Aur Ibn Umar razi Allahu anhuma ne byaan kiya ke Nabi Karim salla Allahu alaihi wasallam ne farmaya ke Allah Ta'ala aankh ke aansu par azab nahi de ga lekin is par azab de ga , is waqt Aap ne zaban ki taraf isharah kiya (ke nauha azab e Ilahi ka bais hai) . Aur Kabb bin Malik razi Allahu anhu ne kaha ke Nabi Karim salla Allahu alaihi wasallam ne (ek qarz ke silsile mein jo mera ek sahab par tha) meri taraf isharah kiya ke aadha le lo (aur aadha chhor do) . Asmaa razi Allahu anha ne byaan kiya ke Nabi Karim salla Allahu alaihi wasallam kusoof ki namaz parh rahe thay (main pahunchi aur) Aisha razi Allahu anha se poocha ke log kiya kar rahe hain ? Aisha razi Allahu anha bhi namaz parh rahi thien . Is liye unhon ne apne sar se sooraj ki taraf isharah kiya (ke yeh sooraj girhan ki namaz hai) main ne kaha , kiya yeh koi nishani hai ? Unhon ne apne sar ke isharay se bataya ke haan aur Anas razi Allahu anhu ne byaan kiya ke Nabi Karim salla Allahu alaihi wasallam ne apne hath se Abu Bakr razi Allahu anhu ko isharah kiya ke aage barhein . Ibn Abbas razi Allahu anhuma ne byaan kiya ke Nabi Karim salla Allahu alaihi wasallam ne apne hath se isharah kiya ke koi haraj nahi aur Abu Qatadah ne byaan kiya ke Nabi Karim salla Allahu alaihi wasallam ne mahram ke shikar ke silsile mein daryaft farmaya ke kiya tum mein se kisi ne shikari ko shikar maarne ke liye kaha tha ya is ki taraf isharah kiya tha ? Sahabah ne arz kiya ke nahi , Nabi Karim salla Allahu alaihi wasallam ne farmaya ke phir (is ka gosht) khao .

Hum se Abdullah bin Muhammad Musandi ne byaan kiya , kaha hum se Abu Aamir Abdul Malik bin Amr ne byaan kiya , kaha hum se Ibrahim bin Tahman ne byaan kiya , in se Khalid Hazza ne , in se Ikrimah ne aur in se Ibn Abbas razi Allahu anhuma ne byaan kiya ke Nabi Karim salla Allahu alaihi wasallam ne Bayt-ullah ka tawaf apne oont par sawar ho kar kiya aur Nabi Karim salla Allahu alaihi wasallam jab bhi rukn ke paas aate to is ki taraf isharah kar ke takbeer kehte aur Zaynub bint Jahsh razi Allahu anha ne byaan kiya ke Nabi Karim salla Allahu alaihi wasallam ne farmaya ke Yajooj Majooj ke diwar mein itna surakh ho gaya hai aur Aap ne apni ungliyon se nawway ka adad banaya .

Hum se Musaddad ne byaan kiya , in se Bishr bin Mufaddal ne byaan kiya , in se Salamah bin Alqamah ne byaan kiya , in se Muhammad bin Sireen ne aur in se Abu Hurairah razi Allahu anhu ne byaan kiya ke Abu al-Qasim salla Allahu alaihi wasallam ne farmaya ke Jumu'ah mein ek ghari aaisi aati hai jo Musalman bhi is waqt khara namaz parhe aur Allah se koi khair maange to Allah usay zaroor de ga . Nabi Karim salla Allahu alaihi wasallam ne (is saat ki wazahat karte huay) apne dast e mubarak se isharah kiya aur apni ungliyon ko darmiyani ungli aur chhoti ungli ke beech mein rakkha jis se hum ne samjha ke Aap is saat ko bahut mukhtasar hone ko bata rahe hain .

