Hum se Ahmad Bin Yunus ne bayan kiya, kaha ke hum se Abu Bakr Bin Ayash ne bayan kiya, un se Suleiman Shaibani ne aur un se Ibn Abi Aufa (Radi Allahu Anhu) ne ke mein Nabi Kareem (Sallallahu Alaihi Wasallam) ke sath ek safar mein tha. Aap (Sallallahu Alaihi Wasallam) roze se thay, jab sham hui to aap (Sallallahu Alaihi Wasallam) ne ek shakhs se farmaya ke (ont se) utar kar mere liye sattu ghol, is ne kaha: ya Rasul Allah! agar sham hone ka kuch aur intezar farmaiyein to behtar ho, aap (Sallallahu Alaihi Wasallam) ne farmaya, utar kar mere liye sattu ghol (waqt ho gaya hai) jab tum ye dekh lo ke raat udhar mashriq se aa gayi to roza dar ke roza kholne ka waqt ho gaya
.

Hum se Ali Bin Abdullah Madini ne bayan kiya, kaha hum se Sufyan Bin Uyainah ne bayan kiya, un se Abu Ishaq Shaibani ne, unhon ne Abdullah Bin Abi Aufa (Radi Allahu Anhu) se suna kaha ke hum Rasul Allah (Sallallahu Alaihi Wasallam) ke sath safar mein thay (roze ki halat mein) Nabi Kareem (Sallallahu Alaihi Wasallam) ne ek sahab (Bilal Radi Allahu Anhu) se farmaya ke utar kar mere liye sattu ghol le, unhon ne arz ki ya Rasul Allah! abhi to sooraj baqi hai, aap (Sallallahu Alaihi Wasallam) ne phir farmaya ke utar kar sattu ghol le, ab ki martaba bhi unhon ne arz ki ya Rasul Allah! abhi sooraj baqi hai lekin aap ka hukm ab bhi yehi tha ke utar kar mere liye sattu ghol le, phir aap (Sallallahu Alaihi Wasallam) ne ek taraf ishara kar ke farmaya jab tum dekho ke raat yahan se shuru ho chuki hai to roza dar ko iftar kar lena chahiye. Is ki mutabi’at Jreer aur Abu Bakr Bin Ayash ne Shaibani ke wasta se ki hai aur un se Abu Aufa (Radi Allahu Anhu) ne kaha ke mein Rasul Allah (Sallallahu Alaihi Wasallam) ke sath safar mein tha
.

Hum se Humaidi ne bayan kiya, kaha hum se Sufyan Bin Uyainah ne bayan kiya, un se Hisham Bin Urwah ne bayan kiya, kaha ke mein ne apne baap se suna, unhon ne farmaya ke mein ne Asim Bin Umar (Radi Allahu Anhu) Bin Khattab se suna, un se un ke baap Umar (Radi Allahu Anhu) ne bayan kiya ke Rasul Allah (Sallallahu Alaihi Wasallam) ne farmaya, jab raat is taraf (mashriq) se aaye aur din udhar maghrib mein chala jaye ke sooraj doob jaye to roza ke iftar ka waqt aa gaya
.

Hum se Ishaq Wasti ne bayan kiya, kaha hum se Khalid ne bayan kiya, un se Suleiman Bin Shaibani ne, un se Abdullah Bin Abi Aufa (Radi Allahu Anhu) ne bayan kiya ke hum Rasul Allah (Sallallahu Alaihi Wasallam) ke sath (Ghazwa-e-Fatah jo Ramzan mein hua) safar mein thay aur Nabi Kareem (Sallallahu Alaihi Wasallam) roze se thay. Jab sooraj ghuroob ho gaya Aap (Sallallahu Alaihi Wasallam) ne ek sahabi (Bilal Radi Allahu Anhu) se farmaya ke ae falan! mere liye uth ke sattu ghol, unhon ne arz ki ke ya Rasul Allah! aap thori dair aur theharte. Aap (Sallallahu Alaihi Wasallam) ne farmaya utar kar hamare liye sattu ghol, is par unhon ne kaha ya Rasul Allah! aap thori dair aur theharte Nabi Kareem (Sallallahu Alaihi Wasallam) ne phir wahi hukm kiya ke utar kar hamare liye sattu ghol lekin in ka ab bhi khayal tha ke abhi din baqi hai. Nabi Kareem (Sallallahu Alaihi Wasallam) ne is martaba phir farmaya ke utar kar hamare liye sattu ghol chunanche utre aur sattu unhon ne ghol diya aur Rasul Allah (Sallallahu Alaihi Wasallam) ne piya. Phir farmaya ke jab tum ye dekh lo ke raat is mashriq ki taraf se aa gayi to roza dar ko iftar kar lena chahiye
.

Hum se Musaddad ne bayan kiya, kaha hum se Abdul Wahid ne bayan kiya, un se Suleiman Shaibani ne bayan kiya, kaha ke mein ne Abdullah Bin Abi Aufa (Radi Allahu Anhu) se suna, unhon ne kaha ke hum Rasul Allah (Sallallahu Alaihi Wasallam) ke sath safar mein ja rahe thay, aap (Sallallahu Alaihi Wasallam) roze se thay, jab sooraj ghuroob hua to aap ne ek shakhs se farmaya ke utar kar hamare liye sattu ghol, unhon ne kaha ya Rasul Allah! thori dair aur thehar-iye, aap (Sallallahu Alaihi Wasallam) ne farmaya ke utar kar hamare liye sattu ghol unhon ne phir yehi kaha ke ya Rasul Allah! abhi to din baqi hai, aap (Sallallahu Alaihi Wasallam) ne farmaya ke utar kar sattu hamare liye ghol, chunanche unhon ne utar kar sattu ghola. Nabi Kareem (Sallallahu Alaihi Wasallam) ne phir farmaya ke jab tum dekho ke raat ki tareeki udhar se aa gayi to roza dar ko roza iftar kar lena chahiye. Aap (Sallallahu Alaihi Wasallam) ne apni ungli se mashriq ki taraf ishara kiya
.

Hum se Ali bin Abdullah ne byaan kiya , kaha hum se Jareer bin Abdul Hameed ne byaan kiya , in se Abu Ishaq Shaybani ne aur in se Abdullah bin Abi Aufa ne byaan kiya ke hum Rasool Allah salla Allahu alaihi wasallam ke saath ek safar mein thay . Jab sooraj doob gaya to Nabi Karim salla Allahu alaihi wasallam ne ek sahabi (Bilal razi Allahu anhu) se farmaya ke utar kar mere liye sattu ghol (kyunke Aap salla Allahu alaihi wasallam roza se thay) unhon ne arz kiya: ya Rasool Allah! Agar andhera hone dein to behtar hai . Nabi Karim salla Allahu alaihi wasallam ne phir farmaya ke utar kar sattu ghol . Unhon ne arz kiya: ya Rasool Allah! Agar Aap aur andhera ho lene dein to behtar hai , abhi din baqi hai . Phir Nabi Karim salla Allahu alaihi wasallam ne farmaya ke utro aur sattu ghol lo . Aakhir teesri martaba kehne par unhon ne utar kar Nabi Karim salla Allahu alaihi wasallam ka sattu ghola . Nabi Karim salla Allahu alaihi wasallam ne usay piya , phir Aap ne apne hath se mashriq ki taraf isharah kiya aur farmaya ke jab tum dekho ke raat idhar se aa rahi hai to roza-dar ko iftaar kar lena chahiye .