Hum se Musa Bin Ismail ne bayan kiya, kaha hum se Abu Awanah ne bayan kiya, un se Usman Bin Mauhab ne bayan kiya, kaha ke mujhe Abdullah Bin Abi Qatadah (Radi Allahu Anhu) ne khabar di aur unhein un ke walid Abu Qatadah ne khabar di ke Rasul Allah (Sallallahu Alaihi Wasallam) (Hajj ka) irada kar ke nikle. Sahaba Rizwanullahi Alaihim bhi aap ke sath thay. Aap (Sallallahu Alaihi Wasallam) ne sahaba ki ek jamaat ko jis mein Abu Qatadah (Radi Allahu Anhu) bhi thay ye hidayat de kar raste se wapas bheja ke tum log darya ke kinare kinare ho kar jao, (aur dushman ka pata lagao) phir hum se aa milo. Chunanche ye jamaat darya ke kinare kinare chali, wapasi mein sab ne ihram bandh liya tha lekin Abu Qatadah (Radi Allahu Anhu) ne abhi ihram nahi bandha tha. Ye qafila chal raha tha ke kai gor-khar dikhayi diye, Abu Qatadah ne un par hamla kiya aur ek mada ka shikar kar liya, phir ek jagah thehar kar sab ne is ka gosht khaya aur sath hi ye khayal bhi aya ke kya hum muhrim hone ke bawajood shikar ka gosht bhi khate hain ? Chunanche jo kuch gosht bacha wo hum sath laye aur jab Rasul Allah (Sallallahu Alaihi Wasallam) ki khidmat mein pohanche to arz ki ya Rasul Allah! hum sab log to muhrim thay lekin Abu Qatadah (Radi Allahu Anhu) ne ihram nahi bandha tha phir hum ne gor-khar dekhe aur Abu Qatadah (Radi Allahu Anhu) ne un par hamla kar ke ek mada ka shikar kar liya, is ke baad ek jagah hum ne qayam kiya aur is ka gosht khaya phir khayal aya ke kya hum muhrim hone ke bawajood shikar ka gosht kha bhi sakte hain ? Is liye jo kuch gosht baqi bacha hai wo hum sath laye hain. Aap ne poocha kya tum mein se kisi ne Abu Qatadah (Radi Allahu Anhu) ko shikar karne ke liye kaha tha ? Ya kisi ne is shikar ki taraf ishara kiya tha ? Sab ne kaha nahi. Is par Aap (Sallallahu Alaihi Wasallam) ne farmaya ke phir bacha hua gosht bhi kha lo
.

Hum se Musaddad ne bayan kiya, kaha hum se Yahya Bin Saeed Qattan ne, un se Ibn Jurayj ne, un se Ata ne, unhon ne Jabir Bin Abdullah (Radi Allahu Anhuma) se suna, unhon ne farmaya ke hum apni qurbani ka gosht Mina ke baad teen din se zyada nahi khate thay, phir Nabi Kareem (Sallallahu Alaihi Wasallam) ne humein ijazat de di aur farmaya ke khao bhi aur tosha ke taur par sath bhi le jao, chunancha hum ne khaya aur sath bhi laye. Ibn Jurayj ne kaha ke mein ne Ata se poocha kya Jabir (Radi Allahu Anhu) ne ye bhi kaha tha ke yahan tak ke hum Madinah pohanch gaye, unhon ne kaha nahi aisa nahi farmaya
.

Hum se Maaz Bin Fadalah ne bayan kiya, kaha hum se Hisham ne bayan kiya, un se Yahya Ibn Kathir ne, un se Abdullah Bin Abi Qatadah ne bayan kiya ke mere walid sulh-e-Hudaibiyah ke mauqe par (dushmanon ka pata lagane) nikle. Phir un ke sathiyon ne to ihram bandha liya lekin (khud unhon ne abhi) nahi bandha tha (asal mein) Nabi Kareem (Sallallahu Alaihi Wasallam) ko kisi ne ye ittela di thi ke maqam-e-Ghaiqah mein dushman aap ki taak mein hai, is liye Nabi Kareem (Sallallahu Alaihi Wasallam) ne (Abu Qatadah aur chand Sahaba Radi Allahu Anhum ko un ki talash mein) rawan kiya mere walid (Abu Qatadah Radi Allahu Anhu) apne sathiyon ke sath thay ke ye log ek doosre ko dekh kar hansne lage (mere walid ne bayan kiya ke) mein ne jo nazar uthayi to dekha ke ek jangli gadha samne hai. Mein is par jhapta aur neze se usay thanda kar diya. Mein ne apne sathiyon ki madad chahi thi lekin unhon ne inkar kar diya tha, phir hum ne gosht khaya. Ab humein ye darr hua ke kahin (Rasul Allah Sallallahu Alaihi Wasallam se) door na ho jayein, chunanche mein ne Aap ko talash karna shuru kar diya kabhi apne ghore taiz kar deta aur kabhi aahista, aakhir raat gaye Bano Ghifar ke ek shakhs se mulaqat ho gayi. Mein ne poocha ke Rasul Allah (Sallallahu Alaihi Wasallam) kahan hain ? Unhon ne bataya ke jab mein aap se juda hua to aap maqam-e-Tahan mein thay aur aap ka irada tha ke maqam-e-Saqya mein pohanch kar dopahar ka aaram karein ge. Gharz mein Nabi Kareem (Sallallahu Alaihi Wasallam) ki khidmat mein hazir ho gaya aur mein ne arz ki ya Rasul Allah! Aap ke ashab aap par salam aur Allah ki rahmat bhejte hain. Unhein ye darr hai ke kahin wo bahut peeche na reh jayein. Is liye aap thehar kar un ka intezar karein, phir mein ne kaha ya Rasul Allah! mein ne ek jangli gadha shikar kiya tha aur is ka kuch bacha hua gosht ab bhi mere paas maujood hai, Aap (Sallallahu Alaihi Wasallam) ne logon se khane ke liye farmaya halankay wo sab ihram bandhe hue thay
.

