Hum se Abdullah bin Abi Shaybah ne byaan kiya , kaha ke hum se Ibn Fudayl ne byaan kiya , un se Amash ne , un se Ibrahim ne , un se Alqamah ne aur un se Abdullah bin Masood razi Allahu anhu ne kaha ke (ibtida-e-Islam mein) Nabi Karim salla Allahu alaihi wasallam jab namaaz mein hote to main Aap salla Allahu alaihi wasallam ko salam karta to Aap salla Allahu alaihi wasallam jawab dete thay . Magar jab hum (Habsha se jahan hijrat ki thi) wapas aaye to main ne (pehle ki tarah namaaz mein) salam kiya . Magar Aap salla Allahu alaihi wasallam ne koi jawab nahin diya (kyonke ab namaaz mein baat cheet waghaira ki mamanat nazil ho gayi thi) aur farmaya ke namaaz mein is se mashghuliyat hoti hai .

Hum se Abu Mamar ne byaan kiya , kaha ke hum se Abdul Warith ne byaan kiya , kaha ke hum se Kaseer bin Shanzir ne byaan kiya , un se Ata bin Abi Rabah ne un se Jabir bin Abdullah razi Allahu anhuma ne ke Rasool Allah salla Allahu alaihi wasallam ne mujhe apni ek zaroorat ke liye (Ghazwa Bani Mustaliq mein) bheja . Main wapas aaya aur main ne kaam poora kar diya tha . Phir main ne Nabi Karim salla Allahu alaihi wasallam ki khidmat mein hazir ho kar Aap salla Allahu alaihi wasallam ko salam kiya . Lekin Aap salla Allahu alaihi wasallam ne koi jawab nahin diya . Mere dil mein Allah jaane kya baat aayi aur main ne apne dil mein kaha ke shayad Rasool Allah salla Allahu alaihi wasallam mujh par is liye khafa hain ke main der se aaya hoon . Main ne phir dobara salam kiya aur jab is martaba bhi Aap salla Allahu alaihi wasallam ne koi jawab na diya to ab mere dil mein pehle se bhi zyada khayal aaya . Phir main ne (teesri martaba) salam kiya , aur ab Aap salla Allahu alaihi wasallam ne jawab diya aur farmaya ke pehle jo do baar main ne jawab na diya to is wajah se tha ke main namaaz parh raha tha , aur Aap salla Allahu alaihi wasallam is waqt apni ountni par thay aur is ka rukh Qibla ki taraf na tha balkay doosri taraf tha .