Hum se Abdullah bin Abi Shaybah ne byaan kiya , kaha ke hum se Ibn Fudayl ne byaan kiya , un se Amash ne , un se Ibrahim ne , un se Alqamah ne aur un se Abdullah bin Masood razi Allahu anhu ne kaha ke (ibtida-e-Islam mein) Nabi Karim salla Allahu alaihi wasallam jab namaaz mein hote to main Aap salla Allahu alaihi wasallam ko salam karta to Aap salla Allahu alaihi wasallam jawab dete thay . Magar jab hum (Habsha se jahan hijrat ki thi) wapas aaye to main ne (pehle ki tarah namaaz mein) salam kiya . Magar Aap salla Allahu alaihi wasallam ne koi jawab nahin diya (kyonke ab namaaz mein baat cheet waghaira ki mamanat nazil ho gayi thi) aur farmaya ke namaaz mein is se mashghuliyat hoti hai .

Hum se Abdullah bin Numayr ne byaan kiya , kaha ke hum se Muhammad bin Fudayl ne byaan kiya , kaha ke hum se Amash ne byaan kiya , un se Ibrahim ne , un se Alqamah ne aur un se Abdullah bin Masood razi Allahu anhu ne byaan kiya ke (pehle) Nabi Karim salla Allahu alaihi wasallam namaaz parhte hote aur hum salam karte to Aap salla Allahu alaihi wasallam is ka jawab dete thay . Jab hum Najashi ke yahan se wapas huay to hum ne (pehle ki tarah namaaz hi mein) salam kiya . Lekin is waqt Aap salla Allahu alaihi wasallam ne jawab nahin diya balkay namaaz se farigh ho kar farmaya ke namaaz mein aadmi ko fursat kahan .

Hum se Yahya Bin Hammad ne bayan kiya, kaha hum se Abu Awana ne bayan kiya, un se Sulaiman ne, un se Ibrahim ne, un se Alqamah ne aur un se Abdullah ne bayan kiya ke (ibtida-e-Islam mein) Nabi Kareem Sallallahu Alaihi Wasallam namaz parhte hote aur hum aap ko salam karte to aap namaz hi mein jawab inayat farmate thay. Lekin jab hum Najashi ke mulk Habshah se wapas (Madinah) aaye aur hum ne (namaz parhte mein) aap ko salam kiya to aap ne jawab nahi diya. Namaz ke baad hum ne arz kiya: Ya Rasul Allah! Hum pehle aap ko salam karte thay to aap namaz hi mein jawab inayat farmaya karte thay? Nabi Kareem Sallallahu Alaihi Wasallam ne is par farmaya ke haan namaz mein aadmi ko doosra shughl hota hai. Sulaiman Amash ne bayan kiya ke mein ne Ibrahim Nakhi se poocha aise mauqa par aap kya karte hain? Unhon ne kaha ke mein dil mein jawab de deta hoon
.