ke mein ne Nafay se suna aur unhon ne Ibn Umar (Radi Allahu Anhuma) se ke Nabi Kareem (Sallallahu Alaihi Wasallam) ne farmaya, khareed-o-farokht karne walon ko jab tak wo juda na hon ikhtiyar hota hai, ya khud bai mein ikhtiyar ki shart ho. (to shart ke mutabiq ikhtiyar hota hai) Nafay ne kaha ke jab Abdullah Bin Umar (Radi Allahu Anhuma) koi aisi cheez khareedte jo unhein pasand hoti to (khareedne ke baad) apne mamla-dar se juda ho jate
.

Hum se Hafs Bin Umar ne bayan kiya, kaha ke hum se Hammam ne bayan kiya, un se Qatada ne, un se Abu-al-Khaleel ne, un se Abdullah Bin Harith ne aur un se Hakim Bin Hizam (Radi Allahu Anhu) ne ke Rasul Allah (Sallallahu Alaihi Wasallam) ne farmaya, bechne aur khareedne walon ko jab tak wo juda na hon (mamla ko baqi rakhne ya torr dene ka) ikhtiyar hota hai. Ahmad ne ye ziyati ki ke hum se Bahz ne bayan kiya ke Hammam ne bayan kiya ke mein ne is ka zikr Abu-al-Tayyah ke samne kiya to unhon ne batlaya ke jab Abdullah Bin Harith ne ye hadees bayan ki thi, to mein bhi is waqt Abu-al-Khaleel ke sath maujood tha
.

Hum se Abu-al-Numan ne bayan kiya, kaha ke hum se Hammad Bin Zaid ne bayan kiya, un se Ayyub Sakhtiyani ne bayan kiya, un se Nafay ne aur un se Ibn Umar (Radi Allahu Anhuma) ne kaha ke Rasul Allah (Sallallahu Alaihi Wasallam) ne farmaya, khareedne wale aur bechne wale ko (bai torr dene ka) is waqt tak ikhtiyar hai jab tak wo juda na ho jayein. Ya donon mein se koi ek apne doosre fareeq se ye na keh de ke pasand kar lo. Kabhi ye bhi kaha ke ”ya ikhtiyar ki shart ke sath bai ho.“
.

Mujh se Ishaq Bin Mansoor ne bayan kiya, kaha ke hum ko Habban Bin Hilal ne khabar di, kaha ke hum se Shuba ne bayan kiya, ke un ko Qatada ne khabar di ke mujhe Salih Abu Khaleel ne khabar di, unhein Abdullah Bin Harith ne, kaha ke mein ne Hakim Bin Hizam (Radi Allahu Anhu) se suna ke Nabi Kareem (Sallallahu Alaihi Wasallam) ne farmaya khareedne aur bechne wale jab tak ek doosre se alag alag na ho jayein unhein ikhtiyar baqi rehta hai. Ab agar donon ne sachayi ikhtiyar ki aur har baat saaf saaf bayan aur wazay kar di, to un ki khareed-o-farokht mein barkat hoti hai. Lekin agar unhon ne koi baat chupayi ya jhoot bola to un ki khareed-o-farokht mein se barkat mita di jati hai
.

Hum se Abdullah Bin Yusuf ne bayan kiya, kaha ke hum ko Imam Malik ne khabar di, unhein Nafay ne aur unhein Abdullah Bin Umar (Radi Allahu Anhuma) ne ke Rasul Allah (Sallallahu Alaihi Wasallam) ne farmaya, khareedne aur bechne wale donon ko is waqt tak ikhtiyar hota hai, jab tak wo ek doosre se juda na hon. Magar bai-e-khiyar mein
.

Hum se Qutaiba ne bayan kiya, kaha ke hum se Liath ne bayan kiya, un se Nafay ne aur un se Ibn Umar (Radi Allahu Anhuma) ne ke Rasul Allah (Sallallahu Alaihi Wasallam) ne farmaya, jab do shakhson ne khareed-o-farokht ki to jab tak wo donon juda na ho jayein, unhein (bai ko torr dene ka) ikhtiyar baqi rehta hai. Ye is soorat mein ke donon ek hi jagah rahein, lekin agar ek ne doosre ko pasand karne ke liye kaha aur is shart par bai hui, aur donon ne bai ka qatyee faisla kar liya, to bai isi waqt munaqid ho jaye gi. Isi tarah agar donon fareeq bai ke baad ek doosre se juda ho gaye, aur bai se kisi fareeq ne bhi inkar nahi kiya, to bhi bai lazim ho jati hai
.

Hum se Muhammad Bin Yusuf Faryabi ne bayan kiya, kaha ke hum se Sufyan Thauri ne bayan kiya, un se Abdullah Bin Dinar ne aur un se Ibn Umar (Radi Allahu Anhuma) ne ke Nabi Kareem (Sallallahu Alaihi Wasallam) ne farmaya, kisi bhi khareedne aur bechne wale mein is waqt tak bai pukhta nahi hoti jab tak wo donon juda na ho jayein. Albatta wo bai jis mein mushtarka ikhtiyar ki shart laga di gayi ho is se alag hai
.