Hum se Ahmad Bin Salih ne bayan kiya ‘ kaha hum se Abdullah Bin Wahb ne bayan kiya ‘ in se Amr Bin Harith Ansari ne ‘ in se Saeed Bin Abi Hilal ne bayan kiya aur kaha ke mujhko Nafi ne khabar di aur unhein Ibn Umar Radi Allahu Anhuma ne khabar di ke is Ghazwa Mouta mein Jafar Tayyar Radi Allahu Anhu ki lash par kharay ho kar mein ne shumar kiya to nezon aur talwarom ke pachaas zakham in ke jism par thay lekin peeche yani peeth par ek zakham bhi nahi tha
.

Humein Ahmad Bin Abi Bakr ne khabar di ‘ unhon ne kaha hum se Mugheera Bin Abdur Rahman ne bayan kiya ‘ in se Abdullah ne bayan kiya ‘ in se Nafi ne aur in se Abdullah Bin Umar Radi Allahu Anhuma ne bayan kiya ke Rasul Allah Sallallahu Alaihi Wasallam ne Ghazwa Mouta ke lashkar ka ameer Zaid Bin Haritha Radi Allahu Anhu ko banaya tha. Nabi Kareem Sallallahu Alaihi Wasallam ne ye bhi farma diya tha ke agar Zaid shaheed ho jayein to Jafar ameer hon aur agar Jafar bhi shaheed ho jayein to Abdullah Bin Rawaha ameer hon. Abdullah Bin Umar Radi Allahu Anhuma ne bayan kiya ke is ghazwa mein ‘ mein bhi shareek tha. Baad mein jab hum ne Jafar Radi Allahu Anhu ko talash kiya to in ki lash humein shuhada mein mili aur in ke jism par kuch upar nabbe zakham nezon aur teeron ke thay
.

Hum se Ahmad Bin Waqid ne bayan kiya ‘ kaha hum se Hammad Bin Zaid ne bayan kiya ‘ in se Ayub Sakhtiyani ne ‘ in se Humaid Bin Hilal ne aur in se Anas Bin Malik Radi Allahu Anhu ne bayan kiya ke Rasul Allah Sallallahu Alaihi Wasallam ne Zaid ‘ Jafar aur Abdullah Bin Rawaha Radi Allahu Anhum ki shahadat ki khabar is waqt sahaba Radi Allahu Anhum ko de di thi jab abhi in ke mutaliq koi khabar nahi ayi thi. Aap Sallallahu Alaihi Wasallam farmate ja rahe thay ke ab Zaid jhanda uthaye hue hain ‘ ab wo shaheed kar diye gaye ‘ ab Jafar ne jhanda utha liya ‘ wo bhi shaheed kar diye gaye. Ab Ibn Rawaha ne jhanda utha liya ‘ wo bhi shaheed kar diye gaye. Nabi Kareem Sallallahu Alaihi Wasallam ki aankhon se aansu jari thay. Aakhir Allah ki talwarom mein se ek talwar Khalid Bin Waleed ne jhanda apne hath mein le liya aur Allah ne in ke hath par fatah inayait farmai
.

Hum se Qutaiba Bin Saeed ne bayan kiya ‘ kaha hum se Abdul Wahhab Bin Abdul Majeed ne bayan kiya ‘ kaha ke mein ne Yahya Bin Saeed se suna ‘ kaha ke mujhe Amrah Bint-e-Abdur Rahman ne khabar di ‘ kaha ke mein ne Aisha Radi Allahu Anha se suna ‘ unhon ne bayan kiya Zaid Bin Haritha ‘ Jafar Bin Abi Talib aur Abdullah Bin Rawaha Radi Allahu Anhum ki shahadat ki khabar ayi thi ‘ Nabi Kareem Sallallahu Alaihi Wasallam baithe hue thay aur Aap ke chehre se gham zahir ho raha tha. Aisha Radi Allahu Anha ne bayan kiya ke mein darwaze ki daraar se jhank rahi thi. Itne mein ek aadmi ne aa kar arz kiya: Ya Rasul Allah! Jafar Radi Allahu Anhu ke ghar ki aurten chilla kar ro rahi hain. Nabi Kareem Sallallahu Alaihi Wasallam ne hukm diya ke unhein rok do. Bayan kiya ke wo sahib gaye aur phir wapas aa kar kaha ke mein ne unhein roka aur ye bhi keh diya ke unhon ne is ki baat nahi maani. Phir is ne bayan kiya ke Nabi Kareem Sallallahu Alaihi Wasallam ne phir mana karne ke liye farmaya. Wo sahib phir ja kar wapas aaye aur kaha: Qasam Allah ki! Wo to hum par ghalib aa gayi hain. Aisha Radi Allahu Anha bayan karti thin ke Nabi Kareem Sallallahu Alaihi Wasallam ne in se farmaya ke phir in ke munh mein matti jhonk do. Umm-ul-Momineen Radi Allahu Anha ne bayan kiya ‘ mein ne kaha: Allah teri naak ghubar aalood kare na to tu aurton ko rok saka na tu ne Rasul Allah Sallallahu Alaihi Wasallam ko takleef dena hi chora
.

