Hum se Adam ne bayan kiya, unhon ne kaha hum se Sho’bah ne bayan kiya, unhon ne kaha hum se Hakam ne bayan kiya, unhon ne Abu Juhaifah Radhiallahu Anhu se suna, woh kehte the ke (ek din) Rasoolullah Sallallahu Alaihi Wasallam hamaare paas dopahar ke waqt tashreef laaye to Aap Sallallahu Alaihi Wasallam ke liye Wuzu ka paani haazir kiya gaya jis se Aap Sallallahu Alaihi Wasallam ne Wuzu farmaaya. Log Aap Sallallahu Alaihi Wasallam ke Wuzu ka bacha huwa paani le kar use (apne badan par) pherne lage. Aap Sallallahu Alaihi Wasallam ne Zohr ki do rak’atein ada ki aur Asr ki bhi do rak’atein aur Aap Sallallahu Alaihi Wasallam ke saamne (aad ke liye) ek nezah tha.

Hum se Muhammad bin Ar'arah ne bayan kiya, kaha ke mujh se Umar Ibn Abi Za'idah ne bayan kiya Aun bin Abi Juhaifah se, unhon ne apne walid Abu Juhaifah Wahb bin Abdullah se ke main ne Rasool Allah Sallallahu Alaihi Wasallam ko ek surkh chamre ke khaime mein dekha aur main ne yeh bhi dekha ke Bilal Razi Allah Anhu Nabi Kareem Sallallahu Alaihi Wasallam ko wudu kara rahe hain aur har shakhs Aap ke wudu ka pani hasil karne ke liye ek doosre se aage badhne ki koshish kar raha hai. Agar kisi ko thoda sa bhi pani mil jata to woh ise apne oopar mal leta aur agar koi pani na pa sakta to apne saathi ke hath ki tari hi hasil karne ki koshish karta. Phir main ne Bilal Razi Allah Anhu ko dekha ke unhon ne apni ek barchi uthayi jis ke neeche lohe ka phal laga hua tha aur ise unhon ne gaad diya. Nabi Kareem Sallallahu Alaihi Wasallam (dere mein se) ek surkh poshak pehne hue tehband uthaye hue bahar tashreef laye aur barchi ki taraf munh kar ke logon ko do rakat namaz padhayi, main ne dekha ke aadmi aur janwar barchi ke pare se guzar rahe thay.

Hum se Abul Waleed ne bayan kiya , kaha hum se Shoba ne bayan kiya Awn bin Abi Juhaifa se , kaha mein ne apne walid Wahb bin Abdullah se suna ke Nabi Karim salla Allahu alaihi wa sallam ne logon ko Batha mein namaz parhayi . Aap salla Allahu alaihi wa sallam ke samne anza danda jis ke neechay phal laga hua ho gar diya gaya tha . Chunke aap salla Allahu alaihi wa sallam musafir thay is liye zuhr ki do rakat aur asr ki do rakaten ada ki . Aap salla Allahu alaihi wa sallam ke samne se auraten aur gadhe guzar rahe thay .

Hum se Adam bin Abi Iyas ne bayan kiya , kaha hum se Shoba ne bayan kiya , kaha ke hum se Awn bin Abi Juhaifa ne bayan kiya , kaha ke mein ne apne walid Abu Juhaifa Wahb bin Abdullah se suna unhon ne kaha ke Rasool Allah salla Allahu alaihi wa sallam dopahar ke waqt bahar tashreef laye . Aap salla Allahu alaihi wa sallam ki khidmat mein wudu ka pani pesh kiya gaya , jis se aap salla Allahu alaihi wa sallam ne wudu kiya . Phir humein aap salla Allahu alaihi wa sallam ne zuhr ki namaz parhayi aur asr ki , aap salla Allahu alaihi wa sallam ke samne anza gar diya gaya tha aur auraten aur gadhe par sawar log is ke peechay se guzar rahe thay .

Hum se Sulaiman bin Harb ne bayan kiya , kaha hum se Shoba ne Hukm bin Uyaynah se , unhon ne Abu Juhaifa se , unhon ne kaha ke Nabi Karim salla Allahu alaihi wa sallam hamare pas dopahar ke waqt tashreef laye aur aap salla Allahu alaihi wa sallam ne Batha mein zuhr aur asr ki do do rakaten parhin . Aap salla Allahu alaihi wa sallam ke samne anza gar diya gaya tha aur jab aap salla Allahu alaihi wa sallam ne wudu kiya to log aap salla Allahu alaihi wa sallam ke wudu ke pani ko apne badan par laga rahe thay .

Hum se Ishaaq bin Mansoor ne byaan kiya , unhon ne kaha ke hamein Jafar bin Awn ne khabar di , unhon ne kaha ke ham se Abul Umays ne byaan kiya , unhon ne Awn bin Abi Hujayfah se Abu Hujayfah ke wastay se byaan kiya , kaha ke main ne Rasool Allah salla Allahu alayhi wasallam ko Abtah mein dekha ke Bilal haazir huay aur Aap salla Allahu alayhi wasallam ko namaaz ki khabar di phir Bilal razi Allahu anhu barchhi le kar aage barhe aur usay Aap salla Allahu alayhi wasallam ke saamne (bator sutrah) maqaam Abtah mein gaarh diya aur Aap salla Allahu alayhi wasallam ne (us ko sutrah bana kar) namaaz parhayi .

