Hum se Muhammad bin Yusuf Faryabi ne byaan kiya , kaha ke hum se Sufyan Thauri ne byaan kiya , un se Qais bin Muslim ne , un se Tariq bin Shihab ne aur un se Abu Musa Ashari ne ke mujhe Nabi Karim salla Allahu alaihi wasallam ne meri qaum ke paas Yemen bheja tha . Jab (Hajjat-ul-Wada ke mauqe par) main aaya to Aap salla Allahu alaihi wasallam se Batha mein mulaqat hui . Aap salla Allahu alaihi wasallam ne daryaft farmaya ke kis ka ahram baandha hai ? Maine arz ki ke Nabi Karim salla Allahu alaihi wasallam ne jis ka baandha ho Aap salla Allahu alaihi wasallam ne poocha kya tumhare saath qurbani hai ? Maine arz ki ke nahi , is liye Aap salla Allahu alaihi wasallam ne mujhe hukm diya ke main Baitullah ka tawaf , Safa aur Marwah ki sayi karoon chunanche main apni qaum ki ek khatoon ke paas aaya . Unhon ne mere sar ka kangha kiya ya mera sar dhoya . Phir Umar razi Allahu anhu ka zamana aaya to Aap ne farmaya ke agar hum Allah ki kitab par amal karein to woh yeh hukm deti hai ke Hajj aur Umrah poora karo . Allah Ta'ala farmata hai ”aur Hajj aur Umrah poora karo Allah ki raza ke liye .“ Aur agar hum Nabi Karim salla Allahu alaihi wasallam ki sunnat ko lein to Nabi Karim salla Allahu alaihi wasallam ne is waqt tak ahram nahi khoola jab tak Aap salla Allahu alaihi wasallam ne qurbani se faraghut nahi haasil farmayi .

Hum se Abdan ne bayan kiya, kaha ke mujhe mere baap Usman ne khabar di, unhein Shuba ne, unhein Qais Bin Muslim ne, unhein Tariq Bin Shihab ne aur un se Abu Musa (Radi Allahu Anhu) ne bayan kiya ke mein Rasul Allah (Sallallahu Alaihi Wasallam) ki khidmat mein hazir hua to Aap Batha mein thay. (Jo Makkah ke qareeb ek jagah hai) Aap (Sallallahu Alaihi Wasallam) ne poocha kya tu ne Haj ki niyat ki hai? Mein ne kaha ke haan, Aap (Sallallahu Alaihi Wasallam) ne daryaft farmaya ke tu ne ihram kis cheez ka bandha hai mein ne kaha ke Nabi Kareem (Sallallahu Alaihi Wasallam) ke ihram ki tarah bandha hai, Aap (Sallallahu Alaihi Wasallam) ne farmaya ke tu ne acha kiya ab ja. Chunancha (Makkah pohanch kar) mein ne Bait Allah ka tawaf kiya aur Safa-o-Marwah ki sayee ki, phir mein Bano Qais ki ek khatoon ke paas aaya aur unhon ne mere sar ki juein nikaleen. Is ke baad mein ne Haj ki labbaik pukari. Is ke baad mein Umar (Radi Allahu Anhu) ke ehd-e-khilafat tak isi ka fatwa deta raha phir jab mein ne Umar (Radi Allahu Anhu) se is ka zikr kiya to Aap (Radi Allahu Anhu) ne farmaya ke humein Kitab Allah par bhi amal karna chahiye aur is mein poora karne ka hukum hai, phir Rasul Allah (Sallallahu Alaihi Wasallam) ki sunnat par bhi amal karna chahiye aur Nabi Kareem (Sallallahu Alaihi Wasallam) qurbani se pehle halal nahi hue thay
.

Hum se Muhammad Bin Bashar ne bayan kiya, un se Ghundar Bin Muhammad Bin Jafar ne bayan kiya, un se Shuba ne bayan kiya, un se Qais Bin Muslim ne bayan kiya, un se Tariq Bin Shihab ne bayan kiya, aur un se Abu Musa Ashari ne bayan kiya, unhon ne bayan kiya ke mein Nabi Kareem (Sallallahu Alaihi Wasallam) ki khidmat mein Batha mein hazir hua aap wahan (Haj ke liye jate hue utre hue thay) Aap (Sallallahu Alaihi Wasallam) ne daryaft farmaya ke kya tumhara Haj hi ka irada hai? Mein ne kaha, ji haan. Aap (Sallallahu Alaihi Wasallam) ne poocha aur ihram kis cheez ka bandha hai? Mein ne kaha mein ne isi ka ihram bandha hai, jis ka Nabi Kareem (Sallallahu Alaihi Wasallam) ne ihram bandha ho, Aap (Sallallahu Alaihi Wasallam) ne farmaya tu ne acha kiya, ab Bait Allah ka tawaf aur Safa aur Marwah ki sayee kar le phir ihram khol daal, chunancha mein ne Bait Allah ka tawaf kiya aur Safa aur Marwah ki sayee, phir mein Bano Qais ki ek aurat ke paas aaya aur unhon ne mere sar ki juein nikaleen, is ke baad mein ne Haj ka ihram bandha. Mein (Nabi Kareem Sallallahu Alaihi Wasallam ki wafat ke baad) isi ke mutabiq logon ko masla bataya karta tha, jab Umar (Radi Allahu Anhu) ki khilafat ka dour aaya to aap (Radi Allahu Anhu) ne farmaya ke humein Kitab Allah par amal karna chahe ke is mein humein (Haj aur Umrah) poora karne ka hukum hua hai aur Rasul Allah (Sallallahu Alaihi Wasallam) ki sunnat par amal karna chahiye ke is waqt Aap (Sallallahu Alaihi Wasallam) ne ihram nahi khola tha jab tak hadyi ki qurbani nahi ho gayi thi. Lehaza hadyi sath lane walon ke waste aisa hi karne ka hukum hai
.

