Hum se Abdullah bin Yusuf ne byaan kiya ‘ kaha ke humein Imam Malik rahmatullah alaihi ne khabar di ‘ unhein Abul Zinad ne ‘ unhein Aaraj ne ‘ unhein Abu Hurairah razi Allahu anhu ne ke Rasool Allah salla Allahu alaihi wasallam ne farmaya is zaat ki qasam jis ke haath mein meri jaan hai agar koi shakhs rassi se lakriyon ka bojh baandh kar apni peeth par jangal se utha laye (phir unhein bazaar mein baich kar apna rizq haasil kare) to woh is shakhs se behtar hai jo kisi ke paas aa kar sawal kare . Phir jis se sawal kiya gaya hai woh usay de ya na de .

Hum se Musa bin Ismail ne byaan kiya ‘ kaha ke hum se Wuhaib ne byaan kiya ‘ kaha ke hum se Hisham bin Urwah ne byaan kiya ‘ un se un ke walid ne ‘ un se Zubayr bin Awwam razi Allahu anhu ne ke Nabi Karim salla Allahu alaihi wasallam ne farmaya tum mein se koi bhi agar (zaroorat mand ho to) apni rassi le kar aaye aur lakriyon ka gatha baandh kar apni peeth par rakh kar laye . Aur isay baiche . Is tarah Allah Ta'ala is ki izzat ko mehfooz rakh le to yeh is se accha hai ke woh logon se sawal karta phire ‘ usay woh dein ya na dein .

Hum se Umar bin Hafs bin Ghiyath ne byaan kiya ‘ kaha ke mujh se mere baap ne byaan kiya ‘ kaha ke hum se Aamash ne byaan kiya ‘ kaha ke hum se Abu Salih Zakwan ne byaan kiya ‘ aur un se Abu Hurairah razi Allahu anhu ne ‘ ke Rasool Allah salla Allahu alaihi wasallam ne farmaya agar tum mein se koi shakhs apni rassi le kar (mera khayal hai ke Aap salla Allahu alaihi wasallam ne yun farmaya) paharon mein chala jaye phir lakriyan jama kar ke unhein farokht kare . Is se khaye bhi aur sadqa bhi kare . Yeh us ke liye is se behtar hai ke logon ke saamne haath phaila-ye .

Hum se Yahya Bin Bukair ne bayan kiya, kaha ke hum se Laith Bin Saad ne bayan kiya, un se Aqeel ne, un se Ibn Shihab ne, un se Abdur Rahman Bin Auf (Radi Allahu Anhu) ke ghulam Abi Ubaid ne, unhon ne Abu Hurairah (Radi Allahu Anhu) ko ye kehte suna ke Rasul Allah (Sallallahu Alaihi Wasallam) ne farmaya wo shakhs jo lakri ka ghatta apni peeth par laad kar laye, is se behtar hai jo kisi ke samne hath phailaye chahiye wo usay kuch dede ya na de
.

Hum se Yahya Bin Musa ne bayan kiya, kaha ke hum se Wakee ne bayan kiya, kaha ke hum se Hisham Bin Urwah ne bayan kiya, un se un ke walid ne aur un se Zubair Bin Awam (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne farmaya ke agar koi apni rassiyon ko sambhal le aur un mein lakri bandh kar laye to wo is se behtar hai jo logon se mangta hai phirta hai
.

Hum se Mualla Bin Asad ne bayan kiya, kaha ke hum se Wuhaib ne bayan kiya, un se Hashim ne, un se un ke walid ne aur un se Zubair Bin Awwam ne (Radi Allahu Anhu) ne ke Nabi Kareem (Sallallahu Alaihi Wasallam) ne farmaya agar koi shakhs rassi lay kar lakriyon ka ghatta laye, phir ise beche aur is tarah Allah Ta'ala is ki aabru mahfooz rakkhe to ye is se behtar hai ke wo logon ke samne hath phailaye aur (bheek) ise di jaye ya na di jaye. Is ki bhi koi umeed na ho
.

Hum se Yahya Bin Bukair ne bayan kiya, kaha ke hum se Laith ne bayan kiya, un se Aqeel ne, un se Ibn Shihab, un se Abdur Rahman Bin Auf (Radi Allahu Anhu) ke ghulam Abu Ubaid ne, aur unhon ne Abu Hurairah (Radi Allahu Anhu) se suna ke Rasul Allah (Sallallahu Alaihi Wasallam) ne farmaya, agar koi shakhs lakriyon ka ghatta apni peeth par (bechne ke liye) liye phire to wo is se accha hai ke kisi ke samne hath phailaye. Phir khwah ise kuch day ya na day
.