Aur Allah Ta'ala ka Surah al-Mujadilah mein farmana ”Allahne is aurat ki baat sun li jo Aap se , apne shohar ke baare mein bahas karti thi . Aayat «faman lam yastati' fa-it-aamu sit-teena miskeenan» tak , aur mujh se Ismail ne byaan kiya , kaha mujh se Imam Malik ne byaan kiya ke unhon ne Ibn Shihab se kisi ne yeh masla poocha to unhon ne batlaya ke is ka zihar bhi aazad ke zihar ki tarah ho ga . Imam Malik ne byaan kiya ke ghulam roze do mahine ke rakkhe ga . Hasan bin Hurr ne kaha ke aazad mard ya ghulam ka zihar aazad aurat ya laundi se yaksaan hai . Ikrimah ne kaha ke agar koi shakhs apni laundi se zihar kare to is ki koi haisiyat nahi hoti . Zihar apni biwiyon se hota hai aur Arbi zaban mein «laam» «fee» ke ma'non mein aata hai to «ya-oodoona lima qaaloo» ka yeh maani ho ga ke phir is aurat ko rakhna chahein aur zihar ke kalma ko baatil karna aur yeh tarjuma is se behtar hai kyunke zihar ko Allah ne buri baat aur jhoot farmaya hai usay dohrane ke liye kaise kahe ga .

Aur Ibn Umar razi Allahu anhuma ne byaan kiya ke Nabi Karim salla Allahu alaihi wasallam ne farmaya ke Allah Ta'ala aankh ke aansu par azab nahi de ga lekin is par azab de ga , is waqt Aap ne zaban ki taraf isharah kiya (ke nauha azab e Ilahi ka bais hai) . Aur Kabb bin Malik razi Allahu anhu ne kaha ke Nabi Karim salla Allahu alaihi wasallam ne (ek qarz ke silsile mein jo mera ek sahab par tha) meri taraf isharah kiya ke aadha le lo (aur aadha chhor do) . Asmaa razi Allahu anha ne byaan kiya ke Nabi Karim salla Allahu alaihi wasallam kusoof ki namaz parh rahe thay (main pahunchi aur) Aisha razi Allahu anha se poocha ke log kiya kar rahe hain ? Aisha razi Allahu anha bhi namaz parh rahi thien . Is liye unhon ne apne sar se sooraj ki taraf isharah kiya (ke yeh sooraj girhan ki namaz hai) main ne kaha , kiya yeh koi nishani hai ? Unhon ne apne sar ke isharay se bataya ke haan aur Anas razi Allahu anhu ne byaan kiya ke Nabi Karim salla Allahu alaihi wasallam ne apne hath se Abu Bakr razi Allahu anhu ko isharah kiya ke aage barhein . Ibn Abbas razi Allahu anhuma ne byaan kiya ke Nabi Karim salla Allahu alaihi wasallam ne apne hath se isharah kiya ke koi haraj nahi aur Abu Qatadah ne byaan kiya ke Nabi Karim salla Allahu alaihi wasallam ne mahram ke shikar ke silsile mein daryaft farmaya ke kiya tum mein se kisi ne shikari ko shikar maarne ke liye kaha tha ya is ki taraf isharah kiya tha ? Sahabah ne arz kiya ke nahi , Nabi Karim salla Allahu alaihi wasallam ne farmaya ke phir (is ka gosht) khao .

Hum se Abdullah bin Muhammad Musandi ne byaan kiya , kaha hum se Abu Aamir Abdul Malik bin Amr ne byaan kiya , kaha hum se Ibrahim bin Tahman ne byaan kiya , in se Khalid Hazza ne , in se Ikrimah ne aur in se Ibn Abbas razi Allahu anhuma ne byaan kiya ke Nabi Karim salla Allahu alaihi wasallam ne Bayt-ullah ka tawaf apne oont par sawar ho kar kiya aur Nabi Karim salla Allahu alaihi wasallam jab bhi rukn ke paas aate to is ki taraf isharah kar ke takbeer kehte aur Zaynub bint Jahsh razi Allahu anha ne byaan kiya ke Nabi Karim salla Allahu alaihi wasallam ne farmaya ke Yajooj Majooj ke diwar mein itna surakh ho gaya hai aur Aap ne apni ungliyon se nawway ka adad banaya .