Hum se Abbas bin Waleed ne byaan kiya , kaha hum se Abdul Wahid bin Ziyad ne byaan kiya , un se Ayub bin Aaiz ne , un se Qays bin Muslim ne byaan kiya , kaha main ne Tariq bin Shihab se suna , unhon ne kaha ke mujh se Abu Musa Ash'ari razi Allahu anhu ne kaha ke mujhe Rasool Allah salla Allahu alaihi wasallam ne meri qaum ke watan (Yaman) mein bheja . Phir main aaya to Nabi Karim salla Allahu alaihi wasallam (Makkah ki) Wadi e Abtah mein parao kiye huay thay . Aap salla Allahu alaihi wasallam ne daryaft farmaya: Abdullah bin Qays! Tum ne hajj ka ihram bandha liya ? Main ne arz kiya: Ji haan ya Rasool Allah! Aap ne daryaft farmaya ke kalmat e ihram kis tarah kahe ? Byaan kiya ke main ne arz kiya (ke yun kalmat ada kiye hain) ”Ae Allah main hazir hoon , aur jis tarah Aap salla Allahu alaihi wasallam ne ihram bandha hai , main ne bhi isi tarah bandha hai .“ Farmaya tum apne saath qurbani ka janwar bhi laye ho ? Main ne kaha ke koi janwar to main apne saath nahi laya . Farmaya tum phir pehle Bayt Allah ka tawaf aur Safa aur Marwah ki sayi kar lo . In ruknon ki adayigi ke baad halal ho jana . Main ne isi tarah kiya aur Banu Qays ki khatoon ne mere sar mein kangha kiya aur isi qayade par hum is waqt tak chalte rahe jab tak Umar razi Allahu anhu khaleefa huay (isi ko hajj e tamattu kehte hain aur yeh bhi sunnat hai) .

Mujh se Bayan bin Amr ne byaan kiya , kaha hum se Nadr bin Shumayl ne byaan kiya , unhein Shubah ne khabar di , un se Qays bin Muslim ne byaan kiya , unhon ne Tariq bin Shihab se suna aur un se Abu Musa Ash'ari razi Allahu anhu ne byaan kiya ke main Rasool Allah salla Allahu alaihi wasallam ki khidmat mein hazir hua . Is waqt Aap salla Allahu alaihi wasallam Wadi e Bathaa (sang-rezi zameen) mein qiyam kiye huay thay . Aap ne poocha tum ne hajj ka ihram bandh liya ? Main ne arz kiya ke ji haan . Daryaft farmaya , ihram kis tarah bandha hai ? Arz kiya (is tarah) ke main bhi isi tarah ihram bandhta hoon jis tarah Nabi Karim salla Allahu alaihi wasallam ne bandha hai . Aap salla Allahu alaihi wasallam ne farmaya ke pehle (umrah karne ke liye) Bayt Allah ka tawaf kar , phir Safa aur Marwah ki sayi kar , phir halal ho ja . Chunanche main Bayt Allah ka tawaf aur Safa aur Marwah ki sayi kar ke qabila Qays ki ek aurat ke ghar aaya aur unhon ne mere sar se juein nikalein .

Hum se Muhammad bin Musanna ne byaan kiya , kaha ke hum se Muhammad bin Jafar Ghundar ne byaan kiya , kaha ke hum se Shubah ne byaan kiya , un se Qais bin Muslim ne , un se Tariq bin Shihab ne aur un se Abu Musa Ashari razi Allahu anhu ne ke main Nabi Karim salla Allahu alaihi wasallam ki khidmat mein (Hajjat-ul-Wada ke mauqe par Yemen se) hazir hua to Aap salla Allahu alaihi wasallam ne (mujh ko Umrah ke baad) ahram khool dene ka hukm diya .