Hum se Ibrahim Bin Musa ne bayan kiya, kaha ke hum ko Hisham ne khabar di, un se Ibn Juraij ne bayan kiya ke mujhe Amr Bin Dinar ne khabar di, unhon ne Ata Bin Mina se suna, wo Abu Hurairah (Radi Allahu Anhu) se ye hadees naqal karte thay ke aap ne farmaya, Nabi Kareem (Sallallahu Alaihi Wasallam) ne do roze aur do qism ki khareed-o-farokht se mana farmaya hai. Eid-ul-Fitr aur Eid-ul-Adha ke roze se. Aur mulamasat aur munabazat ke sath khareed-o-farokht karne se
.

Hum se Qabeesah bin Uqbah ne bayan kiya, unhon ne kaha ke hum se Sufyan ne bayan kiya, jo Abu al-Zinad se naqal karte hain, woh Aaraj se, woh Abu Hurairah Razi Allah Anhu se ke Nabi Kareem Sallallahu Alaihi Wasallam ne do tarah ki bay o farokht se mana farmaya. Ek to chhune ki bay se, doosre phenkne ki bay se aur ishtimal-e-samma se (jis ka bayan oopar guzra) aur ek kapre mein goat maar kar baithne se.

Hum se Ayash Bin Waleed ne bayan kiya, un se Abdul Ala ne bayan kiya, un se Mamar ne bayan kiya, un se Zuhri ne, un se Ata Bin Yazid ne aur un se Abu Saeed Khudri (Radi Allahu Anhu) ne ke Nabi Kareem (Sallallahu Alaihi Wasallam) ne do tarah ke libas se mana farmaya, aur do tarah ki bai, bai-e-mulamasa aur bai-e-munabaza se mana farmaya
.

Mujh se Muhammad bin Bashar ne bayan kiya, kaha hum se Abd-ul-Wahhab bin Abd-ul-Majeed Saqafi ne bayan kiya, kaha hum se Ubaidullah Umri ne bayan kiya, in se Khubaib bin Abdur Rahman ne, in se Hafs bin Aasim ne aur in se Abu Hurairah razi Allahu anhu ne bayan kiya ke Nabi Karim salla Allahu alaihi wasallam ne bay mulamisa aur munabizha se mana farmaya aur do waqt namazon se bhi Aap ne mana farmaya, namaz e fajr ke baad sooraj buland hone tak aur Asr ke baad sooraj ghuroob hone tak aur is se mana farmaya ke koi shakhs sirf ek kapra jism par lapeit kar ghutne oopar utha kar is tarah baith jaye ke is ki sharmgah par aasman o zameen ke darmiyan koi cheez na ho aur ishtimal e sima se mana farmaya.

Hum se Yahya bin Bukayr ne bayan kiya, kaha hum se Layth ne bayan kiya, in se Yunus ne, in se Ibn Shihab ne bayan kiya, unhein Aamir bin Saad ne khabar di, aur in se Abu Saeed Khudri razi Allahu anhu ne bayan kiya ke Rasool Allah salla Allahu alaihi wasallam ne do tarah ke pehnawe aur do tarah ki khareed o farokht se mana farmaya. Khareed o farokht mein mulamisa aur munabizha se mana farmaya. Mulamisa ki surat yeh thi ke ek shakhs (khareedar) doosre (bechne wale) ke kapre ko raat ya din mein kisi bhi waqt bas chhoo deta (aur dekhe baghair sirf chhoone se bay ho jati) sirf chhoona hi kafi tha khol kar dekha nahi jata tha. Munabizha ki surat yeh thi ke ek shakhs apni milkiyat ka kapra doosre ki taraf phenkta aur doosra apna kapra phenkta aur baghair dekhe aur baghair bahami raza-mandi ke sirf isi se bay munaqid ho jati aur do kapre (jin se Nabi Karim salla Allahu alaihi wasallam ne mana farmaya unhi mein se ek) ishtimal e sima hai. Sima ki surat yeh thi ke apna kapra (ek chadar) apne ek shaane par is tarah dala jata ke ek kinara se (sharmgah) khul jati aur koi doosra kapra wahan nahi hota tha. Doosre pehnawe ka tariqa yeh thi ke baith kar apne ek kapre se kamar aur pindli baandh laite thay aur sharmgah par koi kapra nahi hota tha.