Hum se Ali Bin Abdullah ne bayan kiya, kaha ke hum ko Sufyan ne khabar di, un se Amr ne bayan kiya, kaha mujh ko Ata ne khabar di, unhon ne Jabir Bin Abdullah (Radi Allahu Anhu) se suna aap ne bayan kiya ke hum log Nabi Kareem (Sallallahu Alaihi Wasallam) ke zamane mein qurbani ka gosht bataur tosha Madinah le jaya karte thay (ye le jana bataur tosha hua karta tha, is se aap ka matlab sabit hua)
.

Hum se Khallad bin Yahya ne bayan kiya , kaha hum se Sufyan ne , in se Abdur Rahman bin Aabis ne , in se un ke walid ne bayan kiya ke main ne Aisha razi Allahu anha se poochha kiya Nabi Karim salla Allahu alaihi wasallam ne teen din se zyada qurbani ka gosht khane se mana kiya hai ? Unhon ne kaha ke Nabi Karim salla Allahu alaihi wasallam ne aisa kabhi nahi kiya . Sirf ek saal is ka hukm diya tha jis saal qahet para thu . Nabi Karim salla Allahu alaihi wasallam ne chaha tha (is hukm ke zariye) ke jo maal wale hain woh (gosht mahfooz karne ke bajaye) muhtajon ko khila dein aur hum bakri ke paye mahfooz rakh lete thay aur usay pandrah pandrah din baad khate thay . In se poochha gaya ke aisa karne ke liye kiya majboori ku ? Is par Umm al-Momineen razi Allahu anha hans parrein aur farmaya Aal e Muhammad salla Allahu alaihi wasallam ne salan ke saath gehoon ki roti teen din tak barabar kabhi nahi khayi yahan tak ke Aap Allah se ja mile . Aur Ibn Kaseer ne bayan kiya ke hamain Sufyan ne khabar di , in se Abdur Rahman bin Aabis ne yahi hadees bayan ki .

Mujh se Abdullah bin Muhammad ne bayan kiya , kaha hum se Sufyan ne bayan kiya , in se Amr ne , in se Ata ne aur in se Jabir razi Allahu anhu ne bayan kiya ke (Makkah Mukarramah se Hajj ki) qurbani ka gosht hum Nabi Karim salla Allahu alaihi wasallam ke zamana mein Madinah Munawwarah laate thay . Is ki mutabia-t Muhammad ne ki Ibn Uyaynah ke wasta se aur Ibn Jurayj ne bayan kiya ke main ne Ata se poochha kiya Jabir razi Allahu anhu ne yeh bhi kaha thu ke yahan tak ke hum Madinah Munawwarah aa gaye ? Unhon ne kaha ke unhon ne yeh nahi kaha thu .

Hum se Ali bin Abdullah ne bayan kiya , in se Sufyan ne bayan kiya ke Amr ne kaha , unhein Ata ne khabar di , unhon ne Jabir bin Abdullah razi Allahu anhuma se suna , unhon ne bayan kiya ke Madinah pahunchne tak hum Rasool Allah salla Allahu alaihi wasallam ke zamane mein qurbani ka gosht jama karte thay aur kai martaba (bajaye «luhoom-ul-adahi» ke) «luhoom-ul-hadyi» ka lafz istemal kiya .

Hum se Abu Aasim ne bayan kiya , in se Yazid bin Abi Ubaid ne aur in se Salama bin al-Akwa razi Allahu anhu ne bayan kiya ke Nabi Karim salla Allahu alaihi wasallam ne farmaya ke jis ne tum mein se qurbani ki to teesre din woh is halat mein subah kare ke is ke ghar mein qurbani ke gosht mein se kuch bhi baqi na ho . Doosre saal sahabah ikraam razi Allahu anhum ne arz kiya: ya Rasool Allah! kiya hum is saal bhi wahi karein jo pichhle saal kiya thu . (ke teen din se zyada qurbani ka gosht bhi na rakhein) . Nabi Karim salla Allahu alaihi wasallam ne farmaya ke ab khao , khilao aur jama karo . Pichhle saal to kyunke log tangi mein mubtala thay , is liye main ne chaha thu ke tum logon ki mushkilat mein in ki madad karo .

Hum se Ismail bin Abdullah ne bayan kiya , kaha ke mujh se mere bhai ne bayan kiya , in se Sulayman ne aur in se Yahya bin Saeed ne , in se Umrah bint Abdur Rahman ne aur in se Aisha razi Allahu anha ne bayan kiya ke Madinah mein hum qurbani ke gosht mein namak laga kar rakh dete thay aur phir usay Rasool Allah salla Allahu alaihi wasallam ki khidmat mein bhi pesh karte thay phir Nabi Karim salla Allahu alaihi wasallam ne farmaya ke qurbani ka gosht teen din se zyada na khaya karo . Yeh hukm zaroori nahi thu balkay Aap ka mansha yeh thu ke hum qurbani ka gosht (in logon ko bhi jin ke yahan qurbani na hui ho) khilayein aur Allah zyada jaanne wala hai .