Aur Owaysi ne byaan kiya , in se Ibrahim bin Saad ne byaan kiya , in se Shubah bin Hajjaj ne , in se Hisham bin Yazid ne , in se Anas bin Malik razi Allahu anhu ne byaan kiya ke Nabi Karim salla Allahu alaihi wasallam ke zamana mein ek Yahudi ne ek larki par zulm kiya , is ke chaandi ke zewaraat jo woh pehne hui ku chheen liye aur is ka sar kachal diya . Larki ke ghar wale usay Nabi Karim salla Allahu alaihi wasallam ke paas laye to is ki zindagi ki bas aakhri ghari baqi thi aur woh bol nahi sakti ku . Nabi Karim salla Allahu alaihi wasallam ne is se poocha ke tumhein kis ne maara hai ? Falan ne ? Nabi Karim salla Allahu alaihi wasallam ne is waqia se ghair-mutaalliq aadmi ka naam liya . Is liye us ne apne sar ke isharay se kaha ke nahi . Byaan kiya ke phir Nabi Karim salla Allahu alaihi wasallam ne ek doosre shakhs ka naam liya aur woh bhi is waqia se ghair-mutaalliq thu to larki ne sar ke isharay se kaha ke nahi , phir Nabi Karim salla Allahu alaihi wasallam ne daryaft farmaya ke falan ne tumhein maara hai ? To is larki ne sar ke isharay se haan kaha .

Hum se Qubaysah ne byaan kiya , kaha hum se Sufyan ne byaan kiya , in se Abdullah bin Dinar ne aur in se Ibn Umar razi Allahu anhuma ne byaan kiya ke main ne Nabi Karim salla Allahu alaihi wasallam se suna Aap salla Allahu alaihi wasallam farma rahe thay ke fitna idhar se uthe ga aur Aap salla Allahu alaihi wasallam ne mashriq ki taraf isharah kiya .

Hum se Ali bin Abdullah ne byaan kiya , kaha hum se Jareer bin Abdul Hameed ne byaan kiya , in se Abu Ishaq Shaybani ne aur in se Abdullah bin Abi Aufa ne byaan kiya ke hum Rasool Allah salla Allahu alaihi wasallam ke saath ek safar mein thay . Jab sooraj doob gaya to Nabi Karim salla Allahu alaihi wasallam ne ek sahabi (Bilal razi Allahu anhu) se farmaya ke utar kar mere liye sattu ghol (kyunke Aap salla Allahu alaihi wasallam roza se thay) unhon ne arz kiya: ya Rasool Allah! Agar andhera hone dein to behtar hai . Nabi Karim salla Allahu alaihi wasallam ne phir farmaya ke utar kar sattu ghol . Unhon ne arz kiya: ya Rasool Allah! Agar Aap aur andhera ho lene dein to behtar hai , abhi din baqi hai . Phir Nabi Karim salla Allahu alaihi wasallam ne farmaya ke utro aur sattu ghol lo . Aakhir teesri martaba kehne par unhon ne utar kar Nabi Karim salla Allahu alaihi wasallam ka sattu ghola . Nabi Karim salla Allahu alaihi wasallam ne usay piya , phir Aap ne apne hath se mashriq ki taraf isharah kiya aur farmaya ke jab tum dekho ke raat idhar se aa rahi hai to roza-dar ko iftaar kar lena chahiye .

Hum se Abdullah bin Salama ne byaan kiya , kaha hum se Yazid bin Zuray ne byaan kiya , in se Sulayman Taymi ne , in se Abu Usman ne aur in se Abdullah bin Masood razi Allahu anhu ne byaan kiya ke Nabi Karim salla Allahu alaihi wasallam ne farmaya ke tum mein se kisi ko (sehri khane se) Bilal ki pukar na roke ya Aap ne farmaya ke ”in ki azaan“ kyunke woh pukarte hain , ya farmaya , azaan dete hain taake is waqt namaz parhne wala ruk jaye . Is ka elan se yeh maqsood nahi hota ke subah e sadiq ho gayi . Is waqt Yazid bin Zuray ne apne donon hath buland kiye (subah e kazib ki surat batane ke liye) phir ek hath ko doosre par phailaya (subah e sadiq ki surat ke izhaar ke liye) .

Aur Layth ne byaan kiya ke in se Jafar bin Rabee ne byaan kiya , in se Abdur Rahman bin Hurmuz ne , unhon ne Abu Hurairah razi Allahu anhu se suna ke Rasool Allah salla Allahu alaihi wasallam ne farmaya ke bakheel aur sakhi ki misal do aadmiyon jaisi hai jin par lohe ki do zirahein seene se gardan tak hain . Sakhi jab bhi koi cheez kharch karta hai to zirah is ke chamray par dheeli ho jati hai aur is ke paon ki ungliyon tak pahunch jati hai (aur phail kar itni barh jati hai ke) is ke nishan e qadam ko mitati chalti hai lekin bakheel jab bhi kharch ka irada karta hai to is ki zirah ka har halqa apni apni jagah chimat jata hai , woh usay dheela karna chahta hai lekin woh dheela nahi hota . Is waqt Aap ne apni ungli se apne halaq ki taraf isharah kiya .