Mujh se Muhammad Bin Abi Bakr ne bayan kiya ‘ kaha hum se Umar Bin Ali ne bayan kiya ‘ in se Ismail Bin Abi Khalid ne bayan kiya ‘ in se Amir Shabi ne bayan kiya ke Ibn Umar Radi Allahu Anhuma jab Jafar Bin Abi Talib Radi Allahu Anhu ke bete ke liye salam bhejte to Assalamu Alaika Ya Ibn Zi-ul-Janahain kehte
.

Hum se Abu Naeem ne bayan kiya ‘ kaha hum se Sufyan Bin Uyainah ne bayan kiya ‘ in se Ismail Bin Abi Khalid ne ‘ in se Qais Bin Abi Hazim ne bayan kiya ke mein ne Khalid Bin Waleed Radi Allahu Anhu se suna ‘ unhon ne bayan kiya ke Ghazwa Mouta mein mere hath nau talwaren tooti thin. Sirf ek Yaman ka bana hua chore phal ka teegha baqi reh gaya tha
.

Mujh se Muhammad Bin Musanna ne bayan kiya ‘ kaha hum se Yahya Bin Saeed Qattan ne bayan kiya ‘ in se Ismail Bin Abi Khalid ne bayan kiya ‘ in se Qais Bin Abi Hazim ne bayan kiya ‘ kaha ke mein ne Khalid Bin Waleed Radi Allahu Anhu se suna ‘ wo bayan karte thay ke Ghazwa Mouta mein mere hath se nau talwaren tooti thin ‘ sirf ek Yamani teegha mere hath mein baqi reh gaya tha
.

Mujh se Imran Bin Maisara ne bayan kiya ‘ kaha hum se Muhammad Bin Fuzail ne bayan kiya ‘ in se Husain Bin Abdur Rahman ne ‘ in se Amir Shabi ne aur in se Numan Bin Bashir ne ke Abdullah Bin Rawaha Radi Allahu Anhu par (ek martaba kisi marz mein) be-hoshi tari hui to in ki bahen Amrah walida Numan Bin Bashir ye samajh kar ke koi hadisa aa gaya ‘ Abdullah Bin Rawaha Radi Allahu Anhu ke liye pukar kar rone lagin. Haye mere bhai haye ‘ mere aise aur waise. In ke mahasin is tarah ek ek kar ke ganane lagin lekin jab Abdullah Radi Allahu Anhu ko hosh aaya to unhon ne kaha ke tum jab meri kisi khoobi ka bayan karti thin to mujh se poocha jata tha ke kya tum waqeyi aise hi thay
.

Hum se Qutaiba ne bayan kiya ‘ kaha hum se Abasar Bin Qasim ne bayan kiya ‘ in se Husain ne ‘ in se Shabi ne aur in se Numan Bin Bashir Radi Allahu Anhu ne bayan kiya ke Abdullah Bin Rawaha Radi Allahu Anhu ko be-hoshi ho gayi thi ‘ phir upar ki hadees ki tarah bayan kiya. Chunancha jab (Ghazwa Mouta) mein wo shaheed hue to in ki bahen in par nahi royein
.