Hum se Muhammad bin Abdullah bin Haushab ne byaan kiya ‘ kaha hum se Abdul Wahhab Saqafi ne ‘ un se Yahya bin Saeed Ansari ne , kaha ke mujhe Umrah bint Abdur Rahman Ansari ne khabar di , unhon ne byaan kiya ke main ne Aisha razi Allahu anha se suna , Aap ne farmaya ke jab Zayd bin Harithah ‘ Jafar bin Abi Talib aur Abdullah bin Rawahah razi Allahu anhum ki shahadat ki khabar aayi to Nabi Karim salla Allahu alaihi wasallam is tarah baithe ke gham ke aasaar Aap salla Allahu alaihi wasallam ke chehre par numayan thay main darwaze ke ek surakh se Aap salla Allahu alaihi wasallam ko dekh rahi thi . Itne mein ek saahib aaye aur kaha ke ya Rasool Allah! Jafar ke ghar ki auratein nuha aur maatam kar rahi hain . Nabi Karim salla Allahu alaihi wasallam ne rokne ke liye kaha . Woh saahib gaye lekin phir wapas aa gaye aur kaha ke woh nahin maantein . Aap salla Allahu alaihi wasallam ne dobara rokne ke liye bheja . Woh gaye aur phir wapas chale aaye . Kaha ke bakhuda woh to mujh par ghalib aa gayi hain ya yeh kaha ke hum par ghalib aa gayi hain . Shak Muhammad bin Haushab ko tha . (Aisha razi Allahu anha ne byaan kiya ke) mera yaqeen yeh hai ke Aap salla Allahu alaihi wasallam ne farmaya ke phir un ke munh mein mitti jhoonk de . Is par meri zaban se nikla ke Allah teri naak khaak aalooda kare tu na to woh kaam kar saka jis ka Nabi Karim salla Allahu alaihi wasallam ne hukm diya tha aur na Aap salla Allahu alaihi wasallam ko takleef dena chhor-ta hai .

Hum se Muhammad bin Muthanna ne byaan kiya ‘ kaha ke hum se Abdul Wahhab ne byaan kiya ‘ kaha ke main ne Yahya se suna , unhon ne kaha ke mujhe Umrah ne khabar di , kaha ke main ne Aisha razi Allahu anha se suna Aap ne kaha ke jab Nabi Karim salla Allahu alaihi wasallam ko Zayd bin Harithah ‘ Jafar aur Abdullah bin Rawahah razi Allahu anhum ki shahadat (Ghazwa-e-Muta mein) ki khabar mili ‘ to Aap salla Allahu alaihi wasallam is waqt is tarah tashreef farma thay ke gham ke aasaar Aap salla Allahu alaihi wasallam ke chehre par zahir thay . Main darwaze ke surakh se dekh rahi thi . Itne mein ek saahib aaye aur Jafar razi Allahu anhu ke ghar ki auraton ke rone ka zikr kiya . Aap salla Allahu alaihi wasallam ne farmaya ke unhein rone se mana kar de . Woh gaye lekin wapas aa kar kaha ke woh to nahin maantein . Aap salla Allahu alaihi wasallam ne phir farmaya ke unhein mana kar de . Ab woh teesri martaba wapas huay aur arz kiya ke ya Rasool Allah! qasam Allah ki woh to hum par ghalib aa gayi hain (Umrah ne kaha ke) Aisha razi Allahu anha ko yaqeen hua ke (un ke is kehne par) Rasool Allah salla Allahu alaihi wasallam ne farmaya ke phir un ke munh mein mitti jhoonk de . Is par main ne kaha ke tera bura ho . Rasool Allah salla Allahu alaihi wasallam ab jis kaam ka hukm de rahe hain woh to karo ge nahin lekin Aap salla Allahu alaihi wasallam ko takleef mein daal diya .

Hum se Qutaiba Bin Saeed ne bayan kiya ‘ kaha hum se Abdul Wahhab Bin Abdul Majeed ne bayan kiya ‘ kaha ke mein ne Yahya Bin Saeed se suna ‘ kaha ke mujhe Amrah Bint-e-Abdur Rahman ne khabar di ‘ kaha ke mein ne Aisha Radi Allahu Anha se suna ‘ unhon ne bayan kiya Zaid Bin Haritha ‘ Jafar Bin Abi Talib aur Abdullah Bin Rawaha Radi Allahu Anhum ki shahadat ki khabar ayi thi ‘ Nabi Kareem Sallallahu Alaihi Wasallam baithe hue thay aur Aap ke chehre se gham zahir ho raha tha. Aisha Radi Allahu Anha ne bayan kiya ke mein darwaze ki daraar se jhank rahi thi. Itne mein ek aadmi ne aa kar arz kiya: Ya Rasul Allah! Jafar Radi Allahu Anhu ke ghar ki aurten chilla kar ro rahi hain. Nabi Kareem Sallallahu Alaihi Wasallam ne hukm diya ke unhein rok do. Bayan kiya ke wo sahib gaye aur phir wapas aa kar kaha ke mein ne unhein roka aur ye bhi keh diya ke unhon ne is ki baat nahi maani. Phir is ne bayan kiya ke Nabi Kareem Sallallahu Alaihi Wasallam ne phir mana karne ke liye farmaya. Wo sahib phir ja kar wapas aaye aur kaha: Qasam Allah ki! Wo to hum par ghalib aa gayi hain. Aisha Radi Allahu Anha bayan karti thin ke Nabi Kareem Sallallahu Alaihi Wasallam ne in se farmaya ke phir in ke munh mein matti jhonk do. Umm-ul-Momineen Radi Allahu Anha ne bayan kiya ‘ mein ne kaha: Allah teri naak ghubar aalood kare na to tu aurton ko rok saka na tu ne Rasul Allah Sallallahu Alaihi Wasallam ko takleef dena hi chora
.