Hum se Muhammad bin Yusuf Faryabi ne byaan kiya , kaha ke hum se Sufyan Thauri ne Awn bin Abi Hujayfah se byaan kiya , unhon ne apne baap se ke unhon ne Bilal razi Allahu anhu ko azaan dete huay dekha . Woh kehtay hain main bhi un ke munh ke saath idhar udhar munh pherne laga .

Hum se Abu Ali Hasan Bin Mansoor ne bayan kiya, kaha hum se Hajjaj Bin Muhammad Al-Aawar ne Masis-ah (shehar mein) bayan kiya, kaha hum se Shuba ne bayan kiya, un se Hakam ne bayan kiya ke mein ne Abu Juhaifah (Radi Allahu Anhu) ne suna, unhon ne bayan kiya ke Rasul Allah (Sallallahu Alaihi Wasallam) dopahar ke waqt safar ke irada se nikle. Bath-ha nami jagah par pahunch kar aap (Sallallahu Alaihi Wasallam) ne wazu kiya aur Zohar ki namaz do rakat (qasr) parhi phir Asar ki bhi do rakat (qasr) parhi. Aap (Sallallahu Alaihi Wasallam) ke samne ek chouta sa neza (bataur sutra) gara hua tha. Aun ne apne walid se is riwayat mein ye zyada kiya hai ke Abu Juhaifah (Radi Allahu Anhu) ne kaha ke is neza ke aage se aane jane wale aa ja rahe thay. Phir Sahaba aap ke pas aa gaye aur aap ke mubarak hathon ko tham kar apne chehron par pherne lage. Abu Juhaifah (Radi Allahu Anhu) ne bayan kiya ke mein ne bhi Aap (Sallallahu Alaihi Wasallam) ke dast-e-mubarak ko apne chehre par rakkha. Is waqt wo barf se bhi zyada thanda aur mushk se bhi zyada khushbudar tha
.

Hum se Hasan bin Sabbah Bazzar ne bayan kiya, kaha hum se Muhammad bin Sabiq ne bayan kiya, kaha hum se Malik bin Maghul ne bayan kiya, kaha ke mein ne Awn bin Abi Juhaifah se suna, woh apne walid (Abu Juhaifah Radi Allahu Anhu) se naqal karte thay ke mein safar ke irada se Nabi Kareem Sallallahu Alaihi Wa Sallam ki khidmat mein hazir hua to Aap Sallallahu Alaihi Wa Sallam Abtah mein (Muhassab mein) khaime ke andar tashreef rakhte thay. Kari dopahar ka waqt tha. Itne mein Bilal Radi Allahu Anhu ne bahar nikal kar namaz ke liye azan di aur andar aa gaye aur Bilal Radi Allahu Anhu ne Aap Sallallahu Alaihi Wa Sallam ke wudhu ka bacha hua pani nikala to log use lene ke liye toot pare. Phir Bilal Radi Allahu Anhu ne ek naiza nikala aur Aap Sallallahu Alaihi Wa Sallam bahar tashreef laye, goya Aap ki pindliyon ki chamak ab bhi meri nazron ke samne hai. Bilal Radi Allahu Anhu ne (satra ke liye) naiza gaar diya. Aap Sallallahu Alaihi Wa Sallam ne zuhr aur asr ki do do rak'at qasr namaz parhayi, gadhe aur aurtein Aap ke samne se guzar rahi thin.

Mujh se Ishaq bin Rahwayh ne bayan kiya, kaha hamain ko Ibn Shumayl ne khabar di, kaha hamain ko Umar bin Abi Zaidah ne khabar di, kaha hamain ko Aun bin Abi Juhaifah ne khabar di, in se in ke walid Abu Juhaifah razi Allahu anhu ne bayan kiya ke phir main ne dekha ke Bilal razi Allahu anhu ek neza le kar aaye aur usay zameen mein gaarr diya phir namaz ke liye takbeer kahi gayi. Main ne dekha ke Rasool Allah salla Allahu alaihi wasallam ek jora pehne huay bahar tashreef laaye jise Aap ne samait rakkha tha. Phir Aap ne neza ke samne kharay ho kar do rakat namaz e Eid parhayi aur main ne dekha ke insan aur janwar Nabi Karim salla Allahu alaihi wasallam ke samne neza ke bahar ki taraf se guzar rahe thay.

Hum se Muhammad bin Ar-ara ne bayan kiya , kaha ke mujh se Umar bin Abi Zaidah ne bayan kiya , in se Aun bin Abi Juhaifah ne aur in se un ke walid Wahb bin Abdullah Sawai razi Allahu anhu ne bayan kiya ke main (Hajjat-ul-Wada ke mauqa par) khidmat e Nabwi mein hazir hua to Aap salla Allahu alaihi wasallam chamre ke ek surkh khaima mein tashreef rakkhe huay thay aur main ne Bilal razi Allahu anhu ko dekha ke Nabi Karim salla Allahu alaihi wasallam ke wuzu ka pani liye huay hain aur sahabah ikraam razi Allahu anhum Nabi Karim salla Allahu alaihi wasallam ke wuzu ke pani ko le laine mein ek doosre ke aage barhne ki koshish kar rahe hain . Agar kisi ko kuch pani mil jata hai to woh usay apne badan par laga leta hai aur jise kuch nahi milta woh apne saathi ke hath ki tari hi ko lagaane ki koshish karta hai .