Hum se Abul Yaman ne byaan kiya , kaha ke humein Shuayb ne Zuhri se khabar di , kaha ke mujhe Salim bin Abdullah ne khabar di ke Abdullah bin Umar razi Allahu anhuma ne farmaya ek shakhs ne daryaft kiya ya Rasool Allah salla Allahu alaihi wasallam! Raat ki namaaz kis tarah parhi jaye ? Aap salla Allahu alaihi wasallam ne farmaya do , do rakat aur jab tulu subah hone ka andesha ho to ek rakat witr parh kar apni saari namaaz ko taaq bana le .

Hum se Musaddad bin Musarhad ne bayan kiya ke kaha hum se Bishr bin Mufaddal ne Ubaidullah bin Umar se , unhon ne Nafi se , unhon ne Abdullah bin Umar raziyallahu anhuma se ke ek shakhs ne Nabi Karim salla Allahu alaihi wa sallam se poocha jabke is waqt aap salla Allahu alaihi wa sallam minbar par thay ke raat ki namaz yani tahajjud kis tarah parhne ke liye aap farmate hain ? Aap salla Allahu alaihi wa sallam ne farmaya ke do do rakat kar ke parh aur jab subah qareeb hone lage to ek rakat parh lay . Yeh ek rakat is sari namaz ko taq bana de gi aur aap salla Allahu alaihi wa sallam farmaya karte thay ke raat ki aakhri namaz ko taq rakha karo kyunke Nabi Karim salla Allahu alaihi wa sallam ne is ka hukm diya .

Hum se Abul Numan Muhammad bin Fazl ne bayan kiya ke kaha hum se Hammad bin Zaid ne , unhon ne Ayyub Sakhtiyani se , unhon ne Ibn Umar raziyallahu anhuma se ke ek shakhs Nabi Karim salla Allahu alaihi wa sallam ki khidmat mein hazir hua . Aap salla Allahu alaihi wa sallam is waqt khutba de rahe thay aane wale ne poocha ke raat ki namaz kis tarah parhi jaye ? Aap salla Allahu alaihi wa sallam ne farmaya do do rakat phir jab tulu subah sadiq ka andesha ho to ek rakat witr ki parh lay taake tu ne jo namaz parhi hai isay yeh rakat taq bana de aur Imam Bukhari rahimahullah ne farmaya ke Waleed bin Kathir ne kaha ke mujh se Ubaidullah bin Abdullah Umri ne bayan kiya , Abdullah bin Umar raziyallahu anhuma ne un se bayan kiya ke ek shakhs ne Nabi Karim salla Allahu alaihi wa sallam ko awaz di jab ke aap salla Allahu alaihi wa sallam masjid mein tashreef farma thay .

Aur isi sanad ke sath Nafi se riwayat hai ke Abdullah bin Umar razi Allahu anhuma Witr ki jab teen rakatein parhte to do rakat parh kar salam pherte yahan tak ke zaroorat se baat bhi karte .

Hum se Yahya bin Sulayman ne byaan kiya , unhon ne kaha ke hum se Abdullah bin Wahb ne byaan kiya , unhon ne kaha ke hamein Amr bin Harith ne khabar di , in se Abdur Rahman bin Qasim ne apne baap Qasim se byaan kiya aur in se Abdullah bin Umar razi Allahu anhuma ne byaan kiya ke Rasool Allah salla Allahu alaihi wasallam ne farmaya , raat ki namaaz do , do rakatein hai aur jab tu khatam karna chahe to aik rakat Witr parh le jo saari namaaz ko taaq bana de gi . Qasim bin Muhammad ne byaan kiya ke hum ne bahut son ko teen rakat Witr parhte bhi paya hai aur teen ya aik (rakat Witr) sab jaiz aur mujh ko umeed hai ke kisi mein qabahat na hogi .

Hum se Abu Nuaman ne byaan kiya , kaha ke hum se Hammad bin Zayd ne byaan kiya , kaha ke hum se Anas bin Sireen ne byaan kiya , kaha ke main ne Ibn Umar razi Allahu anhuma se poocha ke namaaz subah se pehle ki do rakaton ke mutalleq Aap ka kya khayal hai? Kya main in mein lambi qirat kar sakta hoon? Unhon ne farmaya ke Nabi Karim salla Allahu alaihi wasallam to raat ki namaaz (Tahajjud) do , do rakat kar ke parhte thay phir aik rakat parh kar in ko taaq bana laite aur subah ki namaaz se pehle ki do rakatein (Sunnat-e-Fajr to) is tarah parhte goya azaan (iqamat) ki aawaz Aap ke kaan mein par rahi hai . Hammad ki is se murad yeh hai ke Aap jaldi parh laite .